काठमाडौं, ११ साउन । भक्तपुर नगरपालिका वडा नं. १० को आयोजनामा वडाका जनप्रतिनिधि तथा कर्मचारीहरूको पारिवारिक भेटघाट कार्यक्रम शनिबार सम्पन्न भयो । कार्यक्रममा भक्तपुर नगरपालिकाका प्रमुख सुनिल प्रजापतिले पारिवारिक भेटघाटले आत्मीयता र सहयोगी भावनाको विकास गर्ने बताउनुभयो ।

उहाँले भन्नुभयो, “जनप्रतिनिधि, कर्मचारी र जनताको संयुक्त पहलबाट उदाहरणीय काम सम्पन्न हुने उदाहरण भक्तपुर नगरपालिका हो । जनता इमानदार भए निर्वाचित जनप्रतिनिधि पनि इमानदार हुने हु“दा जनतालाई राजनीतिक र सैद्धान्तिक रूपमा स·ठित गर्नु जरूरी छ ।”

व्यक्तिगत स्वार्थ त्यागेर काम गरे समाजको विकास तीव्रगतिले गर्न सकिने भनाइ उहाँको थियो । प्रमुख प्रजापतिले भन्नुभयो, “भक्तपुर शैक्षिक, राजनीतिक, सांस्कृतिक र सफाइमा परिवर्तन हुनुमा पार्टीका अग्रजहरूको भूमिका महत्वपूर्ण छ । राजनीतिक कार्यकर्ताहरू विचार र सिद्धान्तमा प्रतिबद्ध भई लाग्नुपर्छ ।”

भक्तपुर नगरका जनप्रतिनिधि, कर्मचारी र राजनीतिक नेतृत्वको अनुशासन र इमानदारिताको कारण देशभरिका नगरपालिकालाई मार्ग निर्देश गर्ने क्षमताको विकास भएको छ, उहाँले भन्नुभयो ।नगरपालिकाले लागु गरेको पर्यटन शुल्कले भक्तपुर विकासमा महत्वपूर्ण योगदान गरेको चर्चा गर्दै प्रमुख प्रजापतिले जनतालाई स्वयम्‌सेवीको भावना दिन पाक्षिक सरसफाइ कार्यक्रम सञ्चालन गरिरहेको बताउनुभयो ।

भक्तपुर नगरपालिकाका उपप्रमुख रजनी जोशीले कर्मचारी, जनप्रतिनिधिबिच पुनर्ताजगीको लागि पारिवारिक भेटघाट आवश्यक भएको धारणा राख्दै नेमकिपाको उद्देश्य र सिद्धान्तलाई व्यवहारमा लागु गर्ने जिम्मेवारी जनप्रतिनिधि, कार्यकर्ता र कर्मचारीको हो भन्नुभयो ।
पूर्ववडाध्यक्ष चन्द्रबहादुर उलकले कर्मचारी र जनप्रतिनिधिको कर्तव्य र जिम्मेवारी फरक भए पनि जनताको सेवा गर्ने साझा जिम्मेवारीबाट प्रेरित भई काम गर्नुपर्ने बताउनुभयो ।

कर्मचारीहरू पनि राजनीतिकरूपमा स्पष्ट र प्रतिबद्ध भई अगाडि बढ्नुपर्ने आवश्यकता औ“ल्याउ“दै उहा“ले जनप्रतिनिधिको उद्देश्य पूरा गर्ने कर्मचारीले सहयोगी भूमिका खेल्नुपर्ने बताउनुभयो । भनपा वडा नं। १० का वडाध्यक्ष लक्ष्मीप्रसाद ह्यौ“मिखाले जनताको मन जितेर काम गर्न सकेमात्र जनप्रतिनिधि र कर्मचारी सफल भएको ठान्नुपर्छ भन्नुभयो ।

कार्यक्रममा वडा सदस्य जितेन्द्र मनुंकर्मीले पनि बोल्नुभएको थियो । कार्यक्रममा नगर प्रमुख प्रजापतिले सेवानिवृत्त कर्मचारीहरू गोविन्दराम थुसा र भुवन बखुन्छेलाई सम्मानपत्र र मायाको चिनो प्रदान गर्नुभएको थियो ।

