मुख्य बुँदा

मेयर सुनिल प्रजापतिले आयोजनामा वास्तविक पीडितलाई न्याय दिने प्रतिबद्धता व्यक्त

विरोधका लागि विरोध गर्ने व्यक्तिलाई पन्छाएरै काम अघि बढाइने

नगरपालिकाले आयोजनाबाट नाफा नभई विकासमा केन्द्रित रहने

कार्यक्रमा वडा अध्यक्ष र सदस्यहरूले पनि सहभागिता जनाए

नेपाल क्रान्तिकारी किसान संघले किसानको पक्षमा चेतावनी दिएको

भक्तपुर, १ भक्तपुर । भक्तपुर नगरपालिका वडा नं. २ मा आयोजित ठूलो ब्यासीमा मेयर सुनिल प्रजापतिले शिक्षा, स्वास्थ्य, सम्पदा संरक्षण र आवास क्षेत्रमा नगरपालिकाले गर्दै आएको कामको विवरण प्रस्तुत गर्नुभयो। उहाँले भन्नुभयो भक्तपुर नगरपालिकाले अन्तर्राष्ट्रिय स्तरमा  आफ्नो कामको प्रचारप्रसार गरिरहेको छ।

उहाँले “भक्तपुरको एक घर–एक स्नातक” अभियान सार्थक बनेको र नगरपालिकाले गरीब तथा जेहेनदार विद्यार्थीलाई प्रभावकारी रूपमा शैक्षिक ऋण प्रदान गर्दै आएको बताए। यसैगरी, देको मिवा आवास योजना चौथो परियोजना भएको र जनताको मागअनुसार आवास योजना अघि बढाइने स्पष्ट पार्नुभयो।

मेयर प्रजापतिले विरोधी गतिविधि गरिरहेका पीडित सङ्घर्ष समितिप्रतिलाइ चेतावनी दिँदै, नगरपालिकाले वास्तविक पीडितको न्याय सुनिश्चित गर्ने र विकास कार्य नरोकिँने बताउनुभयो। उहाँले सार्वजनिक र पर्ती जग्गा संरक्षणमा नगरपालिकाको प्रतिबद्धता पनि व्यक्त गर्नुभयो।

कार्यक्रममा वडा नं. २ का अध्यक्ष हरिप्रसाद बासुकला, वडा नं. ६ का अध्यक्ष हरिराम सुवाल, र वडा सदस्य मन्जुमैंया लाखा र श्यामसुन्दर मातांले वडाको विकास निर्माण र जनताको प्राथमिकताको आधारमा काम भइरहेको जानकारी दिनुभयो।

नेपाल क्रान्तिकारी किसान सङ्घ भक्तपुर नगर समितिका अध्यक्ष गंगाराम ज्याख्वले संघले जनताको हक सुनिश्चित गर्न काम गर्दै आएको र गलत गतिविधि गर्ने पक्षमा कहिल्यै नरहेको प्रष्ट पार्नुभयो।

नेमकिपा वडा नं. २ का संयोजक गणेशप्रसाद सुवालले देश र जनताको निःस्वार्थ सेवा नै राजनीति भएको उल्लेख गर्दै जनतालाई सचेत बनाउने काम भइरहेको जानकारी दिनुभयो। यस सभामा नगरपालिकाले विकास अवरोध रोक्ने, समस्याहरू जनतासँग छलफल गरी समाधान गर्ने प्रतिबद्धता पनि व्यक्त गरियो।

मुख्य बुँदा

गुन्हीपुन्ही सापारु २०८२ अन्तर्गत घिन्ताङघिसी, माक प्याखँ लगायत सांस्कृतिक प्रस्तुतिहरूको मूल्यांकन गरी विजयी समूहलाई पुरस्कार वितरण।

१४६ सांस्कृतिक समूहको सहभागिता, प्रत्येक वडाबाट १ जना सांस्कृतिक गुरु सम्मानित।

प्रमुख अतिथि नारायणमान बिजुक्छेँ (रोहित) को मन्तव्य: सम्पदा संरक्षण हाम्रो पहिचान, विदेशीमा भर पर्ने प्रवृत्तिबाट सचेत रहनुपर्ने।

सभापति सुनिल प्रजापति: भक्तपुर आत्मनिर्भर र संस्कृतिको राजधानी, पर्यटन प्रवर्द्धनमा जोड।

प्रदेशसभा सदस्य सुरेन्द्रराज गोसाईं: कला–संस्कृतिमार्फत जनसेवा सम्भव, शासक दलहरूको गलत नीतिले देशमा अराजकता।

उपप्रमुख रजनी जोशी: नयाँ पुस्तामा धरोहर पुस्तान्तरण गर्ने उद्देश्य, प्रतियोगिताबाट सांस्कृतिक प्रोत्साहन।

प्रमुख जिल्ला अधिकारी नमराज घिमिरे: भक्तपुरको प्रशासनिक र सांस्कृतिक काम अनुकरणीय।

