- २८ बैशाख २०८३, सोमबार / May 11, 2026
भक्तपुर । ६० लाख भन्दा बढी रकम शुल्क लिएर पढाइरहेको एमबीबीएस ख्वप कलेजले प्राध्यापकलाई तलब खुवाउने मात्र रकम निकाली एमबीबीएस पढाउने भक्तपुर नगरपालिकाका प्रमुख सुनिल प्रजापतिले दाबी गरेका छन् । संविधान र कानूनले दिएको अधिकार क्षेत्रभित्र रही भक्तपुर नगरपालिकाले शिक्षा, स्वास्थ्य, सम्पदा संरक्षण, सरसफाइ, विकास निर्माणमा जनसहभागिता, युवालक्षित सीपमूलक तालिमहरूको बन्दोबस्त र नागरिक भावना जगाउने काम गरिरहेकोे उनको भनाइ छ ।
“ २०५४ सालको स्थानीय निर्वाचनमा नेपाल मजदुर किसान पार्टीको घोषणापत्रमा ‘शिक्षालाई जोड दिने’ भन्ने उल्लेख थियो । त्यतिबेला मेयर प्रेम सुवाल हुनुहुन्थ्यो । पार्टी नीति र घोषणापत्रअनुसार विसं २०५६ सालमा ख्वप मावि सञ्चालन भयो । त्यसपछि २०५८ सालमा ख्वप इन्जिनियरिङ कलेज र ख्वप कलेज, २०६० सालमा ख्वप बहुप्राविधिक अध्ययन संस्थान, २०६५ सालमा ख्वप कलेज अफ इन्जिनियरिङ, २०६७।६८ मा शारदा कलेज÷मावि संचालन भयो ।” उनले भने, “२०५६ सालमा अध्यक्ष विजुच्छेले १५ वर्ष भित्र एक घर एक स्नातक’ बनाउने घोषणा गर्नुभयो । हाल भनपाद्वारा संचालित २ वटा इन्जिनियरिङ कलेजबाट वार्षिक ४३२ जना विभिन्न विषयका इन्जिनियरसहित नपाका अन्य कलेजहरुमा ७७ जिल्लाका ७ हजारभन्दा बढी विद्यार्थीहरू उच्च शिक्षामा अध्ययनरत छन् । ”
भक्तपुर नगरपालिकाले ५ लाख रुपियाँसम्म ऋण स्वीकृत गरेर उच्च शिक्षा हासिल गर्ने अवसर प्रदान गरेको पनि उनले जानकारी दिए । शिशुस्याहारदेखि कलेजहरूसम्म सञ्चालन गर्ने र विद्यावारिधिसम्म अध्ययनको लागि छात्रवृत्तिको व्यवस्था गर्ने भक्तपुर पहिलो र देशको एकमात्र नगरपालिका रहेको प्रमुख प्रजापति बताउँछन् । शिक्षा क्षेत्रमा राम्रो गर्नका लागि व्यवस्थापन राम्रो र योग्य प्राध्यापक हुन जरुरी रहेको उनको भनाइ छ ।
नगर प्रमुख प्रजापतिका अनुसार नगरपालिककाले उच्च शिक्षा हासिल गर्न गरिब परिवारका विद्यार्थीहरुलाई नगरपालिकाले ऋण दिने गरेको छ। ६ सय जना जति विद्यार्थीले नगरपालिकासँग ऋण लिएर पढिरहेका छन् । जसमा ५ लाख ऋण लिन पाउँछन् । नगरपालिका भित्र बस्नेले स्वदेशमा जहाँ गएर पढे पनि विश्वविद्यालयमा तिर्दिने गरेकोछ । पहिलो वर्ष लिनेले पहिलो वर्षमा २० प्रतिशत फिर्ता हुन पनि सुरु भइसकेको छ ।