भक्तपुर, १० साउन । यहाँको चाँगुनारायण नगरपालिकाले झौखेलमा सञ्चालित पाँच वटा खानेपानी उद्योगमाथि प्रतिबन्ध लगाएको छ ।नगरपालिकाको अनुगमन समितिको बैठकले झौखेलमा सञ्चालनमा रहेका पाँच खानेपानी उद्योगलाई आजैदेखि पानी बिक्री वितरणमा प्रतिबन्ध लगाएको हो ।

नगरपालिकाका उपप्रमुख एवं अनुगमन समितिका संयोजक रमेश बुढाथोकीका अनुसार ती उद्योगमाथि कारबाही प्रक्रिया अगाडि बढाइएको छ । चाँगुनारायण नगरपालिका–३ झौखेलमा सञ्चालित ती उद्योगले बिक्री गर्दै आएको खानेपानीमा मानव स्वास्थ्यका लागि हानिकारक इकोली, कोलिफार्म, एमोनियालगायतका तत्व पाइएको नगरपालिकाका उपप्रमुख बुढाथोकीले जानकारी दिए ।

प्रतिबन्ध लगाइएका उद्योगहरूमा जय छुमा गणेश खानेपानी, ओके मिनिरल वाटर, झौखेल खानेपानी, कर्णाली खानेपानी र भक्तपुर खानेपानी उद्योग छन् ।

गत सोमबार नगरपालिकाका प्रमुख प्रशासकीय अधिकृत मोहनकृष्ण श्रेष्ठसहित अनुगमन समितिका सदस्य सन्तोषी नेपाली, वडा नं। ३ का वडाध्यक्ष श्यामसुन्दर धिमाल, निलाकुमारी घिमिरे, वास संयोजक सुरेन्द्र लामिछाने, विभिन्न विषयगत समितिका प्रतिनिधिलगायतले पानी उद्योगहरूको उत्पादन प्रक्रिया, सरसफाइको अवस्था, दर्ता तथा नवीकरणको अवस्थालगायतको स्थलगत निरीक्षण गरेको थियो ।

अनुगमनका क्रममा खानेपानीको उत्पादनमा समस्या देखिएको, गुणस्तरमा कैफियत भेटिएको र पानीको शुद्धतामा ध्यान नदिएको पाइएपछि पानीको नमुना सङ्कलन गरी परीक्षणका लागि पठाएको थियो ।

नगरपालिकाको निर्देशनको अवज्ञा गर्ने उद्योगहरूलाई नियमानुसार कानुनी कारबाही गरिने जनाइएको छ । झौखेलमा मात्रै ५० वटाभन्दा बढी खानेपानी उद्योग सञ्चालनमा छन् । रासस

मुख्य बुँदाहरू :

नेपाल मजदुर किसान पार्टीका अध्यक्ष नारायणमान बिजुक्छेंद्वारा लेखिएको ‘Letter from Jail’ को अंग्रेजी संस्करण सार्वजनिक

पुस्तकमा १९८८–१९९० जेल जीवनमा पत्नी शोभा बिजुक्छेलाई लेखिएका चिठीहरूको सङ्ग्रह समेटिएको

चिठीहरू प्रेम मात्र नभई राजनीतिक प्रतिबद्धता, समाज, दर्शन र संस्कृतिको दस्तावेज

दिवंगत शोभा बिजुक्छेप्रति श्रद्धाञ्जलीस्वरूप असार महिनामै अंग्रेजी संस्करण प्रकाशन

विमोचन कार्यक्रममा सांसद, साहित्यकार, समालोचक र अनुवादकहरूको उपस्थिति

वक्ताहरूले पुस्तकलाई प्रेम, राजनीतिक र मानव संवेदनाको ऐतिहासिक दस्तावेज माने

भक्तपुर, २ साउन। नेपाल मजदुर किसान पार्टीका अध्यक्ष नारायणमान बिजुक्छेंद्वारा कारागार जीवनका क्रममा आफ्नी धर्मपत्नी शोभा बिजुक्छेंलाई लेखिएका पत्रहरूको सङ्ग्रह ‘Letter from Jail’ को अंग्रेजी संस्करण शुक्रबार सार्वजनिक गरिएको छ।

