काठमाडौं, २९ चैत । काठमाडौंको तीनकुनेमा भएको प्रदर्शनबाट फरार भएका मेडिकल व्यवसायी दुर्गा प्रसाईँलाई भारतीय प्रहरीको सहयोगमा आसामबाट पक्राउ गरिएको छ। उनलाई झापाको भद्रपुर विमानस्थल हुँदै काठमाडौँ ल्याउने प्रहरीको तयारी छ। प्रसाईँका समर्थकहरू काँकडभिट्टा नाकामा भेला भएर अवरोध गर्न सक्ने आकलनका आधारमा प्रहरीले नाका परिवर्तन गरेको हो । 

चैत १५ मा प्रसाईँको नेतृत्वमा ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’ ले तीनकुनेमा प्रदर्शन गरेको थियो। पूर्वराजाको पक्षमा आयोजित उक्त प्रदर्शनमा नवराज सुवेदीको ‘राजसंस्था पुनर्स्थापनाका लागि संयुक्त जनआन्दोलन समिति’ पनि सहभागी थियो। सुवेदीलाई गौरीघाटस्थित उनकै घरमा नजरबन्द गरिएको छ।

प्रदर्शनपछि फरार भएका प्रसाईँ भारत पुगेका थिए। त्यहाँबाट उनले सामाजिक सञ्जालमा दुईवटा भिडियो सन्देश जारी गर्दै आफू नेपालमै रहेको र ‘जोगिएर’ बसेको दाबी गरेका थिए। तर, प्रहरी स्रोतका अनुसार उनी आसाममा एक स्थानीय नेताको घरमा लुकेर बसेका थिए।

प्रहरीले प्रसाईँविरुद्ध राज्यविरुद्धको कसुर र सङ्गठित अपराधमा मुद्दा चलाउने तयारी गरेको छ।