पुरातत्व विभाग महानिर्देशक सौभाग्य प्रधानांग: सम्पदा संरक्षण इतिहास जगेर्नासँग जोडिएको।

भक्तपुर, २ असोज । नेपाल मजदुर किसान पार्टीका अध्यक्ष एवम् वरिष्ठ राजनीतिज्ञ नारायणमान बिजुक्छेँ (रोहित) ले देशमा व्याप्त भ्रष्टाचारले देशलाई झन्–झन् आर्थिक रूपले कमजोर हुनुमा शासक दलहरु नै जिम्मेवार रहेको बताउनुभएको छ ।

गुन्हीपुन्ही सापारु २०८२ मा प्रदर्शन गरिएका घिन्ताङघिसी, माक प्याखँ तथा परम्परागत एवम् आधुनिक सांस्कृतिक विधाका विजयी सांस्कृतिक समूहहरुलाई पुरस्कार वितरण एवम् सांस्कृतिक गुरुहरूको सम्मान कार्यक्रम बिहीबार संस्कृतिकर्मी तथा सांस्कृतिक गुरुहरुलाई बधाईज्ञापन गर्नुहुँदै अध्यक्ष बिजुक्छेँले उक्त कुरा बताउनुभएको हो ।

उहाँले नेपाल मजदुर किसान पार्टीका जनप्रतिनिधिहरूले निस्वार्थ रुपमा जनताको सेवा गर्ने भावनाले काम गर्दै आइरहेको बताउँर्दै सम्पदामा क्षति र हानि नोक्सानी गर्नेहरूबाट सचेत हुनुपर्ने बताउँनुभयो । उहाँले हाम्रो सम्पदा र कला संस्कृति नै हाम्रो पहिचान भएको हुँदा यसको संरक्षण र प्रवर्धनमा हामी स्वयं लाग्नुपर्ने तर्क गर्नुभयो ।

विदेशीको भरमा विकास गर्ने परनिर्भर सोचले हामीलाई अपाङ्ग र माग्ने प्रवृत्ति विकास हुने हुँदा हाम्रो इतिहास र सभ्यतालाई हामी आफैंले संरक्षण गर्नुपर्ने उहाँले बताउनुभयो। सांस्कृतिक कलाकार र संस्कृतिकर्मीहरूलाई निरन्तर उत्साहित गर्दै लानुपर्ने बताउँदै अध्यक्ष बिजुक्क्षले जनताको साथ र सहयोगमा गरिने हरेक काम सफल हुने बतानुभयो।

कार्यक्रममा भक्तपुर नगरपालिकाका प्रमुख सुनिल प्रजापतिले भक्तपुरको गाईजात्रा संसारकै उत्कृष्ट पर्वको रूपमा रहेको बताउँदै भक्तपुरका लोपन्मुख नाचहरू उजागर गर्ने उद्देश्यले सांस्कृतिक प्रतियोगितालाई जोड दिँदै आएको बताउनुभयो । सांस्कृतिक गुरु सम्मानले संस्कृतिकर्मीहरूमा उत्साह थप्ने काम भएको छ भन्दै उहाँले भक्तपुर विदेशीको सहयोगले होइन आफ्नो स्वाभिमानले आत्मनिर्भर भएर अगाडि बढेको नगर भएको बताउनुभयो ।

भक्तपुर नगरपालिकाले पर्यटन प्रबर्द्धनमा पनि जोड दिदै आएको भन्दै देशमा शान्ति सुरक्षाको प्रत्याभूति भए मात्र बिदेशी पर्यटक नेपालको भ्रमणमा आउने स्पस्ट पार्नुभयो । नयाँ पुस्तालाई सम्पदा संरक्षणको महत्व र भक्तपुरको कला संस्कृतिबारे अध्ययन अध्यापनको व्यवस्था गर्दै आएको बताउदै उहाले नयाँ पुस्तालाई प्रशिक्षित गरी पुस्तान्तरण गर्ने काममा नगरपालिकाले सहजीकरण गर्दै आएको बताउनुभयो।

बागमती प्रदेश सभा सदस्य सुरेन्द्रराज गोसाईंले गाईजात्राको समयमा प्रदर्शन गरिने सांस्कृतिक प्रतियोगिताका प्रस्तुतिहरूलाई अझ व्यापक रूपमा प्रस्तुत गर्न सुझाव दिँदै कला संस्कृतिमार्फत पनि जनताको सेवा सम्भव छ भन्ने उदाहरण भक्तपुर नगरपालिकाले प्रस्तुत गर्दै आएको बताउनुभयो।

भक्तपुरको कला संस्कृति नेपालमा मात्र नभई विश्वमा चिरपरिचित रहेको बताउँदै उहाँले कला संस्कृति संरक्षणमा भक्तपुर नगरपालिकाले अझ बुद्धिमानपूर्ण ढंगले अगाडि बढ्न जरुरी रहेको बताउनुभयो। वर्तमान राजनीतिक घटनाक्रमबारे आफ्नो धारणा व्यक्त गर्दै सांसद गोसाईले विदेशी हस्तक्षेपबारे नेपाल मजदुर किसान पार्टीले संसददेखि सडकसम्म र जनतालाई सुसुचित गर्ने काम गर्दै आएको बताउँदै अहिलेको अवस्थाको मुख्य जिम्मेवार शासक दलहरू नै भएको बताउनुभयो।

