मुख्य बुँदा
बागमती प्रदेशका प्रमुख सचिव बाबुराम अधिकारीद्वारा भक्तपुर अस्पतालको अवलोकन
स्वास्थ्य मन्त्रालयकी सचिव सुमित्रा गौतमले पनि अस्पताल अवलोकन
अस्पतालका सेवा सुविधा सन्तोषजनक रहेको निष्कर्ष
सीटी स्क्यान सेवा प्रभावकारी रूपमा सञ्चालन भइरहेको जनाइएको
मेसु डा. सुरेन्द्र भट्टद्वारा अस्पतालको सेवा, जनशक्ति र पूर्वाधारबारे जानकारी
स्वास्थ्य सेवा सुदृढीकरणका लागि प्रदेश सरकारको प्रतिबद्धता
भक्तपुर, ७ पुष । बागमती प्रदेश प्रमुख सचिव बाबुराम अधिकारी तथा बागमती प्रदेश स्वास्थ्य मन्त्रालयका सचिव सुमित्रा गौतमले भक्तपुर अस्पतालको संयुक्त रूपमा अवलोकन गर्नु भएको छ।
अवलोकनका क्रममा उहाँहरूले अस्पतालबाट प्रदान भइरहेका स्वास्थ्य सेवाहरू, सेवा प्रवाहको अवस्था तथा व्यवस्थापन पक्षबारे जानकारी लिनु भयो।
भक्तपुर अस्पतालका मेडिकल सुपरिटेन्डेन्ट (मेसु) डा. सुरेन्द्र भट्टले प्रमुख सचिव अधिकारी तथा सचिव गौतमलाई अस्पतालको समग्र सेवा सुविधा, जनशक्ति अवस्था, उपकरण तथा पूर्वाधारबारे विस्तृत जानकारी गराउनु भएको थियो।
डा. भट्टका अनुसार भक्तपुर अस्पतालमा उपलब्ध सेवा सुविधाहरू सन्तोषजनक रहेको र सीटी स्क्यान सेवा पनि प्रभावकारी रूपमा सञ्चालन भइरहेको जानकारी दिनुभयाे ।
अवलोकनपछि प्रमुख सचिव बाबुराम अधिकारीले भक्तपुर अस्पतालमा राम्रो सेवा सुविधा उपलब्ध रहेको उल्लेख गर्दै विशेष गरी सीटी स्क्यान सेवा प्रभावकारी र गुणस्तरीय रहेको बताउनु भयो। उहाँले अस्पतालले नागरिकलाई सहज, छिटो र भरपर्दो स्वास्थ्य सेवा प्रदान गरिरहेको भन्दै प्रशंसा गर्नु भयो।
स्वास्थ्य मन्त्रालयका सचिव सुमित्रा गौतमले पनि अस्पतालको सेवा प्रवाह सन्तोषजनक रहेको बताउँदै आवश्यक पूर्वाधार, उपकरण तथा जनशक्ति व्यवस्थापनमा मन्त्रालयबाट आवश्यक सहयोग गरिने प्रतिबद्धता व्यक्त गर्नु भयो।
सो अवसरमा आयोजित अन्तरक्रिया कार्यक्रममा प्रमुख सचिव अधिकारी तथा सचिव गौतमले चिकित्सक, नर्स, स्वास्थ्यकर्मी तथा प्रशासनिक कर्मचारीहरूसँग प्रत्यक्ष संवाद गर्नुभयो। अन्तरक्रियाका क्रममा कर्मचारीहरूले सेवा प्रवाहमा देखिएका चुनौती, आवश्यक स्रोतसाधन तथा सुधारका उपायबारे आफ्ना सुझाव राखेका थिए।
प्रमुख सचिव अधिकारीले प्राप्त सुझावहरूलाई गम्भीरतापूर्वक लिँदै प्रदेश सरकार स्वास्थ्य सेवा सुदृढीकरणलाई उच्च प्राथमिकतामा राखेर आवश्यक सहयोग र समन्वय गर्ने प्रतिबद्धता व्यक्त गर्नु भयो।
कार्यक्रममा अस्पताल प्रशासनका पदाधिकारी, स्वास्थ्यकर्मी तथा सरोकारवाला प्रतिनिधिहरूको उपस्थिति रहेको थियो।
