काठमाण्डौ, १६ साउन । सुनसरीको देवानगञ्ज र कप्तानगञ्जमा भएको घटनापछि तनावग्रस्त बनेका मधेश तथा पूर्वी तराईका जिल्लाहरूमा अवस्था क्रमशः सामान्य बन्दै गएको छ । उग्र प्रदर्शनहरू कम हुन थालेसँगै स्थानीय प्रशासनले केही क्षेत्रमा लगाइएको कर्फ्यु हटाउँदै निषेधाज्ञा भने यथावत् राखेको छ ।
जिल्ला प्रशासन कार्यालय सुनसरीले जिल्लाका १० वटा पालिकामा लागू गरिएको कर्फ्यु हटाएर निषेधाज्ञा जारी गरेको छ । प्रमुख जिल्ला अधिकारी इश्वरीप्रसाद अर्यालका अनुसार सुरक्षा अवस्थाको समीक्षा गर्दै कर्फ्यु हटाइएको भए पनि सम्भावित अप्रिय गतिविधि रोक्न पाँच जनाभन्दा बढी व्यक्ति एकै ठाउँमा भेला हुन, सभा, जुलुस, प्रदर्शन, बैठक तथा धर्ना गर्न निषेध गरिएको छ ।
यस्तै धनुषाको जनकपुर क्षेत्र र सिरहाको लहानमा पनि कर्फ्यु हटाएर निषेधाज्ञा लागू गरिएको छ । तर सिरहाको गोलबजारमा भने कर्फ्यु अझै कायम रहेको प्रशासनले जनाएको छ । गोलबजारको सुरक्षा अवस्थाको थप समीक्षा गरी आगामी निर्णय गरिने बताइएको छ ।
कर्फ्यु आपत्कालीन अवस्थामा शान्ति–सुरक्षा कायम गर्न जारी गरिने सबैभन्दा कडा प्रशासनिक आदेश हो । यस अवधिमा तोकिएको क्षेत्रभित्र सर्वसाधारणलाई घरबाहिर निस्कन, सवारी सञ्चालन गर्न वा आवतजावत गर्न पूर्ण प्रतिबन्ध लगाइन्छ । आवश्यक परे सुरक्षाकर्मीले कानुनबमोजिम बल प्रयोग गर्न सक्ने व्यवस्था हुन्छ ।
निषेधाज्ञा भने कर्फ्युभन्दा केही खुकुलो व्यवस्था हो । अत्यावश्यक कामका लागि सीमित आवतजावत गर्न पाइए पनि पाँच जनाभन्दा बढी भेला हुन, सभा, जुलुस तथा प्रदर्शन गर्न भने रोक लगाइन्छ । निषेधाज्ञा उल्लङ्घन गर्ने व्यक्तिलाई पक्राउ, जरिवाना वा कानुनबमोजिम अन्य कारबाही गर्न सकिने व्यवस्था छ ।
गत आइतबार राति सुनसरीको कप्तानगञ्जमा भएको घटनापछि पूर्वी तराईका विभिन्न जिल्लामा आन्दोलन चर्किएपछि प्रशासनले कर्फ्यु तथा निषेधाज्ञा लागू गरेको थियो । प्रशासनले अहिले अधिकांश क्षेत्रमा अवस्था सामान्य बन्दै गएको उल्लेख गर्दै शान्ति–सुरक्षा, सामाजिक सद्भाव र कानुनी व्यवस्थालाई कायम राख्न निषेधाज्ञाको पूर्ण पालना गर्न सर्वसाधारणसँग आग्रह गरेको छ ।
