- १ आश्विन २०८३, बिहीबार / Sep 17, 2026
सर्लाही, ६ जेठ । सर्लाहीको पर्सा गाउँपालिका–६ मा पर्ने हुलाकी सडक खण्डबाट प्रहरीले २४ हजार रुपैयाँ बराबरको नक्कली नोटसहित दुई युवकलाई पक्राउ गरेको छ।
बुधवार साँझ भारतीय नम्बर प्लेटको मोटरसाइकलमा आएका व्यक्तिहरूलाई चेकजाँच गर्ने क्रममा प्रहरीले ५०० रुपैयाँ दरका ४८ थान नक्कली नोट फेला पारेको हो।
पक्राउ पर्नेहरूमा मोटरसाइकल चालक लालबन्दी नगरपालिका–६ का २१ वर्षीय मुकेश कुमार साह र पछाडि सवार हरिपुर्वा नगरपालिका–४, डुमरिया निवासी २३ वर्षीय सरोज पण्डित रहेका छन्।
विशेष सूचनाका आधारमा प्रहरी नायब निरीक्षक मेथुल यादवको टोलीले उनीहरूलाई नियन्त्रणमा लिएको हो। जिल्ला अदालत सर्लाहीबाट पाँच दिनको म्याद थप गरेर हाल अनुसन्धान अगाडि बढाइएको जिल्ला प्रहरी कार्यालय सर्लाहीले जनाएको छ।
प्रहरीका अनुसार घटनामा संलग्न अन्य व्यक्तिहरूको खोजी पनि तीव्र रूपमा भइरहेको छ।