देशको राजनीति गलत बाटोमा गएपछि देशमा अशान्ति र अराजकता फैलिनु स्वाभाविक भएको बताउँदै उहाँले जनता स्वयं देशको रक्षक दल हुनुपर्ने पाठ वर्तमान राजनीतिक घटनाक्रमले पुष्टि गरेको बताउनुभयो। भक्तपुर नगरपालिकाका उपप्रमुख रजनी जोशीले भक्तपुरका अमूल्य धरोहरलाई नयाँ पुस्तामा पुस्तान्तरण गर्न विविध सांस्कृतिक प्रतियोगिता आयोजना गर्दै आएको बताउँदै समाजका अग्रज र सम्मानित व्यक्तिको रुपमा सांस्कृतिक गुरुहरुलाई सम्मान पनि गर्दै आएको बताउनुभयो ।

भक्तपुर नगरलाई नाचगानको राजधानीको रुपमा प्रस्तुत गर्न भक्तपुर नगरपालिका प्रयासरत रहेको बताउँदै पुर्खाले सिर्जेको सम्पत्ति हाम्रो कला र संस्कृति नारालाई व्यवहारिक रूपान्तरण गरी अगाडि बढ्दै आएको बताउनुभयो । भक्तपुर जिल्लाका प्रमुख जिल्ला अधिकारी नमराज घिमिरेले भक्तपुर जिल्लाले अन्तर्राष्ट्रिय जगतमा आफ्नो पहिचान कायम गर्न उदाहरणीय कामहरू गर्दै आएको बताउनुभयो।

भक्तपुर नगरपालिकाको प्रशासनिक व्यवस्था र सेवा प्रवाह अन्य नगरपालिकाको भन्दा अनुकरणीय भएको बताउँदै उहाँले संस्कृतिकर्मी सम्मान कार्यक्रमले भक्तपुरको सांस्कृतिक विविधतालाई जीवित राख्न महत्त्वपूर्ण भूमिका खेल्ने विश्वास व्यक्त गर्नुभयो।
भक्तपुरको शान्ति सुरक्षा कायम गर्ने विषयमा अझ तदारुक्ताका साथ अगाडि बढ्ने बताउनुभयो।

कार्यक्रममा पुरातत्व विभागका महानिर्देशक सौभाग्य प्रधानांगले भक्तपुर कलाकृति र संस्कृतिले भरिएको नगर भएको बताउँदै यहाँका मूर्त र अमूर्त सम्पदा संरक्षणले हाम्रो इतिहासलाई समेत जगेर्ना गर्न महत्वपूर्ण भूमिका खेल्ने बताउनुभयो। सांस्कृतिक सम्पदा संरक्षण गर्ने पहिलो दायित्व स्थानीय जनतामा निहित हुने बताउँदै उहाँले आगामी दिनमा पनि भक्तपुर नगरपालिकाले सम्पदा संरक्षणको क्षेत्रमा विशिष्ट योगदान पुर्याउँदै जाने विश्वास व्यक्त गर्नुभयो ।

कार्यक्रममा भनपा वडा नं. ७ का वडाध्यक्ष उकेश कवांले सांस्कृतिक गुन्हीपुन्ही सापारु २०८२ मा प्रदर्शन गरिएका घिन्ताङघिसी, माक प्याखँ तथा परम्परागत एवम् आधुनिक सांस्कृतिक विधाहरुको मूल्यांकनको समीक्षा गर्नुभयो ।

सोही क्रममा भक्तपुर नपा वडा नं. ९ का वडाध्यक्ष रबिन्द्र ज्याख्वले यो वर्ष प्रत्येक वडाबाट १ जना सांस्कृतिक गुरुहरुलाई उहाँहरुको योगदानको कदरस्वरुप भक्तपुर नपाले सम्मान गरिएको र यो वर्षको गुन्हीपुन्ही सापारुमा विविध विधाअन्तर्गत १४६ सांस्कृतिक समूहले प्रतियोगितामा भाग लिएको जानकारी दिनुभयाे । 

मुख्य बुँदा

भक्तपुर नगरपालिकाको आयोजनामा भदौ २२ गते सम्पदा पदयात्रा

भक्तपुर दक्षिणी भेगका १६ ऐतिहासिक, धार्मिक र सांस्कृतिक पोखरीहरूको परिक्रमा

पोखरीहरूको संरक्षण, जीर्णोद्धार र आकर्षक व्यवस्थापन नगरपालिकाद्वारा

सम्पदा पदयात्राले धार्मिक–सांस्कृतिक चेतना र पर्यटन प्रवर्द्धनमा योगदान

भक्तपुर, २१ भदौ । भक्तपुर नगरपालिकाले २०८२ भदौ २२ गते आइतबार आयोजना गर्ने सम्पदा पदयात्रामा भक्तपुर नगरका दक्षिणी भेगमा रहेका १६ वटा ऐतिहासिक, धार्मिक र सांस्कृतिक महमहत्वका पोखरीहरूको परिक्रमा गरिने भएको छ ।

