- १२ बैशाख २०८३, शनिबार / Apr 25, 2026
काठमाडौं, १४ भदौ । दशैंलाई लक्षित गर्दै नेपाल राष्ट्र बैंकले सुकिला नोट वितरण गर्ने भएको छ । बैंकका अनुसार सुकिला नोट सटही कार्यक्रम भदौ २९ देखि असोज १० गतेसम्म सञ्चालन हुनेछ ।
नेपाल राष्ट्र बैंकको मुद्रा व्यवस्थापन विभागले आज सूचना जारी गर्दै सो अवधिभर सर्वसाधारणले सुकिला नोट सहजै पाउने व्यवस्था मिलाइएको जनाएको हो ।
कहाँ–कहाँ सटही गर्न पाइन्छ ?
सर्वसाधारण तथा संघ–संस्थाले नयाँ र सुकिला नोटहरू निम्न स्थानहरूबाट सटही गर्न सक्नेछन् – नेपाल राष्ट्र बैंक, थापाथलीस्थित मुद्रा व्यवस्थापन विभाग, सातै प्रदेश कार्यालय : विराटनगर, जनकपुर, वीरगञ्ज, पोखरा, सिद्धार्थनगर, नेपालगञ्ज र धनगढी, इजाजतप्राप्त ‘क’, ‘ख’ र ‘ग’ वर्गका बैंक तथा वित्तीय संस्थाका शाखा कार्यालयहरूमा सटही प्रक्रिया बैंकिङ समयभित्र मात्र हुने स्पष्ट गरिएको छ ।
राष्ट्र बैंकले हरेक वर्ष दशैं, तिहारजस्ता चाडपर्वहरूमा सर्वसाधारणलाई सहज बनाउन सार्वजनिक प्रयोजनका लागि नयाँ तथा सुकिला नोट वितरण गर्दै आएको छ । यस वर्ष पनि विगतझैं सटही कार्यक्रम प्रभावकारी हुने विश्वास गरिएको छ ।
