काठमाडौँ, १८ असाेज । शुक्रवार बेलुकीदेखि परेको पानीका कारण काठमाडौँ उपत्यकाको जनजीवन अस्तव्यस्त बनेको छ। जल तथा मौसम विज्ञान विभाग, मौसम पूर्वानुमान महाशाखाका अनुसार आज बिहानदेखि वर्षाको मात्रा अझ बढेको छ।

अहिले पछिल्लो एक घण्टामै काठमाडौँमा ६ मिलिमिटर, ललितपुरमा ९.८ मिलिमिटर र भक्तपुरमा ५ मिलिमिटर वर्षा भएको विभागले जनाएको छ। लगातारको वर्षाले सडकमा पानी जमेको, ट्राफिक प्रभावित र यात्रुहरूलाई आवतजावतमा समस्या भएको छ।

उपत्यकासँगै तराईका विभिन्न स्थानमा पनि वर्षा भइरहेको विभागले जानकारी दिएको छ। पछिल्लो एक घण्टामा पर्सामा १० मिलिमिटर र रौतहटमा १०.६ मिलिमिटर वर्षा भएको छ भने महोत्तरी र धनुषासम्म निरन्तर वर्षा भइरहेको उल्लेख गरिएको छ।

पछिल्लो १२ घण्टामा भने सबैभन्दा बढी वर्षा कैलालीको गर्भा क्षेत्रमा ८३.२ मिलिमिटर रेकर्ड भएको विभागले जनाएको छ। त्यसैगरी १२ घण्टाको अवधिमा पर्सामा ४० मिलिमिटर र बारामा २८ मिलिमिटर वर्षा भएको छ।

जल तथा मौसम विज्ञान विभागले आज र भोलि पनि देशका धेरै स्थानमा भारीदेखि अति भारी वर्षा हुन सक्ने चेतावनी जारी गरेको छ। विभागले नदी तटीय क्षेत्रका बासिन्दालाई सचेत रहन र सावधानी अपनाउन आग्रह गरेको छ।

काठमाडौं, १७ असोज । काठमाडौं जिल्ला प्रशासन कार्यालयले आगामी केही दिनहरूमा सम्भावित भारी वर्षाको पूर्वानुमानलाई ध्यानमा राख्दै नागरिकहरूलाई विशेष सतर्कता अपनाउन आग्रह गरेको छ । असोज १७ गतेदेखि २० गतेसम्म देशभर, विशेषगरी जोखिमयुक्त क्षेत्रमा बाढी, पहिरो तथा भू–क्षयको सम्भावना रहेकाले प्रशासनले अनावश्यक यात्रा नगर्न सुझाव दिएको हो ।

जिल्ला प्रशासन कार्यालयले अत्यावश्यक काम नभएमा लामो दूरीको यात्रा नगर्न र विशेष गरी रातिको समयमा काठमाडौँबाट बाहिरिने वा बाहिरबाट काठमाडौँ प्रवेश गर्ने यात्रुहरूलाई सावधानी अपनाउन अनुरोध गरेको छ । रातिमा यात्रा गर्दा संभावित जोखिम झनै बढ्ने भएकाले सकभर दिनको समयमा यात्रा गर्न प्रशासनको आग्रह छ । साथै, कुनै पनि विपद् वा आकस्मिक अवस्थाको खण्डमा तत्काल उद्धार, राहत र सहयोगका लागि सम्पर्क गर्न सकिने आपतकालीन नम्बरहरू समेत प्रशासनले सार्वजनिक गरेको छ ।

त्यसैगरी नेपाल सरकारले पनि मौसमसम्बन्धी जानकारीमा नियमित अपडेट लिन र सुरक्षित स्थानमा बस्न समेत अनुरोध गरेको छ ।

काठमाडौँ । हाल मनसुनको न्यूनचापीय रेखा सरदर स्थान आसपास अवस्थित छ। अरब सागर तथा बंगालको खाडीबाट जलवाष्पयुक्त हावाको प्रभाव देखिएकाले मौसममा उतारचढाव भएको मौसम पूर्वानुमान महाशाखाले जनाएको छ।

हाल देशका पहाडी भूभागमा सामान्यतया बदली रही बाँकी भूभागमा आंशिक बदली रहेको छ। कोशी, बागमती र सुदूरपश्चिम प्रदेशका केही स्थानमा तथा अन्य प्रदेशका थोरै स्थानमा हल्कादेखि मध्यम वर्षा भइरहेको छ।

दिउँसो देशभर सामान्यतया बदली रहनेछ। कोशी, बागमती, गण्डकी, लुम्बिनी र सुदूरपश्चिम प्रदेशका केही स्थानमा मध्यम वर्षा र कोशी, मधेश, बागमती, लुम्बिनी र सुदूरपश्चिम प्रदेशका पहाडी तथा तराई भूभागका एक-दुई स्थानमा भारी वर्षा हुने सम्भावना छ।

