नेकपा माओवादी केन्द्रका सांसद जनार्दन शर्माले शान्तिपूर्ण धर्नामा बसेका शिक्षकहरूमाथि दमन भएको भन्दै सरकारको भर्त्सना गरे। उनले संविधान निर्माणपछि समयमै नयाँ शिक्षा ऐन नबन्दा शिक्षकहरू आन्दोलनमा उत्रन बाध्य भएको बताए। “शिक्षकका जायज माग सम्बोधन नगरी दमन गर्नु उचित होइन,” उनले भने। रास्वपाकी सांसद सुमना श्रेष्ठले शिक्षकमाथिको दमनको विरोध गर्दै माग तत्काल सम्बोधन गर्नुपर्नेमा जोड दिइन्। उनले बालबालिकाको पढाइ प्रभावित भएको भन्दै सरकारले चाँडो समाधान निकाल्नुपर्ने बताइन्।
राप्रपाकी सांसद रोशन कार्कीले आन्दोलनमा घुसपैठ गराएर दमन गरेको सरकारमाथि आरोप लगाइन्। उनले शिक्षा ऐन पारित गरी शिक्षकहरूलाई पठनपाठनको वातावरण बनाउन माग गरिन्। सांसदहरूले प्रदर्शनमा घाइते भएकाहरूको उपचारको व्यवस्था गर्न पनि सरकारको ध्यानाकर्षण गराएका छन्।
