- २२ भाद्र २०८३, सोमबार / Sep 7, 2026
काठमाडौं, ४ बैशाख । संघीय संसद्अन्तर्गतका विभिन्न संसदीय समितिका सभापति चयनका लागि निर्वाचन आज हुने भएको छ ।
प्रतिनिधिसभाअन्तर्गतका विषयगत समिति तथा संयुक्त समितिहरूको छुट्टाछुट्टै बैठक दिउँसो १ बजे बस्ने संघीय संसद् सचिवालयले जनाएको छ । सोही बैठकबाट समितिका सभापति चयन गरिनेछ ।
हिजो सम्पन्न मनोनयन दर्ता प्रक्रियामा अधिकांश समितिमा एकल उम्मेदवारी परेको छ भने शिक्षा समिति र राज्यका निर्देशक सिद्धान्त, नीति तथा दायित्वको कार्यान्वयन अनुगमन तथा मूल्यांकन समितिमा दुई–दुई जना उम्मेदवार रहेका छन् ।
कानुन, न्याय तथा मानवअधिकार समिति सभापतिमा समीक्षा बास्कोटा, कृषि, सहकारी तथा प्राकृतिक स्रोत समिति सभापतिमा अशोककुमार चौधरीको उम्मेदवारी परेको छ । त्यस्तै पूर्वाधार विकास समितिमा आशिष गजुरेल, महिला तथा सामाजिक मामिला समितिमा आकृति अवस्थी र राज्यव्यवस्था तथा सुशासन समितिमा हरि ढकालको उम्मेदवारी परेको छ ।
अन्तर्राष्ट्रिय सम्बन्ध र पर्यटन समितिमा सुम्नीमा उदास, अर्थ समितिमा कृष्णहरि बुढाथोकी तथा उद्योग, वाणिज्य र श्रम तथा उपभोक्ता हित समितिमा रहबर अन्सारीले उम्मेदवारी दिएका छन् ।
लेखा समितिमा कांग्रेस सांसद भरतबहादुर खड्का र संसदीय सुनुवाइ समितिमा बोधनारायण श्रेष्ठको उम्मेदवारी परेको छ ।
शिक्षा, स्वास्थ्य तथा सूचना प्रविधि समितिमा रास्वपाका डा. ओजस्वी शेरचन र एमालेका गुरु बरालबीच प्रतिस्पर्धा हुने भएको छ । साथै राज्यका निर्देशक सिद्धान्त सम्बन्धी संयुक्त समितिमा रास्वपाका गणेश कार्की र नेकपाकी मदनकुमारी शाह (गरिमा)बीच प्रतिस्पर्धा हुने जनाइएको छ ।
