- १८ कार्तिक २०८३, बुधबार / Nov 4, 2026
सुनसरी, ४ असाेज । युवतीको विषयमा भएको विवादले सुनसरीको देवानगञ्जमा गोली चलेको छ । गोली लागेर १९ वर्षीय नीरजकुमार यादव घाइते भएका छन् । विराटनगरस्थित नोबेल अस्पतालमा उपचारका क्रममा उनको दायाँ खुट्टाबाट चिकित्सकहरूले गोली निकालेका छन् ।
देवानगञ्ज गाउँपालिका–१ कप्तानगञ्जका स्थानीय यादवलाई शनिबार साँझ गोली प्रहार भएको हो । उनको दायाँ खुट्टाको माथिल्लो भागमा गोली लागेको थियो ।घटनामा संलग्न भएको आरोपमा प्रहरीले दुई जनालाई पक्राउ गरेको छ । पक्राउ पर्नेमा देवानगञ्ज–२ का जयकिशोर यादव र विष्णुकुमार यादव रहेका छन् । जयकिशोर यादवलाई ‘लाली’ भनेर चिनिने प्रहरीले जनाएको छ ।
घटनामा संलग्न अन्य चार जना फरार रहेको जिल्ला प्रहरी कार्यालय सुनसरीका डीएसपी चन्द्र खड्काले जानकारी दिनुभयो । फरार व्यक्तिहरूको पहिचान खुलेको र उनीहरूको खोजी भइरहेको प्रहरीले जनाएको छ ।
प्रहरीको प्रारम्भिक अनुसन्धानअनुसार युवतीको विषयमा भएको विवादका क्रममा गोली प्रहार भएको देखिएको छ । घटनाको वास्तविक कारणबारे थप अनुसन्धान भइरहेको डीएसपी खड्काले बताउनुभयो ।
प्रहरीका अनुसार गोली प्रहार गर्ने व्यक्ति र घाइते यादव पूर्वपरिचित हुन् । घटनास्थल तथा पक्राउ परेका व्यक्तिहरूबारे थप अनुसन्धान भइरहेको प्रहरीले जनाएको छ । घाइते यादवको शरीरबाट निकालिएको बुलेट परीक्षण गरिने भएको छ । उक्त परीक्षणपछि गोली कुन हतियारबाट प्रहार भएको थियो भन्ने विषयमा थप तथ्य खुल्ने प्रहरीले जनाएको छ ।
