- २ आश्विन २०८३, शुक्रबार / Sep 18, 2026
धरान, १८ वैशाख । सशस्त्र प्रहरी बलले सुनसरीको धरान उपमहानगरपालिका–१३ निशाने डाँडा नजिकै कोशी लोकमार्गमा ७८३ किलोग्राम गाँजासहितको ट्रक र दुई जनालाई नियन्त्रणमा लिएको छ।
सशस्त्र प्रहरी बल, नेपाल नं.१ बराह बाहिनी मुख्यालय सुनसरी र सुरक्षा वेश धरानको संयुक्त टोलीले भेडेटारबाट धरानतर्फ आउँदै गरेको नम्बर प्लेटविहीन ट्रकलाई शङ्कास्पद ठानेर जाँच गरेको थियो। जाँचका क्रममा ट्रकको ड्राइभर सिटमाथि बक्सा बनाएर २२ वटा पोकामा लुकाइएको गाँजा र “ना ७ ख २८१” लेखिएको नम्बर प्लेट फेला परेको थियो।
नियन्त्रणमा लिइएका व्यक्तिहरूमा ट्रकका चालक सुनसरीको बराहक्षेत्र नगरपालिका–१ बस्ने ३१ वर्षीय मनोज परियार र सहचालक धनकुटा जिल्लाको सिदुवा नगरपालिका–६ बस्ने १८ वर्षीय आकाश राई छन्।
सशस्त्र प्रहरीका सहप्रवक्ता डीएसपी शैलेन्द्र थापाका अनुसार, पक्राउ परेका दुवै जना, गाँजा र ट्रकलाई आवश्यक कारबाहीका लागि बुधवार राति जिल्ला प्रहरी कार्यालय इनरुवा, सुनसरीमा बुझाइएको छ।
यसअघि बुधवार बिहान सशस्त्र प्रहरी बल विपद् व्यवस्थापन वेश धनकुटाले ४२१ किलो गाँजासहितको कार नियन्त्रणमा लिएको थियो।
