दुवाकोट, २८ चैत । चाँगुनारायण नगरपालिकाले आफ्ना वडाहरूमा आगलागी सुरक्षा सम्बन्धी अभिमुखीकरण र अग्नि नियन्त्रण अभ्यास प्रदर्शन कार्यक्रम शुरू गरेको छ। यो कार्यक्रम जुद्ध बारुणयन्त्र कार्यालय भक्तपुरको प्राविधिक सहयोग, नेपाल रेडक्रस सोसाइटी भक्तपुर शाखाको सहकार्य र वडास्तरीय विपद् व्यवस्थापन समितिको समन्वयमा सञ्चालित छ।

सुख्खा मौसम र गर्मीका कारण आगलागीका घटना बढिरहेको अवस्थामा समुदायमा सचेतना फैलाउन यो कार्यक्रम आयोजना गरिएको नगरप्रमुख जीवन खत्रीले बताए। उनले सम्भावित विपद् रोकथाम र जोखिम कम गर्न नगरपालिकाले यस्ता सचेतनामूलक कार्यक्रमलाई निरन्तरता दिइरहेको उल्लेख गरे।

नगरपालिकाका प्रमुख प्रशासकीय अधिकृत शिवप्रसाद हुमेगाईंले गत वर्षको मनसुन पूर्वतयारी तथा प्रतिकार्य योजनालाई अद्यावधिक गरी मनसुनजन्य विपद्बाट नगरवासीलाई जोगाउन प्रभावकारी योजना लागू गर्ने बताए।

त्यसैगरी कार्यक्रम वडा नं. ४ मा वडाध्यक्ष रोजबहादुर तामाङ, वडा नं. ५ मा जयन्द्र खड्का, वडा नं. ७ मा श्यामकृष्ण नयाँजु श्रेष्ठ, वडा नं. ८ मा कार्यवाहक वडाध्यक्ष अनिता परियार र वडा नं. १ मा सिजन कार्कीको अध्यक्षतामा सम्पन्न भयो। वडाध्यक्षहरूले यस्ता कार्यक्रमले आगलागी रोकथाम र नियन्त्रणमा जनचेतना फैलाउन सहयोग पुग्ने बताए। अभिमुखीकरणमा वडा सदस्य, ज्येष्ठ नागरिक, युवा, महिला, स्वयंसेवक र कर्मचारीहरू सहभागी थिए।

कार्यक्रममा सहभागीहरूले ग्यास सिलिन्डर चुहावटबाट हुने आगलागीले ठूलो क्षति निम्त्याउने भन्दै यो कार्यक्रमले रोकथाम र नियन्त्रणमा सहजता ल्याउने बताए। उनीहरूले आगलागी, चट्याङ, सडक दुर्घटना, महामारी र भूकम्पजस्ता विपद्बाट बच्ने उपायबारे सञ्चारमाध्यम र सामाजिक सञ्जालमार्फत सचेतना फैलाएकोमा नगरपालिकालाई धन्यवाद दिए।

वन, वातावरण तथा विपद् व्यवस्थापन समिति संयोजक सोम प्रधानले सरकारी र गैरसरकारी संस्थाहरूसँग सहकार्य गरी विपद् जोखिम न्यूनीकरणका कार्यक्रम सञ्चालन भइरहेको बताए। उनले नगरपालिकाले प्राथमिक उपचार र खोज उद्धारमा दक्ष स्वयंसेवक तयार गरेको जानकारी दिए।

त्यस्तै योजना शाखा प्रमुख अनुप लामिछानेका अनुसार चैत २४ बाट शुरू भएको यो कार्यक्रम सबै वडामा क्रमशः सञ्चालन हुने बताए । अभिमुखीकरणमा आगलागीका कारण, नियन्त्रणका उपाय र स्थानीय स्रोत प्रयोग गरी आगो निभाउने तरिकाबारे सैद्धान्तिक र व्यवहारिक ज्ञान दिइएकाे थियाे । साथै, फायर एक्स्टिंग्विसरको प्रयोग पनि सिकाएकाे थियाे । 

