- १९ कार्तिक २०८३, बिहीबार / Nov 5, 2026
क्यान्सर र मुटु रोगको उपचारमा सहुलियत दिन १८ अस्पतालसँग सम्झौता ।
मुटु रोगका लागि ३ अस्पतालसँग सम्झौता ।
क्यान्सर उपचारका लागि १३ सूचीकृत अस्पतालसँग सम्झौता ।
स्वास्थ्य मन्त्रालय र सम्बन्धित अस्पतालका प्रतिनिधिबीच सम्झौता ।
प्रदेशका बिरामीले तोकिएका अस्पतालबाट सहुलियतपूर्ण उपचार पाउने ।
काठमाडौं, ३ असाेज । बागमती प्रदेश सरकारको स्वास्थ्य तथा सामाजिक विकास मन्त्रालयले क्यान्सर र मुटु रोगका बिरामीहरूलाई उपचारमा सहुलियत उपलब्ध गराउन विभिन्न १८ वटा अस्पतालहरूसँग सम्झौता गरेको छ।
प्रदेशका स्वास्थ्य तथा सामाजिक विकास मन्त्री गिरबहादुर तामाङको उपस्थितिमा मन्त्रालयका स्वास्थ्य सचिव र सम्बन्धित अस्पतालका प्रतिनिधिहरूबीच उक्त सम्झौता पत्रमा हस्ताक्षर सम्पन्न भएको हो।
मुटु रोगको उपचारका लागि: शहीद गङ्गालाल राष्ट्रिय हृदय केन्द्र, मनमोहन कार्डियोभास्कुलर ट्रान्सप्लान्ट सेन्टर र भरतपुर अस्पतालसँग सम्झौता गरिएको छ।क्यान्सर रोगको उपचारका लागि: सूचीकृत अन्य विभिन्न १३ वटा अस्पतालहरूसँग सम्झौता गरिएको छ।
कार्यक्रममा बोल्दै स्वास्थ्य तथा सामाजिक विकास मन्त्री गिरबहादुर तामाङले प्रदेश सरकारले सहुलियत दिएपछि बिरामीहरूले कुनै पनि झन्झटविना सहज र छिटो-छरितो रूपमा क्यान्सर तथा मुटु रोगको उपचार सेवा पाउनुपर्नेमा जोड दिनुभयो।
अस्पतालहरूलाई उपलब्ध गराइने सोधभर्ना रकम (अनुदान) प्रदेश सरकारले समयमै उपलब्ध गराउने प्रतिबद्धता जनाउँदै मन्त्री तामाङले भन्नुभयो, “बिरामीले पाउने सेवा सहज हुनुपर्यो, सोधभर्नाको पैसा हामी समयमै भुक्तानी गर्छौँ। यो सम्झौता सफल भएमा आगामी दिनमा अन्य क्षेत्रमा पनि सहकार्य बढाएर लैजान सकिन्छ।”
मन्त्रालय सचिव डा. सुमित्रा गौतमले सम्झौतासँगै बागमती प्रदेशभित्रका क्यान्सर तथा मुटु रोगका बिरामीले तोकिएका अस्पतालबाट निर्धारित सहुलियत तथा उपचार सेवा सहज रूपमा प्राप्त गर्न सक्ने जानकारी दिनुभयाे ।
सम्झौतापछि तोकिएका अस्पतालबाट बिरामीले प्रदेश सरकारले निर्धारण गरेको मापदण्डअनुसार सहुलियतपूर्ण उपचार सेवा प्राप्त गर्न सक्ने मन्त्रालयले जनाएको छ ।