राति पनि देशभर सामान्यतया बदली रहने पूर्वानुमान छ। कोशी, मधेश, बागमती, गण्डकी र लुम्बिनी प्रदेशका थोरै स्थानमा तथा अन्य भूभागका एक-दुई स्थानमा मध्यम वर्षा हुने सम्भावना छ।

काठमाडौं, १ भद्र । देशका विभिन्न स्थानमा आज भारी वर्षा हुने सम्भावना रहेको जल तथा मौसम विज्ञान विभागले जनाएको छ । धेरै स्थानमा मध्यम वर्षा हुने देखिएको छ ।

विभागका अनुसार दिउँसो देशभर सामान्यतया बदली रहनेछ । वाग्मती र लुम्बिनी प्रदेशलगायत देशका पहाडी भूभागका केही स्थानमा र बाँकी भूभागका थोरै स्थानमा मध्यम वर्षा हुने सम्भावना छ । कोसी, वाग्मती र कर्णाली प्रदेशका पहाडी भूभाग तथा लुम्बिनी प्रदेशका तराईका एक-दुई स्थानमा भारी वर्षा हुन सक्ने चेतावनी विभागले दिएको छ ।

राति कोसी, मधेस, वाग्मती र गण्डकी प्रदेशलगायत पहाडी भूभागमा सामान्य बदली रहनेछ भने बाँकी भूभागमा आंशिक बदली मात्र रहने विभागले जनाएको छ । मधेस प्रदेशसँगै कोसी, वाग्मती र गण्डकी प्रदेशका पहाडी केही स्थान तथा बाँकी भूभागका थोरै स्थानमा मध्यम वर्षा हुने देखिन्छ ।

मधेस, कोसी र वाग्मतीका पहाडी भूभागका एक-दुई स्थानमा भारी वर्षा हुने सम्भावना रहेको विभागको अनुमान छ । हाल मनसुनको न्यूनचापीय रेखा सरदर स्थान आसपासमा रहेको र अरब सागर तथा बंगालको खाडीबाट जलवाष्पयुक्त हावा नेपालमा प्रवेश गरिरहेको कारण वर्षा भइरहेको विभागले जनाएको छ ।

काठमाण्डौ, १८ भाद्र । देशभर आज साधारणतया बदली मौसम रहँदैछ। जल तथा मौसम पूर्वानुमान महाशाखाका अनुसार आज पहाडी केही ठाउँ र तराईका थोरै स्थानमा मध्यम वर्षा हुने सम्भावना छ।

आज राति भने कोशी प्रदेशको तराई क्षेत्र र बागमती प्रदेशको पहाडी एक/दुई स्थानमा ठूलो (भारी) वर्षा पर्न सक्ने पूर्वानुमान गरिएको छ। बिहानै काठमाण्डौ उपत्यकासहित देशका धेरै भागमा घाम लागे पनि दिउँसो र बेलुकी वर्षा बढ्न सक्ने देखिन्छ।

गएराति देशका कतिपय स्थानमा ठूलो वर्षा भएको छैन। पछिल्ला ६ घण्टामा भने सिन्धुपाल्चोकसहित केही ठाउँमा हल्कादेखि मध्यम वर्षा भएको छ। सिन्धुपाल्चोकको चन्द्रकु जलमापन केन्द्रमा १५.६ मिलिमिटर वर्षा रेकर्ड गरिएको छ, जुन सबैभन्दा बढी हो।

महाशाखाका अनुसार वर्षा मापनका आधार:

१० मिलिमिटरभन्दा कम – हल्का वर्षा, १०–५० मिलिमिटर – मध्यम वर्षा,५०–१०० मिलिमिटर – ठूलो (भारी) वर्षा मानिन्छ।

काठमाडौँ, १२ भाद्र । मनसुनको न्यूनचापीय रेखा सरदर स्थानको आसपासमा रहेकाले आज देशका विभिन्न स्थानमा वर्षा हुने मौसम पूर्वानुमान महाशाखाले जनाएको छ।

महाशाखाका अनुसार बिहानैदेखि कोशी, मधेश र बागमती प्रदेशलगायत देशका पहाडी भूभागमा सामान्यतया बदली रही बाँकी भूभागमा आंशिक बदली छ। बागमती र गण्डकी प्रदेशका पहाडी भूभागका केही स्थानमा तथा कोशी, मधेश र लुम्बिनी प्रदेशका एक–दुई स्थानमा हल्कादेखि मध्यम वर्षा भइरहेको छ।