नगरपालिकाले धार्मिक–सांस्कृतिक सम्पदाको संरक्षण र प्रवर्द्धनसँगै पर्यटकीय आकर्षण बढाउने उद्देश्यले यो पदयात्रा आयोजना गरेको जनाएको छ । पदयात्राका क्रममा सहभागीहरूले निम्न पोखरीहरूको परिक्रमा गर्नेछन् :

च्याम्हासिंह पुखू – आठ सिंहको संरचना बोकेको, हाल भक्तपुर नगरपालिका वडा नं. ९ वागीश्वरी मा.वि. परिसरमा रहेको धार्मिक महŒवको पोखरी । जेँला पुखू – क्षेत्रफलमा सानो भए पनि नगरपालिकाले जीर्णोद्धार गरी आकर्षक बनाएको पोखरी, रात्री समयमा फोहोरा र बत्तीले विशेष आकर्षण बढाउने ।खँचा पुखू – पाँचतले मन्दिरको प्रतिविम्ब देखिने ऐतिहासिक पोखरी, मध्यकालीन निर्माण शैलीको उत्कृष्ट नमुना ।

याता (न्हाद) पुखू – बस्तीको बीचमा रहेको, विगतमा घरायसी प्रयोजनमा प्रयोग भएको पोखरी, अहिले मत्स्यपालनसहित संरक्षण गरिएको ।गोल्मढी बारे पुखू – कमल पोखरी नामले चिनिने, किसानहरूले हडप्ने प्रयासपछि स्थानीय पहलमा सार्वजनिक कायम गरिएको पोखरी । कुमारी पुखू – अष्टमातृका पिठ परिसरमा अवस्थित, धार्मिक र सांस्कृतिक महमहत्व  बोकेको पोखरी ।

खँला (ख्यो) पुखू – भेलुखेलस्थित, जीर्णोद्धारपछि महादेवको मूर्ति राखिएको, हाल नगरपालिकाले पानी अडाइ सदुपयोगमा ल्याएको पोखरी लैको पुखू – गोलाकारबाट षट्कोण आकारमा जीर्णोद्धार गरिएको सानो पोखरी, फोहोरा सहित आकर्षक बनाइएको ।सुनधारा पुखू – सम्भवतः भक्तपुरकै सबैभन्दा सानो पोखरी, बिचमा नागको धातुको प्रतिमा राखिएको ।

दुमाजु पुखू (रुन्चे पोखरी) – बालबालिकाको रुन्चे निको हुने जनविश्वास बोकेको ऐतिहासिक पोखरी, तलेजु परिसरभित्र अवस्थित । भण्ड पुखू (भण्डार पोखरी) – मल्लकालमा धन सम्पत्ति भण्डारण भएको विश्वास गरिने, अहिले दरबार क्षेत्रको कला सङ्ग्रहालय परिसरमा अवस्थित पोखरी । नासमना पुखू (मंगलकुण्ड पोखरी) – नासमना चोकमा रहेको, घरायसी प्रयोजन र पौडी खेल्न प्रयोग हुने पोखरी, अहिले सम्पदा क्षेत्रमा संरक्षणमा । मंगलाछेँ पुखू – मचो गणेश मन्दिर नजिक अवस्थित सानो पोखरी, धार्मिक र सांस्कृतिक महमहत्वसहित संरक्षित । देगमना पुखू – देगमना टोलमा रहेको, देवी–देवताका मूर्तिहरूसहितको पवित्र पोखरी ।

तेखा पुखू (तेखाचो पुखू) – पोखरीको बिचमा महादेवको मूर्ति स्थापना गरिएको, धार्मिक महमहत्व बोकेको पोखरी । भाज्या पुखू (भाजु पुखू) – मल्लकालीन भारदार भाजुकसले निर्माण गरेको विश्वास, हाल नगरपालिकाले आकर्षक स्वरूपमा जीर्णोद्धार गरी पर्यटकीय गन्तव्य बनाएको पोखरी ।

नगरपालिकाले पछिल्ला वर्षहरूमा यी पोखरीहरूको जीर्णोद्धार, संरक्षण र व्यवस्थापनमा विशेष ध्यान दिएको छ । फोहोरा, रंगीन बत्ती, मत्स्यपालन, डिल निर्माण लगायतका व्यवस्थापनले पोखरीहरू अझ आकर्षक बनेका छन् । नगर प्रमुखका अनुसार, “यी पोखरीहरू भक्तपुरको धार्मिक–सांस्कृतिक पहिचानका धरोहर मात्र होइनन्, पर्यटकीय दृष्टिकोणले पनि अत्यन्त सम्भावनायुक्त सम्पदा हुन् । सम्पदा पदयात्राबाट सर्वसाधारणलाई आफ्नै संस्कृतिप्रति अभिमान बढाउने र पर्यटन प्रवर्द्धनमा सहयोग पुग्नेछ ।”

