काठमाण्डौ, ३१ जेठ । अख्तियार दुरुपयोग अनुसन्धान आयोगको टोलीले यातायात व्यवस्था कार्यालय भरतपुर चितवनका कार्यालय सहायकलाई नगदसहित पक्राउ गरेको छ ।

सवारी चालक अनुमति पत्र (लाइसेन्स) परीक्षामा अनियमितता गरेको आरोपमा यातायात व्यवस्था कार्यालय चितवनका कार्यालय सहायक ईन्द्रजित गुरुङसहित बिचौलिया पनि पक्राउ परेका छन् ।

गुरुङको कार्यकक्षबाट एक लाख ८५ हजार रुपैयाँ नगदसहित बिचौलिया सुरज पाठक र गुरुङसमेतलाई कार्यालय परिसरबाट पक्राउ गरिएको आयोगका प्रवक्ता राजेन्द्रकुमार पौडेलले जानकारी दिनुभयो । लाइसेन्स परीक्षामा असफललाई पास गराउन रकम लिने गरिएको र गैर कानूनीकार्य भएको उजुरीका आधारमा उनीहरु पक्राउ परेका आयोगले जनाएको छ ।

त्यसैगरी कार्यालय प्रमुख बिष्णु भट्टराई तथा अन्य कर्मचारी, विभिन्न ड्राइभिइ सेन्टरका सञ्चालकको विद्युतीय उपकरण र अन्य कागजातसमेत नियन्त्रणमा लिएर थप अनुसन्धान भइरहेको प्रवक्ता पौडेलले बताउनुभयो । रासस

काठमाडौं, १० जेठ । नेपाली कांग्रेसका नेता डा. शेखर कोइरालाले गृहमन्त्री रमेश लेखकलाई अध्यागमन विभागमा भएको भ्रष्टाचारको घटनापछि नैतिकताको आधारमा राजीनामा दिन सुझाव दिएका छन्। विराटनगर विमानस्थलमा शनिबार सञ्चारकर्मीसँग कुरा गर्दै उनले भने, ‘भ्रष्टाचारको मुद्दा उठिसकेपछि गृहमन्त्रीले राजीनामा दिएर छानबिनमा सहयोग गर्नुपर्छ।’

कोइरालाले विगतमा मन्त्रीहरूले यस्तो कदम चालेर नैतिकता देखाएको स्मरण गर्दै लेखकको राजीनामाले उहाँको नैतिक प्रतिष्ठा जोगाउन सघाउने बताए। ‘मैले राजीनामा दिएर छानबिनको बाटो खोलिदिएँ, त्यसले नैतिक बल दिन्छ,’ उनले थपे।

उनले संवैधानिक निकायलाई कर्मचारीको ‘रिटायरमेन्ट क्लब’ जस्तो बनेको भन्दै कर्मचारीका लागि कुलिङ पिरियड आवश्यक रहेको औंल्याए। साथै, लोकतन्त्रवादी दलहरूले जनमत संग्रहबाट नडराउनुपर्ने र कांग्रेस, एमाले, माओवादी मिलेर हिन्दु राष्ट्र र संवैधानिक राजसंस्थाबारे जनमत संग्रह गर्न सक्नुपर्ने उनको भनाइ छ।

कोइरालाले २०८२ मंसिरमा कांग्रेसको महाधिवेशन आयोजना गर्नुपर्ने आफ्नो अडान दोहोर्‍याउँदै कार्यकर्तालाई दबाब सिर्जना गर्न आग्रह गरे।