- ४ आश्विन २०८३, आईतवार / Sep 20, 2026
नुवाकोट, ४ असाेज । बाढीका कारण त्रिशूली अस्पताल जोड्ने पुल बगेर सम्पर्कविच्छेद भएपछि नुवाकोटका नागरिकलाई आकस्मिक स्वास्थ्य सेवा तथा मातृ सुरक्षा सेवा उपलब्ध गराउन बागमती प्रदेश सरकारले काम अघि बढाएको छ ।
खुट्टा भाँचिएर चिकित्सकले पूर्ण आराम गर्न सल्लाह दिए पनि बागमती प्रदेश स्वास्थ्य तथा सामाजिक विकास मन्त्रालय सचिव डा. सुमित्रा गौतम विपद् प्रभावित क्षेत्रको स्थलगत अनुगमनमा आफैँ खटिनुभएको छ । स्वास्थ्य सेवाको निरन्तरता र प्रभावित नागरिकलाई तत्काल उपचारको व्यवस्था गर्नुपर्ने आवश्यकतालाई ध्यानमा राख्दै डा. गाैतम नेतृत्वको टोली नुवाकोटमा सक्रिय भएको हो ।
२०८३ भदौ १० गते बाढीको सूचना प्राप्त हुनासाथ प्रदेश सरकारअन्तर्गतका इमर्जेन्सी मेडिकल टिम (EMT) तथा र्यापिड रेस्पोन्स टिम (RRT) लाई तत्काल परिचालन गरिएको सचिव गौतमले जानकारी दिनुभयो । उहाँका अनुसार काठमाडौँ उपत्यकाका टोखा चण्डेश्वरी अस्पताल, बज्र बाराही अस्पताल र भक्तपुर अस्पतालका मेडिकल टिमलाई सूचना प्राप्त भएको करिब तीन घण्टाभित्र नुवाकोट पुर्याएर आकस्मिक स्वास्थ्य सेवा सुरु गरिएको थियो ।
त्रिशूली अस्पताल जोड्ने मुख्य पुल बगेर सम्पर्कविच्छेद भएपछि वारि विदुर क्षेत्रमा रहेका नागरिकका लागि वैकल्पिक स्वास्थ्य सेवा व्यवस्था गर्न अस्थायी बर्थिङ सेन्टर र इमर्जेन्सी बेसिक हेल्थ सर्भिस सेन्टर (EBHSC) स्थापना गर्ने तयारी अघि बढाइएको छ ।
आफ्नो स्वास्थ्यको समेत पर्वाह नगरी नागरिकको स्वास्थ्य र जीवनरक्षालाई प्राथमिकतामा राखेर आफूहरू निरन्तर फिल्डमा खटिइरहेको सचिव डा. सुमित्रा गौतमले बताउनुभयो । विपद्को समयमा प्रभावित नागरिकले तत्काल स्वास्थ्य सेवा पाउने वातावरण बनाउन प्रदेश सरकारका स्वास्थ्य टोलीहरू आवश्यकताअनुसार निरन्तर परिचालन भइरहेको उहाँले जानकारी दिनुभयो ।