मुख्य बुँदा:

शैक्षिक गुणस्तर वृद्धि उद्देश्य

विविध विषयमा कलेज स्थापना

आत्मनिर्भर र उत्तरदायी विद्यार्थी उत्पादन लक्ष्य

शैक्षिक क्षेत्रमा स्थानीय सरकारको सक्रियता

अन्य स्थानीय तहमा सकारात्मक प्रभाव
भक्तपुर, ६ साउन । भक्तपुर नगरपालिका नगर प्रमुख सुनिल प्रजापतिले कमजोर विद्यार्थीलाई उत्कृष्ट अंकसहित परीक्षामा उत्तीर्ण गराउनमा शिक्षकको सफलता रहने बताउनुभएको छ । भक्तपुर नगरपालिकाद्वारा सञ्चालित ख्वप इन्जिनियरिङ कलेजले गरिब, जेहेनदार तथा अनुशासित विद्यार्थीलाई छात्रवृत्ति रकम वितरण गर्दै उहाँले उक्त कुरा बताउनुभएको हो ।

ख्वप इ कलेजमा स्नातक तहको इन्जिनियरिङ र आर्किटेक्चर शैक्षिक कार्यक्रम २०७७, २०७८, २०७९ र २०८० मा भर्ना भई अध्ययनरत ९३ जना विद्यार्थीहरुलाई रु ४४ लाख २८ हजार बराबरको छात्रवृत्ति रकम हस्तान्तरण गर्नुभयो ।

विद्यार्थीहरुलाई न्यून शुल्कमा प्राविधिक शिक्षा प्रदान गर्ने, सस्तो र गुणस्तरीय शिक्षा प्रदान गर्न र २१ औं शताब्दीको लागि योग्य विद्यार्थी उत्पादन गर्ने उद्देश्यले नगरपालिकाले विभिन्न विषयका कलेजहरु स्थापना गरेको बताउँदै भक्तपुर नपाबाट सञ्चालित कलेजहरु जनताको श्रम र करबाट सञ्चालित सामुदायिक कलेज भएको बताउनुभयो ।

उहाँले छात्रवृत्ति प्राप्त विद्यार्थीहरुले जहिल्यै देश र समाजप्रति उत्तरदायी बन्न प्रेरित गर्दै हाम्रो शिक्षा विदेशको सेवाको लागि हुनु नहुने तर्क गर्नुभयो । नयाँ पुस्तामा सरकारप्रति अविश्वासले गर्दा नेपाली विद्यार्थी विदेश पलायन हुने प्रवृत्ति विकास भइरहेको बताउँदै उहाँले विद्यार्थीहरुलाई परीक्षामा उत्तीर्ण मात्र होइन, आफूले अध्ययन गरेको विषयमा विशेषज्ञता हासिल गर्ने ढंगले उच्च शिक्षा अध्ययनमा जोड दिन मार्गनिर्देश गर्नुभयो ।

इन्जिनियरिङ विषयमा भ्रष्टाचार तथा आर्थिक अनियमितताका विषयहरु धेरै हुने गरेको हुँदा आफ्नो कार्यक्षेत्रमा सतर्कता अपनाएर काम गर्नुपर्ने बताउँदै उहाँले भन्नुभयो, ‘देशमा इन्जिनियरहरुको कमी छैन, इमानदार इन्जिनियरहरुको अभाव भएको हो ।’ त्यस्तै छात्रवृत्ति छनोट समितिका सदस्य एवम् भक्तपुर नपा वडा नं ९ का वडाध्यक्ष रविन्द्र ज्याख्वले विद्यार्थीहरुले आर्थिक कारणबाट उच्च शिक्षा अध्ययनबाट बञ्चित नहोऊन् भन्ने उद्देश्यले गरिब, जेहेनदार तथा अनुशासित विद्यार्थीलाई छात्रवृत्ति वितरण गर्दै आएको बताउनुभयो ।

उहाँले कलेजमा नगर बाहिरका धेरै विद्यार्थीहरु अध्ययनरत छन् भन्दै नपाले देशभरिका विद्यार्थीहरुलाई सस्तोमा गुणस्तरीय शिक्षा प्रदान गर्ने उद्देश्यले कलेज स्थापना गरेको बताउनुभयो । छात्रवृत्ति प्राप्त गरेका विद्यार्थीहरुले कलेज स्थापनाको उद्देश्य प्राप्तिका लागि थप मेहेनत गर्नुपर्ने बताउँदै नपाबाट सञ्चालिक कलेजहरुलाई अनुसन्धानको केन्द्रको रुपमा विकास गर्ने कोसिस गर्दै आएको बताउनुभयो ।