सन् १९८८ देखि १९९० सम्म जेल जीवन बिताइरहँदा बिजुक्छेंले लेखेका चिठीहरूमा वैयक्तिक प्रेम मात्र नभई समय, समाज, दर्शन र राजनीतिक चेतनाका गहिरा अनुभूति समेटिएका छन्। पुस्तकको विमोचन शोभा बिजुक्छेको तेस्रो स्मृति सप्ताहको सन्दर्भमा गरिएको हो।

किताबमा जेलभित्र गरेको संघर्षसँगै जीवन, समाज, भक्तपुरको कला संस्कृति, राजनीति, दर्शनलगायत मनछुने सन्दर्भहरू छन् । जेलको साँघुरो र अँध्यारो कुनाबाट मनका र देशका कुरा व्यक्त गर्न चिठी लेखेको पुस्तक विमाेचन गर्दै अध्यक्ष विजुक्छेले बताउँनुभयो ।  

कार्यक्रममा वक्ताहरूले पुस्तकलाई एउटा राजनैतिक कार्यकर्ताको आत्मसंघर्ष र जीवनसाथीप्रतिको समर्पणको जीवित दस्तावेजको रूपमा चित्रण गरे। वक्ताहरूले जेलको मौन वातावरणमा लेखिएका ती पत्रहरूले पाठकमा सकारात्मक ऊर्जा उत्पन्न गराउने विश्वास व्यक्त गरे।

पुस्तकले तत्कालीन राजनीतिक र सामाजिक परिवेशलाई संवेदनात्मक भाषामा प्रस्तुत गरेको उनीहरूको धारणा थियो। बिजुक्छेंले लेखेका ती चिठीहरू अब केवल कागजका अक्षर मात्र नभई, एक युगको भावनात्मक इतिहासका रूपमा रहने जनाइएको छ।

दिवंगत शोभा बिजुक्छेप्रति मौन श्रद्धाञ्जलीस्वरूप प्रकाशित पुस्तकले निजी सम्बन्ध र सार्वजनिक चेतनाबीचको सम्बन्ध उजागर गर्ने प्रयास गरेको छ।

बालविकास सेकेन्डरी स्कुलको आयोजनामा सम्पन्न कार्यक्रममा प्रदेशसभा सदस्य सुरेन्द्रराज गोसाई र श्रृजना सैजु, वरिष्ठ साहित्यकार नरेन्द्र प्रसाईं, कवयित्री इन्दिरा प्रसाईं, अनुवादक अनुराज जोशी र समालोचक अभय श्रेष्ठलगायतले पुस्तकको समालोचना प्रस्तुत गरेका थिए ।

मुख्य बुँदाहरू :

२०२५ साउन २ र २०२६ असार १९ को भ्रष्टाचारविरोधी आन्दोलनको स्मरण

सहकारीकर्मीलाई समाजवादी मूल्य र अर्थशास्त्रमा गहिरो ज्ञानको आवश्यकता

सहकारीले रोजगारीमूलक तालिममार्फत जनताको सेवामा समर्पित हुनुपर्नेमा जोड

भ्रष्टाचारविरोधी आन्दोलनको निरन्तरता आवश्यक

भक्तपुरमा किसान आन्दोलन र सहकारी भूमिकाको चर्चा

सहकारीलाई वित्तीय संस्थामा रूपान्तरण गर्न नहुने

सहकारी अनुगमन र विकृति नियन्त्रणमा समितिको प्राथमिकता

भक्तपुर, २ साउन । नेपाल मजदुर किसान पार्टीका सचिव तथा संघीय सांसद प्रेम सुवालले देशमा सन्तुलित विकास नहुँदा भ्रष्टाचार मौलाएको उल्लेख गर्दै सहकारी सञ्चालक तथा कर्मचारीहरुलाई अर्थशास्त्रको राम्रो ज्ञान आवश्यक रहेको बताउनुभएकाे छ । सहकारी संस्थाको विगत र वर्तमान अवस्थाबारे सहकारी पदाधिकारीहरुको भेलामा उहाँले उक्त कुरा बताउनुभएकाे हाे । 

