- २६ असार २०८३, शुक्रबार / Jul 10, 2026
एजेन्सी । कर वृद्धिका कारण चिसिएको अमेरिका–चीन सम्बन्धको पृष्ठभूमिमा अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिनपिङबीच टेलिफोन वार्ता भएको छ।
डेढ घण्टासम्म चलेको वार्तामा मुख्य रूपमा दुई देशबीचको व्यापार विवादबारे कुराकानी भएको पुष्टि दुवै देशका अधिकारीहरूले गरेका छन्। ट्रम्पले सामाजिक सञ्जालमार्फत् वार्ता सकारात्मक रहेको उल्लेख गरेका छन्। गत फेब्रुअरीमा ट्रम्पले चिनियाँ सामानहरूमा उच्च कर लगाएपछि दुई देशबीचको व्यापार सम्बन्ध तनावग्रस्त बनेको थियो।
वार्ताको क्रममा ट्रम्प र सी दुबैले एकअर्कालाई आफ्ना देशको भ्रमणका लागि निम्तो दिएका छन्। ओभल अफिसमा जर्मन चान्सलर फ्रेडरिक मर्जसँगको बैठकका क्रममा ट्रम्पले आफूलाई सीले चीन भ्रमणमा बोलाएको बताएका छन्।
चीनले पनि ट्रम्पलाई भ्रमणको निम्तो दिएको पुष्टि गरेको छ। तर ट्रम्पले सीलाई अमेरिकाको भ्रमणमा बोलाएकोबारे भने खुलाइएको छैन। ट्रम्पले आफ्नो पहिलो राष्ट्रपतिकालमा चीन भ्रमण गरिसकेका छन्।