कार्यक्रममा ख्वप इन्जिनियरिङ कलेजका प्राचार्य सुजन माकले कलेजले प्रदान गर्दै आएको छात्रवृत्तिको उद्देश्य र प्रक्रियाबारे प्रष्ट पार्दै कलेजको नतिजालाई थप सुदृढ बनाउन कलेजले जोड दिँदै आएको बताउनुभयो ।

विद्यार्थीहरुको छात्रवृत्ति सुविधा नभई अवसरको रुपमा प्रदान गरिएको बताउँदै उहाँले कलेजको आचारसंहितालाई कडाइका साथ पालना गर्न विद्यार्थीलाई अनुरोध गर्नुभयो । भक्तपुर नगरपालिकाद्वारा सञ्चालित ख्वप इन्जिनियरिङ कलेजले आर्थिक वर्ष २०८१÷८२ मा कलेजमा अध्ययनरत स्नातक तहका आर्किटेक्चर, सिभिल इन्जिनियरिङ, कम्प्युटर इन्जिनियरिङ र इलेक्ट्रोनिक्स, कम्युनिकेशन एण्ड अटोमेशन इन्जिनियरिङका विद्यार्थीहरुलाई रु १ करोड ६० लाख ६९ हजार ३२६ रुपिया“ वितरण गरिएको कलेजले बताएको छ ।

त्यस्तै आर्थिक वर्ष २०८१÷८२ मा ख्वप कलेज अफ इन्जिनियरिङमा अध्ययनरत स्नातक तहका सिभिल इन्जिनियरिङ, कम्प्युटर इन्जिनियरिङ र इलेक्ट्रिकल इन्जिनियरिङका विद्यार्थीहरुलाई रु १ करोड १० लाख ५९ हजार ५३३ रुपिया“ वितरण गरिएको जनाएको छ । दुवै इन्जिनियरिङ कलेजको गरी जम्मा २ करोड ७१ लाख २८ हजार ८५९ रुपिया“ छात्रवृति रकम वितरण गरिएको छ ।

भक्तपुर, ४ साउन । भक्तपुर नगरपालिका वडा नं. ९ मा शनिबार जनप्रतिनिधि तथा कर्मचारीहरूको पारिवारिक भेटघाट कार्यक्रम सम्पन्न भएको छ। कार्यक्रममा नगर प्रमुख सुनिल प्रजापति, उपप्रमुख रजनी जोशी, पूर्ववडाध्यक्ष कृष्णभक्त लवजु, वडा अध्यक्ष रवीन्द्र ज्याख्व लगायतको सहभागिता रहेको थियो।

कार्यक्रमलाई सम्बोधन गर्दै प्रमुख प्रजापतिले नयाँ पुस्तालाई शिक्षित, सशक्त, अनुशासित र इमानदार बनाउनु नै देशको उज्ज्वल भविष्यको आधार हुने बताउनुभयो।

उहाले नेपाल मजदुर किसान पार्टी (नेमकिपा) को सिद्धान्तले जनतामा सकारात्मक प्रभाव पारेको उल्लेख गर्दै, राजनीति त्याग र समर्पणको आधारमा अघि बढ्नुपर्ने धारणा राख्नुभयो। “भक्तपुरको पहिचान नै पारदर्शिता र आर्थिक अनुशासन हो,” उहाले भन्नुभयो, “जनप्रतिनिधि र कर्मचारीहरूले समयको मूल्य बुझ्दै इमानदारीपूर्वक सेवा गर्नु अत्यन्त आवश्यक छ।”

उपप्रमुख रजनी जोशीले नेमकिपाले समाजवादी समाज स्थापनाको आधार तयार गरिरहेको र पुराना अनुभवहरू नयाँ पुस्तामा हस्तान्तरण हुनु पर्ने बताउनुभयो। विगतका त्रुटि सच्याउँदै अघि बढ्न सकेमात्र सफलता प्राप्त हुने धारणा उहाँको थियो।

पूर्ववडाध्यक्ष कृष्णभक्त लवजुले पार्टी नीति अनुसार इमानदार सेवा गर्दै आएका जनप्रतिनिधिहरूको प्रशंसा गर्नुभयो भने वडाध्यक्ष रवीन्द्र ज्याख्वले वडाको समग्र प्रगति जनप्रतिनिधि र कर्मचारीबीचको समन्वयकै परिणाम भएको बताउनुभयो।

कार्यक्रममा छोरीमैया सुजखु र रामेश्वरी किसीले पनि आफ्ना विचार प्रस्तुत गर्दै अनुभव आदान–प्रदान जस्ता कार्यक्रममा नियमितता आवश्यक रहेको धारणा राखेका थिए । 

भक्तपुर, ३० असार । भक्तपुर नगरपालिकाको आयोजनामा ११३ औं भानु जयन्ती को अवसरमा विद्यालयस्तरीय कविता लेखन तथा वाचन प्रतियोगिता सम्पन्न भएको छ। आइतबार सम्पन्न उक्त कार्यक्रममा विजयी तथा सहभागी विद्यार्थीहरूलाई पुरस्कार र प्रमाणपत्र वितरण गरिएको थियो।