कार्यक्रममा २०२५ साउन २ र २०२६ असार १९ मा भएको ऐतिहासिक भ्रष्टाचारविरोधी आन्दोलनको स्मरण गरिएको थियो त्यस आन्दोलनको सन्देश आज पनि सान्दर्भिक रहेको रहेकाे उहाँकाे भनाइ छ । उहाँले सहकारी संस्थाले बैंकजस्तो व्यवहार गर्नुहुँदैन भन्दै सीपमूलक तथा रोजगारीमूलक तालिम सञ्चालन गरी इमानदारीपूर्वक सेवा गर्न आग्रह गर्नुभयो ।

उद्योगधन्दा कौडीको मूल्यमा बेच्ने सरकारी नीति गलत भएको बताउँदै, देश आत्मनिर्भर बनाउन स्वदेशमै उद्योग स्थापना गर्नुपर्नेमा सुवालले जाेड दिनुभयाे । 

भक्तपुर नगरपालिका प्रमुख सुनिल प्रजापतिले सहकारी सिद्धान्त अनुसार काम गरी सहकारीले गरिब जनताको जीवनस्तर उकास्न योगदान गर्नुपर्ने बताउँनुभयाे । उहाँले ऐतिहासिक किसान आन्दोलनको जगबाट भक्तपुरमा विकास कार्य अघि बढाइएको स्मरण गराउनुभयाे ।

सहकारी संस्थामा भएका विकृति नियन्त्रणमा सहकारी समितिले नियमनमा प्राथमिकता दिएको वडा नं २ का वडाध्यक्ष हरिप्रसाद बासुकलले जानकारी दिनुभयाे । 

कार्यक्रममा किसान आन्दोलन, भर्पाई आन्दोलन र भ्रष्टाचारविरोधी संघर्षको ऐतिहासिक चर्चा गर्दै सहभागीहरूले सहकारीलाई पुनः जनमुखी बनाउन सुझाव दिएका थिए ।

मुख्य बुँदागत सारांश:

• भक्तपुर मालपोत कार्यालयका प्रमुख कुमार आचार्य र सहयोगी टिकाराम राउत २४ लाख ५० हजार घुससहित पक्राउ।

• उनीहरूले १४ रोपनी ४ आना जग्गाको मोही र तलसिङ लगतकट्टाको फाइल रोकेर घुस मागेका थिए।

• घुस राउतको साथबाट बरामद, तर प्रमुख आचार्यकै संलग्नता देखिएको अख्तियारको दाबी।

• स्टिङ अपरेसनमार्फत कार्यालयमै रंगेहात पक्राउ।

• प्रमुखको २ वटा मोबाइल जफत, थप अनुसन्धान जारी।

भक्तपुर, ३२ असार । भक्तपुर मालपोत कार्यालयका प्रमुख मालपोत अधिकृत कुमार आचार्य र कार्यालय सहयोगी टिकाराम राउत २४ लाख ५० हजार रुपैयाँ घुससहित रंगेहात पक्राउ परेका छन्। उनीहरूलाई अख्तियार दुरुपयोग अनुसन्धान आयोगको टोलीले मंगलबार दिउँसो कार्यालयमै स्टिङ अपरेसनमार्फत पक्राउ गरेको हो।

अख्तियारका अनुसार, उनीहरूले चाँगुनारायण नगरपालिका क्षेत्रमा रहेको १४ रोपनी ४ आना जग्गाको मोही र तलसिङको लगतकट्टाको फाइल रोकि घुस मागिरहेका थिए। प्राप्त सूचनाका आधारमा आयोगले निगरानी बढाउँदै सञ्चालित अपरेसन सफल बनाएको हो।

पैसा भने कार्यालय सहयोगी राउतको साथबाट बरामद भएको आयोगले जनाएको छ। तर, सो रकम कार्यालय प्रमुख आचार्यकै मिलेमतोमा उठाइएको प्रमाण भेटिएको अख्तियारको दाबी छ। थप प्रमाण संकलनका क्रममा प्रमुख आचार्यका दुईवटा मोबाइल फोन पनि जफत गरिएको छ।