वडा नं. ७ मा भएको कार्यक्रममा नेपाल रेडक्रस सोसाइटी भक्तपुर शाखाका कोषाध्यक्ष प्रदिपकुमार केसीले नगरपालिकासँगको सहकार्यमा विपद् जोखिम न्यूनीकरणका गतिविधि सञ्चालन भइरहेको बताए। विपद् व्यवस्थापन इकाई प्रमुख दिनेश थापाले प्रत्येक समुदायमा प्रथम उद्धारकर्ता टोली तयार गर्नुका साथै विद्यालय र समुदायमा सचेतना कार्यक्रम चलाइरहेको जानकारी दिए।

कार्यक्रममा दिनेश थापा, राजकुमार लम्साल, दिवाकर पौडेल, सञ्जय अवाल, रेडक्रसबाट ऋषि खड्का, जुद्ध बारुणयन्त्रबाट सानुराम दाहाल, अनिल कपाली, मुनाल ढकाल र अमन सिंख्वालले सैद्धान्तिक र प्रयोगात्मक प्रदर्शन गरे।

भक्तपुर, १९ चैत । गत चैत १५ मा राजावादी समूहको आन्दोलनका क्रममा एभिन्युज टेलिभिजनका पत्रकार सुरेश रजकको आगजनीमा ज्यान गएको घटना र मिडिया क्षेत्रमा भएको तोडफोड तथा आगजनीको विरोधमा भक्तपुरका सबै पत्रकार संगठनहरू एकजुट भएका छन्। नेपाल पत्रकार महासंघ भक्तपुर शाखाले आयोजना गरेको अन्तरक्रिया कार्यक्रममा विभिन्न पत्रकार संघ-संगठनका प्रतिनिधिहरूले महासंघको आन्दोलनप्रति ऐक्यबद्धता जनाउँदै दोषीमाथि कडा कारबाहीको माग गरेका छन्।

कार्यक्रममा महासंघ भक्तपुरका अध्यक्ष सुन्दर शिल्पकारले पत्रकार रजकको हत्या र मिडिया क्षेत्रमा भएको आक्रमणका दोषीलाई कारबाहीको दायरामा नल्याएसम्म आन्दोलन जारी राख्ने बताए। उनले सुरेश रजकको परिवारलाई उचित क्षतिपूर्ति र सहिद घोषणाको माग पनि राखे। “कान्तिपुर टेलिभिजन, अन्नपूर्ण पोस्टलगायतका मिडिया कार्यालयमा भएको तोडफोड र आगजनी निन्दनीय छ। दोषीलाई तत्काल कानुनी कठघरामा उभ्याउनुपर्छ,” उनले भने।

नेपाल प्रेस युनियन भक्तपुरका अध्यक्ष रोशन शिल्पकारले आन्दोलनलाई सशक्त बनाउन सडकमै उत्रनुपर्ने जोड दिए। “बन्द कोठामा बसेर होइन, सडक तताएर विरोध गर्नुपर्छ। प्रेस युनियन महासंघको हरेक आन्दोलनमा बलियो साथ दिन्छ,” उनले प्रतिबद्धता व्यक्त गरे। त्यसैगरी प्रेस चौतारीका सचिव नारायण थापाले पत्रकार रजकको हत्यामा संलग्नलाई कानुनी दायरामा ल्याउन ढिलाइ भए भविष्यमा पत्रकारमाथि यस्ता हमला बढ्ने चेतावनी दिए । यस्तै, प्रेस सेन्टर नेपालका अध्यक्ष मदन ढुंगानाले घटनाको प्रमाण सामाजिक सञ्जालमा स्पष्ट देखिँदा पनि सरकारले पाँच दिनसम्म दोषीमाथि कारबाही गर्न नसकेकोमा आपत्ति जनाए।