कार्यक्रममा भक्तपुर नगरपालिकाका नगर प्रमुख श्री सुनिल प्रजापतिले विजेता विद्यार्थी र विद्यालयहरूलाई प्रमाणपत्र तथा पुरस्कार प्रदान गर्नुभयो। उहाँले साहित्यलाई जनताको भाषामा सरल र सहज बनाउनुपर्ने आवश्यकता औँल्याउँदै भन्नुभयो, “जनताको साहित्य आजको आवश्यकता हो। साहित्यकारको विचार बन्दुकको गोलीभन्दा पनि शक्तिशाली हुन्छ।”

उहाँले विद्यार्थीहरूलाई साहित्यकारहरूको जीवनी अध्ययन गर्न प्रेरणा दिँदै साहित्यमा समाज सेवा, देश प्रेम र परिवर्तनकारी सोचको समावेश हुनुपर्नेमा जोड दिनुभयो। साथै कल्पनाशीलता र समय व्यवस्थापन विद्यार्थीको सफलताका महत्वपूर्ण आधार भएको समेत उहाँले बताउनुभयो।

कार्यक्रमका वडाध्यक्ष श्यामकृष्ण खत्री (भक्तपुर न.पा. वडा नं. १) ले साहित्यलेखनतर्फ विद्यार्थीलाई अभिप्रेरित गर्ने उद्देश्यले प्रतियोगिता आयोजना गरिएको जानकारी दिनुभयो। उहाँले विद्यार्थीहरूमा लुकेका प्रतिभा उजागर गर्न यस्ता अतिरिक्त गतिविधिहरू महत्त्वपूर्ण हुने धारणा व्यक्त गर्नुभयो।

निर्णायकद्वय सूर्यराम श्रेष्ठ र आशाकुमार चिकंबन्जारले विद्यार्थीहरूका सिर्जनाले आफूहरू प्रभावित भएको बताउँदै साहित्य लेख्न गहिरो अध्ययन र दृष्टिकोण आवश्यक हुने सुझाव दिनुभयो।

कार्यक्रममा वडा सदस्य सूर्यप्रसाद श्रेष्ठले सहभागी विद्यार्थी र विद्यालयलाई धन्यवाद दिँदै आगामी दिनमा पनि यस्ता गतिविधिहरू जारी राख्ने प्रतिबद्धता व्यक्त गर्नुभयो।

कक्षा ५ सम्म

• छात्र:
  १. विपन खत्री (ज्ञानविजय आवि) – प्रथम
  २. निकेश भुजेल (गणेश मावि) – द्वितीय
  ३. दिपांशु श्रेष्ठ (सन्तति आवि) – तृतीय

• छात्रा:
  १. बिहानी तामाङ (सूर्यविनायक स्कुल) – प्रथम
  २. पल्लवी कार्की (सनसाइन) – द्वितीय
  ३. विविध भट्टराई (सेरफ वर्ल्ड) – तृतीय

कक्षा ६–८

• छात्र:
  १. असरव मुहवत (गणेश मावि) – प्रथम
  २. संसार अधिकारी (सन्तति आवि) – द्वितीय
  ३. जीवन चौधरी (ज्ञानविजय) – तृतीय

• छात्रा:
  १. जस्मिन क्षेत्री (ज्ञानविजय) – प्रथम
  २. एलिसा गौतम (सन्तति स्कुल) – द्वितीय
  ३. विनिसा भट्टराई (सूर्यविनायक स्कुल) – तृतीय

माध्यमिक स्तर

• प्रज्ज्वल तामाङ (गणेश मावि) – प्रथम

• स्मृति मानन्धर (गणेश मावि) – द्वितीय

भक्तपुर, २८ असार । भक्तपुर नगरपालिकाद्वारा सञ्चालित ख्वप कलेज अफ इन्जिनियरिङका दोस्रो, तेस्रो र चौथो वर्षमा अध्ययनरत ५९ जना विद्यार्थीलाई रु. २८ लाख ६४ हजार ६५८ बराबरको छात्रवृत्ति रकम वितरण गरिएको छ।

भक्तपुर नगरपालिकाका प्रमुख तथा कलेज सञ्चालक समितिका अध्यक्ष सुनिल प्रजापतिले एक विशेष समारोहका बीच छात्रवृत्ति रकम हस्तान्तरण गर्नुभएको हो। कार्यक्रममा बोल्दै प्रमुख प्रजापतिले छात्रवृत्तिको माध्यमबाट आर्थिक रूपमा कमजोर तर अध्ययनमा जेहेन्दार विद्यार्थीलाई उच्च शिक्षामा पहुँच सहज बनाउने उद्देश्य रहेको बताउनुभयो।