जग्गाको स्वामित्व विवरण अद्यावधिक गर्नुपर्ने प्रक्रियालाई लगतकट्टा भनिन्छ, जुन प्रक्रियामा सरकारी कर्मचारीद्वारा अनाधिकृत रकम मागिनु गम्भीर भ्रष्टाचारको संकेत हो।

अख्तियारले घटनासम्बन्धी थप अनुसन्धान अगाडि बढाइरहेको जनाएको छ। प्रारम्भिक अनुसन्धानले कार्यालयभित्रकै मिलेमतोमा सेवाग्राहीमाथि आर्थिक शोषण भइरहेको पुष्टि हुने देखिएको छ।

मुख्य बुँदागत सारांश 

• बागमती प्रदेशका स्वास्थ्य मन्त्री किरण थापामगरले भक्तपुर नगरपालिकाद्वारा सञ्चालित ख्वप अस्पतालको अनुगमन ।

• मन्त्री थापामगरले अस्पतालको पूर्वाधार, सेवा तथा व्यवस्थापनको स्थलगत अवलोकन गरी सेवाग्राहीसँग प्रत्यक्ष संवाद ।

• उनले ख्वप अस्पताललाई देशकै नमुना अस्पतालको रूपमा प्रशंसा गर्दै प्रदेश सरकारले आवश्यक सहयोग गर्न तत्पर रहने ।

• अस्पताल १०० शैय्या क्षमताको छ र वर्षभर ११ घण्टा ओपीडी सेवा प्रदान गर्दै आएको छ।

• निकट भविष्यमा सिटी स्क्यान सेवा सुरु गर्न लागिएको जानकारी दिइयो।

• स्वास्थ्य बीमा भुक्तानी ढिलाइ हुँदा अस्पताल सञ्चालनमा समस्या भएको जनाइएको छ।

• अस्पतालसँगै नगरपालिकाले जनस्वास्थ्य, सहरी स्वास्थ्य केन्द्र, पुनःस्थापना केन्द्रमार्फत सेवा दिइरहेको छ।

• शिक्षा र स्वास्थ्यमा भक्तपुर नगरपालिकाको योगदान अन्य स्थानीय तहका लागि अनुकरणीय रहेको मन्त्री थापामगरको भनाइ।

भक्तपुर, ३२ असार । बागमती प्रदेशका स्वास्थ्य मन्त्री किरण थापामगरले भक्तपुर नगरपालिकाद्वारा सञ्चालनमा रहेको ख्वप अस्पतालको अनुगमन गर्नुभएको छ। अनुगमनका क्रममा मन्त्री थापामगरलाई नगर प्रमुख सुनिल प्रजापतिले स्वागत गर्नुभएको थियो।

मन्त्री थापामगरले अस्पतालका विभिन्न सेवा कक्ष, अक्सिजन प्लान्ट, आकस्मिक सेवा, औषधालय, ल्याब, छात्ती पुनःस्थापना केन्द्र, नर्सिङ कलेज, आँखा अस्पताल र ब्रम्हायणीस्थित अन्तरंग सेवाहरूको स्थलगत निरीक्षण गर्नुभयो। सेवा प्रवाहको जानकारी लिँदै उहाँले बिरामीहरूसँग पनि संवाद गर्नुभयो।

कार्यक्रममा बोल्दै मन्त्री थापामगरले भक्तपुर नगरपालिकालाई शिक्षा र स्वास्थ्यको क्षेत्रमा देशको नमुना नगरपालिका रहेको उल्लेख गर्दै ख्वप अस्पतालको गुणस्तरीय सेवा र व्यवस्थापनप्रति सन्तुष्टि व्यक्त गर्नुभयो। उहाँले प्रदेश सरकार अस्पतालको विकासका लागि आवश्यक सहयोग गर्न सदैव तयार रहेको समेत बताउनुभयाे । 