दिउँसो बागमती, गण्डकी, लुम्बिनी र सुदूरपश्चिम प्रदेशसहित देशका पहाडी भूभागमा सामान्यतया बदली रहनेछ। यी प्रदेशका केही स्थानमा र बाँकी भूभागका थोरै स्थानमा मध्यम वर्षा हुने सम्भावना छ। विशेषगरी लुम्बिनी प्रदेशको तराई, सुदूरपश्चिम प्रदेश र कर्णाली प्रदेशका पहाडी भूभागका एक–दुई स्थानमा भारी वर्षा हुनसक्ने महाशाखाले चेतावनी दिएको छ।

यस्तै, राति देशभर सामान्यतया बदली रहनेछ। देशका पहाडी भूभागका धेरै स्थानमा र बाँकी भूभागका थोरै स्थानमा मध्यम वर्षा हुने पूर्वानुमान छ। गण्डकी, कर्णाली र सुदूरपश्चिम प्रदेशका पहाडी भूभाग र कोशी तथा लुम्बिनी प्रदेशका तराईका एक–दुई स्थानमा भारी वर्षा हुने सम्भावना रहेको महाशाखाले जनाएको छ।

मौसमविद्हरूले वर्षाका कारण भौतिक संरचना, कृषि, यातायात र जनजीवनमा असर पर्न सक्ने भन्दै सतर्कता अपनाउन सबैलाई आग्रह गरेका छन्।

काठमाडौँ, ३  भाद्र ।  न्यूनचापीय रेखा सरदर स्थानको दक्षिणतर्फ अवस्थित रहेकाले नेपालमा मनसुन केही कमजोर छ। मौसम पूर्वानुमान महाशाखाका अनुसार बङ्गालको खाडीबाट भित्रिएको जलवाष्पयुक्त हावाको आंशिक प्रभावले कोशी, मधेश, बागमती र कर्णाली प्रदेशमा साधारणतया बदली रही बाँकी भूभागमा आंशिक बदली छ।

कोशी, बागमती, गण्डकी र लुम्बिनी प्रदेशको थोरै स्थानमा मध्यम वर्षा तथा कर्णाली र मधेश प्रदेशका एकदुई स्थानमा हल्का वर्षा भइरहेको छ। दिउँसो कोशी, बागमती, गण्डकी, लुम्बिनी, कर्णाली र सुदूरपश्चिमका पहाड र तराईका केही तथा मधेश प्रदेशको तराईको एकदुई स्थानमा मध्यम वर्षाको सम्भावना छ। साथै, कोशी, बागमती, लुम्बिनी र कर्णाली प्रदेशका पहाडी भूभागका एक-दुई स्थानमा भारी वर्षा हुने सम्भावना रहेको छ।

राति कोशी प्रदेश लगायत बाँकी प्रदेशका पहाडी भूभागमा साधारणतया बदली रही बाँकी भूभागमा आंशिक बदली रहनेछ। कोशी प्रदेशको पहाडी तथा तराई भूभागलगायत बाँकी प्रदेशको पहाडी भूभागका थोरै र बाँकी तराई भूभागका एक-दुई स्थानमा मध्यम वर्षाको सम्भावना छ।

कोशी प्रदेशको तराई भूभागका एक-दुई स्थानमा भारी वर्षा हुने पूर्वानुमान गरिएको छ। महाशाखाले कोशी, बागमती, लुम्बिनी र कर्णाली प्रदेशका पहाडी भूभागका एक-दुई स्थानमा भारी वर्षा हुने सम्भावना रहेको जनाएको छ।

काठमाडौं, २ भदौ । हाल नेपालमा मनसुन प्रणाली सामान्यभन्दा केही कमजोर अवस्थामा रहेको मौसम पूर्वानुमान महाशाखाले जनाएको छ । मनसुनको न्यून चापीय रेखा सरदर स्थानको दक्षिणतर्फ सरेको कारणले वर्षा सक्रियता कम भएको हो ।

यद्यपि, बंगालको खाडीबाट जलवाष्पयुक्त हावा भित्रिनेस्थिति जारी रहेकाले देशभर आंशिकदेखि सामान्य बदली हुने मौसमविद्‌हरूको अनुमान छ । आज कोशी, बागमती, मधेश र लुम्बिनी प्रदेशका तराई तथा पहाडी भूभागहरूमा केही स्थानहरूमा मध्यम वर्षाको सम्भावना छ । साथै, बाँकी तराई क्षेत्रका थोरै ठाउँमा पनि वर्षा हुन सक्ने देखिएको छ ।

मौसम विभागका अनुसार लुम्बिनी प्रदेशको तराई क्षेत्र र बागमती प्रदेशको पहाडी भूभागका एक–दुई स्थानमा भने भारी वर्षाको सम्भावना रहेको छ । यात्रा वा बाहिरी काममा निस्कँदा आवश्यक सतर्कता अपनाउन मौसमविद्ले सुझाव दिएका छन् ।