एजेन्सी, २१ माघ । अमेरिकाले अरब सागरमा आफ्नो विमानवाहक युद्धपोततर्फ आउँदै गरेको इरानी ड्रोन खसालेको दाबी गरेको छ। अमेरिकी सेनाका अनुसार हिजो उक्त ड्रोनलाई स्टेल्थ लडाकु विमान प्रयोग गरी आत्मरक्षाका लागि खसालिएको हो।

अमेरिकी केन्द्रीय कमाण्ड (CENTCOM) का प्रवक्ता क्याप्टेन टिम हकिन्सले इरानको तटबाट झन्डै ५ सय माइल टाढा अमेरिकी जहाज रहेको अवस्थामा ड्रोन नजिकिएको र यसको उद्देश्य स्पष्ट नभएकाले कारबाही गरिएको बताउनुभयो। घटनामा कुनै पनि अमेरिकी सैनिक वा सैन्य उपकरणमा क्षति नपुगेको जनाइएको छ।

यो घटना वासिङ्टन र तेहरानबीच तनाव चर्किरहेको समयमा भएको हो। अमेरिकी राष्ट्रपति डोनाल्ड ट्रम्पले इरानले आफ्नो परमाणु कार्यक्रम सीमित गर्ने सम्झौतामा सहमत नभए सैन्य कारबाही हुन सक्ने चेतावनी दिँदै आउनुभएको छ।

व्हाइट हाउसकी प्रेस सेक्रेटरी करोलाइन लेभिटले राष्ट्रपति ट्रम्प कूटनीतिलाई प्राथमिकता दिने पक्षमा रहे पनि सबै विकल्प खुला रहेको बताउनुभएको छ। उता, इरानका सर्वोच्च नेता आयातोल्लाह अली खामेनीले इरानमाथि कुनै पनि आक्रमण भए क्षेत्रीय युद्ध सुरु हुने चेतावनी दिँदै आउनुभएको छ।

ड्रोन खसालिएको घटनाबारे इरानले अहिलेसम्म औपचारिक प्रतिक्रिया दिएको छैन। क्षेत्रीय तनावका बीच अमेरिका–इरानबीच सम्भावित वार्तालाई अन्तर्राष्ट्रिय समुदायले चासोका साथ हेरिरहेको छ।

काठमाण्डौ । आजदेखि देशभरको मौसममा सुधार देखिएको छ। काठमाण्डौ उपत्यकासहित धेरै ठाउँमा बिहानैदेखि घाम लागेका छन्।जल तथा मौसम पूर्वानुमान महाशाखाका अनुसार हिजोदेखि क्रमशः सुधार हुँदै आएको मौसममा आज थप सुधार भएको हो।

मौसमविद् सञ्जीव अधिकारीका अनुसार बङ्गालको खाडीबाट विकसित ‘मोन्था चक्रवात’ को प्रभाव हटे पनि नेपालमा अहिले पनि पश्चिमी वायु र अरब सागरमा बनेको न्यून चापीय प्रणालीको आंशिक प्रभाव जारी छ। उनले देशका केही भागमा आज हल्का वर्षा हुने सम्भावना रहेको बताए।

कोशी, बागमती र गण्डकी प्रदेशका पहाडी क्षेत्रहरूमा सामान्य वर्षा र उच्च हिमाली भागमा हल्का हिमपात हुनसक्ने सम्भावना छ।
दिउँसोतिर ती प्रदेशमा सामान्य बदली रहने र मधेश प्रदेशलगायत बाँकी स्थानमा मौसम सफा रहने महाशाखाले जनाएको छ।

आज राति पनि कोशी, बागमती र गण्डकीका पहाडी क्षेत्रमा आंशिक बदली रहने र अन्य प्रदेशमा मौसम मुख्यतया सफा रहनेछ। यसअघि, मोन्था चक्रवात, अरब सागरको न्यून चापीय प्रणाली र पश्चिमी वायुको संयुक्त प्रभावका कारण देशभर वर्षा र हिमपात हुँदा धानबालीमा क्षति र हिमाली क्षेत्रमा पदयात्रा अवरुद्ध भएका थिए।

काठमाडौँ, १२ कार्तिक । देशभर अहिले मौसम बदली रहेको छ। आज दिउँसोपख मौसम केही स्थानमा खुले पनि हल्का वर्षा र हिमपातको सम्भावना रहेको मौसम पूर्वानुमान महाशाखाले जनाएको छ।

हाल पश्चिमी वायु र अरब सागरबाट विकसित प्रणालीको प्रभाव नेपालमा सक्रिय रहेको बताइएको छ। गण्डकी प्रदेशका केही ठाउँमा, कोशी, बागमती, लुम्बिनी र कर्णाली प्रदेशका पहाडी तथा हिमाली भागका थोरै स्थानमा, साथै बाँकी पहाडी तथा हिमाली भू–भागका एक/दुई ठाउँमा हल्का वर्षासहित हिमपात भइरहेको छ।

आज दिउँसो कोशी, बागमती, गण्डकी र लुम्बिनी प्रदेशलगायत बाँकी पहाडी भागमा मौसम सामान्यतया बदली रहनेछ भने तराई भू–भागमा आंशिक बदली रहने अनुमान छ। गएराति काठमाडौं उपत्यकासहित केही स्थानमा हल्का वर्षा भएको थियो। आज राति पनि देशभर आंशिक बदली रहने सम्भावना छ।

मौसमविद्हरूका अनुसार वर्षा र हिमपातका कारण नदीनाला तथा खोल्सामा आकस्मिक बहाव, पहिरो, र सडक तथा हवाई यातायातमा असर पर्न सक्ने चेतावनी दिइएको छ। साथै कृषि र पर्यटन क्षेत्रमा पनि यसको प्रभाव पर्ने अनुमान गरिएको छ। त्यस्तै भोलिदेखि शनिवार बिहानसम्म बंगालको खाडीमा विकसित चक्रवात ‘मोन्था’ को असर नेपालमा देखिने भएको छ।

राष्ट्रिय विपद् जोखिम न्यूनिकरण तथा व्यवस्थापन प्राधिकरणले नागरिकहरूलाई सकेसम्म भोलि र पर्सि यात्रा नगर्न, तातो भएर बस्न र मौसमी सूचनाबारे जानकारी रहन अनुरोध गरेको छ। किसानलाई धान तथा अन्य बाली नकाट्न र काटिएको भए तत्काल भित्र्याउन पनि आग्रह गरिएको छ।