अनुगमनमा प्रदेश स्वास्थ्य मन्त्रालय स्वास्थ्य सचिव डा. सुमित्रा गौतमले बागमती प्रदेशअन्तर्गत स्थानीय तहले सञ्चालन गरेको नमुना अस्पतालको रुपमा रहेको ख्वप अस्पताल अनुगमन गर्न पाउँदा गौरवान्वित महसुस भएको बताउनुभयो । उहाँले शिक्षा र स्वास्थ्यलाई निःशुल्कसँगै नागरिकको सहज पहुँच र गुणस्तरीय बनाउँदै लानुपर्नेमा जोड दिँदै उहाँले भक्तपुरले शिक्षा र स्वास्थ्य क्षेत्रमा गरेको काम अन्य स्थानीय तहहरूको लागि अनुकरणीय भएको बताउनुभयो ।

सरकारी सेवा सुविधालाई स्तरीय बनाउने नीतिमा प्रदेश सरकारले जोड दिँदै आएको बताउँदै प्रदेश मातहतका अस्पतालहरूमा विशिष्टिकृत सेवा प्रदान गर्दै लाने बताउनुभयो ।

नगर प्रमुख सुनिल प्रजापतिले नगरबासीको लागि कम शुल्कमा गुणस्तरीय सेवा प्रदान गर्ने उद्देश्यले ख्वप अस्पताल निरन्तर विस्तार र सुधार गरिरहेको र यसलाई देशकै उत्कृष्ट अस्पताल बनाउने लक्ष्य रहेको बताउनुभयाे ।

ख्वप अस्पतालले वर्षको ३६५ दिन ११ घण्टा ओपिडी सेवा प्रदान गर्दै आइरहेको अवगत गराउँदै भक्तपुर नगरपालिकाले ख्वप अस्पताल सँगै श्वासप्रश्वास पुनःस्थापना केन्द्र, जनस्वास्थ्य केन्द्र, सहरी स्वास्थ्य केन्द्र र आधारभूत स्वास्थ्य केन्द्रहरूमार्फत स्वास्थ्य सेवा प्रदान गर्दै आएको बताउनुभयो ।

अस्पतालले छिटै सिटी स्क्यान सञ्चालनमा ल्याउने तयारी गरिरहेको बताउँदै प्रमुख प्रजापतिले नेपाल सरकारले स्वास्थ्य बीमा उपचारबापतको रकम समयमै भुक्तानी नदिँदा अस्पताल सञ्चालनलगायतका गतिविधिमा समस्या भएको बताउनुभयो ।

ख्वप अस्पतालका निमित्त मेडिकल डाइरेक्टर डा. मजेश प्रताप मल्लले अस्पतालको सेवा विस्तार, उपलब्ध सुविधा र भावी योजनाबारे प्रस्तुति दिनुभयो। उहाँका अनुसार अस्पतालले ३६५ दिन ११ घण्टा ओपीडी सेवा सञ्चालन गर्दै आएको छ। सिटी स्क्यान सेवा सुरु गर्न तयारी भइरहेको जानकारी दिइयो।

कार्यक्रममा प्रदेशका वरिष्ठ स्वास्थ्य अधिकारीहरूको सहभागिता रहेको थियो। सहभागीहरूले भक्तपुरको नमुना सेवा प्रणाली अन्य स्थानीय तहहरूले पनि अवलम्बन गर्नुपर्ने धारणा व्यक्त गरेका थिए ।

भक्तपुर, २९ असार । बागमती प्रदेश सरकारका स्वास्थ्य मन्त्री किरण थापाले भक्तपुर जिल्लालाई पूर्ण खोप सुनिश्चित जिल्ला घोषणा गर्नुभएकाे छ ।

शनिबार सूर्यविनायकमा खोप जिल्ला समन्वय समितिले आयोजना गरेको कार्यक्रममा मन्त्री थापाले भक्तपुरलाई पूर्ण खोप सुनिश्चितता तथा दिगोपनाको प्रमाणपत्र हस्तान्तरण गर्दै यसअघि जिल्लाका चार वटै स्थानीय तह पूर्ण खोप सुनिश्चित भइसकेको जानकारी दिनुभयाे ।