त्यस्तै जनजाति पत्रकार महासंघ भक्तपुरका सचिव दीपक श्रेष्ठ र नेवा पत्रकार राष्ट्रिय दबुका रामगोपाल तमखुले पनि महासंघको आन्दोलनमा सक्रिय सहभागिता जनाउने बताए। क्रियाशील पत्रकार मञ्चका अध्यक्ष रमेश गिरीले रजकले चार महिनादेखि तलब नपाएको खुलासा गर्दै मिडिया मालिकको पनि जवाफदेहीता खोज्नुपर्ने बताए । “संविधानले प्रेस स्वतन्त्रता सुरक्षित गरेको छ। यो विपरीत काम गर्नेलाई कारबाही हुनुपर्छ,” उनले भने।

राष्ट्रिय सञ्चार केन्द्रका अध्यक्ष पेसल आचार्यले सामाजिक सञ्जालमा फैलिएका भ्रामक भिडियोप्रति चिन्ता व्यक्त गर्दै घटनाको सत्यतथ्य छानबिन गर्नुपर्ने बताए। “प्रहरीले नै हत्या गरेको भन्ने भिडियो आएका छन्। पोस्टमार्टमबिना यस्ता दाबीले भ्रम फैलाउँछ। सरकारले दोषी पत्ता लगाएर कारबाही गरोस्,” उनले माग गरे।

महासंघ भक्तपुरका पूर्व अध्यक्ष एवम् सल्लाहकार पुष्करराज बुढाथोकीले पत्रकारको पेशागत हक र सुरक्षाका लागि जस्तोसुकै लडाइँ लड्न तयार रहनुपर्ने बताए। कार्यक्रममा महासंघ भक्तपुरका कार्यसमिति सदस्य र विभिन्न संघ-संगठनका प्रतिनिधिहरू सहभागी थिए। भक्तपुरका पत्रकारहरूले सुरेश रजकको हत्या र मिडिया क्षेत्रमाथिको आक्रमणविरुद्ध एकजुट भएर आवाज उठाउने प्रतिबद्धता जनाएका छन् ।

भक्तपुर, १८ चैत । नेपाल पत्रकार महासंघ भक्तपुर शाखाले चैत १५ गते काठमाडौंको तीनकुनेमा भएको हिंसात्मक प्रदर्शनमा पत्रकार सुरेश रजकको हत्या र सञ्चारमाध्यममाथिको आक्रमणको विरोधमा सोमबार जिल्ला प्रशासन कार्यालय अगाडि धर्ना दिएको छ। प्रदर्शनका क्रममा रजक आगलागीमा जलेर मारिएका थिए ।

आन्दोलनकारीहरुले अन्नपूर्ण पोष्ट र कान्तिपुर टेलिभिजनको कार्यालयमा आगजनी र तोडफोड गरेका थिए । त्यस्तै हिमालयन टेलिभिजनको सवारीमा क्षति, फाेटाे खिचैकै भरमा पत्रकार दिनेश गौतममाथि हातपात गर्दा खुट्टा भाँचिएको थियाे भने फोटो पत्रकार निराज तामाङको क्यामेरा हराएको थियो।

महासंघले प्रमुख जिल्ला अधिकारीमार्फत सरकारलाई ज्ञापनपत्र बुझाउँदै हत्याको गहिरो अनुसन्धान गरी दोषीलाई फौजदारी अभियोगमा कारबाही गर्न माग गरेकाे छ । त्यस्तै स्वर्गीय पत्रकार रजकको परिवार र क्षतिग्रस्त सञ्चारगृहलाई क्षतिपूर्तिकाे समेत माग गरेकाे छ । आन्दोलनकारी क्रममा घाइते पत्रकारको उपचार र प्रेस स्वतन्त्रताको सुरक्षाको माग गरेको छ।

त्यसैगरी विगतका प्रेस तथा अभिव्यक्ति स्वतन्त्रा हननका घटनामा संलग्नलाई पनि कानूनी कारबाही गर्न माग गरिएको छ। एक साताभित्र माग पूरा नभए देशव्यापी आन्दोलन गर्ने चेतावनी महासंघले दिएको छ।