उहाँले भक्तपुर नगरपालिकाले सञ्चालनमा ल्याएका सात वटा कलेजमार्फत हरेक वर्ष करिब ४ करोड २५ लाख बराबरको छात्रवृत्ति प्रदान गर्दै आएको जानकारी दिनुभयो। त्यस्तै नगरपालिकाले सहुलियत दरमा शैक्षिक ऋणको व्यवस्था समेत गरिरहेको उल्लेख गर्दै उहाँले देशमा दक्ष जनशक्ति उत्पादन गर्दै उनीहरूलाई देशमै समर्पित गराउनुपर्नेमा जोड दिनुभयो।

विदेश पलायन बढ्दै जाँदा देशको सम्भावना पछाडि धकेलिएको उल्लेख गर्दै उहाँले युवालाई आत्मसन्तुष्टिपूर्ण सेवा स्वदेशमै गर्न आह्वान गर्नुभयो। कृषि, स्वास्थ्य र सुशासनका विषयमा समेत बोल्दै उहाँले सरकारको बजेट, योजनामा तथ्यपरकता र दीर्घकालीन सोचको अभाव रहेको आलोचना गर्नुभयो।

साथै, भ्रष्टाचारमा प्राविधिक संलग्नता बढ्दै गएको भन्दै इन्जिनियर विद्यार्थीलाई नैतिकता र सामाजिक उत्तरदायित्वको भावना साथ सेवा गर्न आग्रह गर्नुभयो। कार्यक्रममा वडा नं. ९ का अध्यक्ष तथा छात्रवृत्ति सिफारिस समितिका संयोजक रविन्द्र ज्याख्व, कलेजका प्राचार्य ई. सुनिल दुवाल, लेखा प्रमुख काजीबहादुर पञ्च लगायतको उपस्थिति रहेको थियो।

प्राचार्य दुवालले कलेजले आर्थिक रूपमा कमजोर विद्यार्थीको लागि छात्रवृत्तिको व्यवस्था गर्दै आएको र विद्यार्थीहरूले सदाचार, इमान्दारिता र कार्यक्षमताको उदाहरण प्रस्तुत गर्दै आएका कुरा उल्लेख गर्नुभयो। छात्रवृत्ति प्राप्त गरेका विद्यार्थीहरूलाई देश र जनताको सेवामा समर्पित भई अगाडि बढ्न आग्रह गर्दै कार्यक्रम समापन गरिएको थियो।

भक्तपुर,  १८ असार । भक्तपुर नगरपालिकालाई ‘पूर्ण खोप सुनिश्चित पालिका’ घोषणा गरिएको छ। बिहीबार एक विशेष कार्यक्रममा नगर प्रमुख सुनिल प्रजापतिले उक्त घोषणा गर्नुभयो। घोषणासँगै उहाँले सरकारले प्रमाणित गरेका सबै खोपहरू सर्वसाधारणको पहुँचमा पु‍र्‍याउन थप प्रयास गर्नुपर्ने बताउनुभयो।

कोभिड महामारीले खोपको महत्व झनै गम्भीर रूपमा बोध गराएको उल्लेख गर्दै उहाँले खोप बेवास्ता गर्नु स्वास्थ्यप्रति लापरवाही हुने धारणा व्यक्त गर्नुभयो। कार्यक्रममा उपप्रमुख रजनी जोशीले स्वस्थ नयाँ पुस्ता निर्माणका लागि खोपको भूमिका अत्यन्त महत्त्वपूर्ण रहेको बताउनुभयो।

उहाँले स्वस्थ र सभ्य समाजको निर्माणमा सबैको हातेमालो अपरिहार्य रहेको पनि उल्लेख गर्नुभयो।जनस्वास्थ्य कार्यालय, भक्तपुरकी प्रमुख अन्जना खड्काले घोषणा सफल बनाउन सहयोग गर्ने सबैप्रति आभार प्रकट गर्दै भक्तपुर जिल्लाका चारवटै नगरपालिका—भक्तपुर, मध्यपुर ठिमी, चाँगुनारायण र सूर्यविनायक अब पूर्ण खोप सुनिश्चित पालिकाको रूपमा प्रमाणित भइसकेको जानकारी दिनुभयो।

कार्यक्रममा प्रमुख प्रजापतिलाई जनस्वास्थ्य कार्यालय प्रमुख अन्जना खड्काले खोप सुनिश्चितताको प्रमाणपत्र हस्तान्तरण गर्नुभयो। प्रमुख प्रजापतिले १० वटै वडाका वडाध्यक्षहरूलाई प्रमाणपत्र प्रदान गर्नुभयो।

कार्यक्रममा नगरपालिकाका प्रमुख प्रशासकीय अधिकृत वसन्त भट्टराईले स्वागत मन्तव्य दिनुभयो। त्यस्तै, खोप फोकल पर्सन कमलकेशरी राजचलले नियमित खोप, पूर्ण खोप सुनिश्चितता र दिगोपनाबारे तथ्यांकसहित प्रस्तुति दिनुभयो।