मन्त्री थापाले मुख्यमन्त्री स्वास्थ्य कार्यक्रमलाई अझ प्रभावकारी बनाउन घरघरमा स्वास्थ्यकर्मी र स्वयंसेवक परिचालन गरिने बताउँदै भन्नुभयो, “मुख्यमन्त्री स्वास्थ्य कार्यक्रम सोचे अनुसार प्रभावकारी हुन सकेन, त्यसैले नसर्ने रोग निवारणका लागि रोग पहिचान गर्ने उद्देश्यले स्वास्थ्यकर्मी र स्वयंसेवक परिचालन गरेर घरदैलोमै पुगेर स्वास्थ्य परीक्षण गर्नेछौं।

यसका लागि स्वयंसेवकहरुलाई पारिश्रमिक र एक हजार रुपैयाँ सञ्चार खर्चको व्यवस्था गरिएको छ।” उहाँले भक्तपुर अस्पताल र हेटौँडा अस्पताललाई टेलिमेडिसिन हब बनाएर २४ सै घण्टा सेवा संचालन गर्ने गरी प्रदेश स्वास्थ्य मन्त्रालयले व्यवस्था गरेको जानकारी गराउँदै प्रदेशस्तरीय अस्पतालको स्तरोन्नति, जनशक्ति वृद्धि र उपकरण वितरणलाई पनि प्रभावकारी रूपमा अगाडि बढाइएको बताउनुभयो।

स्वास्थ्य मन्त्री थापाले आगामी दिनमा भौतिक पूर्वाधार मन्त्रालय, खानेपानी मन्त्रालय, वन मन्त्रालय, कृषि मन्त्रालय लगायतका मन्त्रालयहरूसँग समन्वय गरेर स्वास्थ्यलाई जोड दिने योजना रहेको समेत जानकारी दिनुभयो। साथै प्रदेश सरकारले एमडी र एमबिबिएसको पढाइ पनि सुरु गरेको जानकारी गराउनुभयो। उनले अधूरा रहेका स्वास्थ्य चौकीका भवनहरु पूर्णता दिन बजेट व्यवस्थापन गरिएको पनि उल्लेख गर्नुभयो।

कार्यक्रममा बागमती प्रदेश स्वास्थ्य मन्त्रालयका सचिव डा. सुमित्रा गौतमले खोप सुनिश्चिततालाई दिगोपन बनाउनु चुनौतीपूर्ण रहेको बताउँदै भन्नुभयो, “कोही पनि खोपबाट छुट्न नहुने हाम्रो प्राथमिकता हो। खोप प्रभावकारी भएकाले बालमृत्युदर हरेक वर्ष घट्दै गएको छ। नियमित खोप कार्यक्रमले बालमृत्यु दर ८० प्रतिशतले घटाएको छ।”

कार्यक्रममा प्रदेशसभा सदस्य सुरेश श्रेष्ठ, धनेश्वरी प्रजापति, प्रमुख जिल्ला अधिकारी भरतमणि पाण्डे, खोप महाशाखा प्रमुख डा. अभियान गौतम लगायतले खोप कार्यक्रमलाई आगामी दिनमा अझ प्रभावकारी बनाउनुपर्ने आवश्यकता औंल्याउनुभयाे । 

जिल्ला जनस्वास्थ्य कार्यालय प्रमुख अञ्जना खड्काले घरघर पुगेर खोप सुनिश्चित गराई भक्तपुर जिल्लामा कोही पनि बालबालिका खोपबाट वञ्चित नभएको बताउनुभयाे । उहाँले आगामी दिनमा पनि खोप कार्यक्रमलाई प्रभावकारी बनाएर कोही पनि बालबालिका खोपबाट वञ्चित नहुने गरी दिगोपना दिने प्रतिबद्धता व्यक्त गर्नुभयाे । 

भक्तपुरका चारवटै नगरपालिकाका प्रतिनिधि र खोप सुनिश्चित घोषणामा सहयोग गर्ने विभिन्न निकायलाई सम्मान गरिएको थियो। स्वास्थ्य मन्त्री थापाले महिला स्वयंसेविकाहरुलाई समेत सम्मान गर्नुभएकाे थियाे ।  जिल्ला खोप समन्वय समितिका संयोजक एवं प्रमुख ईश्वर थापाले खोप सुनिश्चिततालाई दिगो बनाउने जिम्मेवारी सबै सरोकारवालाहरूको भएको उल्लेख गर्दै सबै निकायले सक्रिय भूमिका खेल्नुपर्नेमा जोड दिनुभयो।

यो घोषणाले भक्तपुर जिल्लामा खोप कार्यक्रमलाई थप प्रभावकारी बनाउने र नसर्ने रोग नियन्त्रणमा ठूलो प्रगति हासिल गर्ने लक्ष्यमा महत्वपूर्ण पाइला सावित हुनेछ भन्ने विश्वास व्यक्त गरिएको छ।

भक्तपुर, २६ असार । भक्तपुर नगरपालिकाकाे युवा तथा खेलकुद समितिको आयोजनामा भक्तपुर नगरपालिकाअन्तर्गत विभिन्न खेलकुद प्रशिक्षणमा सहभागी भई यस वर्षको एसईई परीक्षा सफलतापूर्वक उत्तीर्ण गरेका खेलाडीहरूलाई बधाई तथा मार्गदर्शन कार्यक्रम सम्पन्न भएको छ।

भक्तपुर नगरपालिकाका प्रमुख सुनिल प्रजापति प्रमुख अतिथिका रूपमा उपस्थित रहनुभएका कार्यक्रममा उहाँले सफल खेलाडीहरूलाई फूलमाला र प्रकाशनहरूमार्फत सम्मान गर्दै बधाई दिनुभयो। उहाँले खेलमा जस्तै पढाइमा पनि खेलाडीहरूले निरन्तर मेहनत गर्नुपर्नेमा जोड दिँदै, एसईईपछि आफ्नो रुचि र देशको आवश्यकतालाई विचार गरेर विषय छनोट गर्न सुझाव दिनुभयो।

प्रमुख प्रजापतिले भक्तपुर नगरपालिकाले खेलकुदसँगै शैक्षिक विकासमा पनि उत्तिकै प्राथमिकता दिएको बताउँदै छात्रवृत्तिको व्यवस्था तथा नगरका गुणस्तरीय विद्यालय र कलेजहरूमा अध्ययन गर्न प्रेरित गर्नुभयो। उहाँले भक्तपुर नगरपालिका आफ्नै लगानीमा कलेज स्थापना र सञ्चालन गर्ने पहिलो स्थानीय तह रहेको जानकारी दिँदै यसको अनुभव देशभरका पालिकाहरूका लागि प्रेरणादायी भएको उल्लेख गर्नुभयो।

कार्यक्रममा वडा नं. १० का वडाध्यक्ष लक्ष्मीप्रसाद ह्यौमिखाले अध्ययनशील खेलाडीहरूले देश तथा विदेशमा अवसर पाउने सम्भावना प्रवल हुने भन्दै उच्च शिक्षातर्फ पनि ध्यान दिन आग्रह गर्नुभयो। वडा नं. १ का वडाध्यक्ष एवं आयोजक समितिका संयोजक श्यामकृष्ण खत्रीले हरेक वर्ष खेलकुद बजेटमा वृद्धि गर्दै आएको जानकारी दिँदै खेलाडीहरूलाई अनुशासित र लक्ष्यप्रति समर्पित हुन सुझाव दिनुभयो।

समितिका सदस्य एवं कार्यपालिका सदस्य सुनिता आवालले विद्यालय स्तरीय खेलकुद प्रतियोगितामार्फत विद्यार्थीहरूलाई प्रारम्भिक चरणमै खेलकुदतर्फ आकर्षित गरिँदै आएको जानकारी दिइन्।

समितिका अर्की सदस्य रञ्जना त्वातीले पनि सबै एसईई उत्तीर्ण खेलाडीहरूलाई बधाई दिँदै उज्ज्वल भविष्यको कामना गर्नुभयो। कार्यक्रमले खेल र शिक्षालाई सँगसँगै अघि बढाउन प्रेरणा दिने उद्देश्य राखेको आयोजक समितिले जनाएको छ।