काठमाडौं, १० जेठ । अमेरिकी राष्ट्रपति डोनाल्ड ट्रम्प ले इरानसँगको सम्झौता धेरै हदसम्म तय भइसकेको दाबी गरेका छन्। उनका अनुसार उक्त सम्झौतामा होर्मुज स्ट्रेट पुनः सञ्चालन गर्ने विषयसमेत समावेश हुन सक्छ।

ट्रम्पले सामाजिक सञ्जालमार्फत साउदी अरेबिया, संयुक्त अरब इमिरेट्स (यूएई), कतारलगायत देशका नेताहरूसँग शान्ति सम्झौताका विषयमा सकारात्मक छलफल भएको बताएका छन्।

त्यसैगरी उनले इजरायली प्रधानमन्त्री बेन्जामिन नेतन्याहू सँग पनि यस विषयमा छलफल भएको उल्लेख गरेका छन्। यसअघि इरानको विदेश मन्त्रालयका प्रवक्ता इस्माइल बकाइ ले पछिल्ला केही हप्तामा अमेरिका–इरान सम्बन्धमा केही सुधार आएको बताएका थिए।

तर मुख्य मुद्दामा भने अझै कुनै सहमति नभएको उनको भनाइ छ। उनले अमेरिकाले विरोधाभाषपूर्ण अभिव्यक्ति दिँदै आएको आरोपसमेत लगाएका छन्।

काठमाडौं, ३० चैत्र । टर्कीले इजरायली प्रधानमन्त्री बेन्जामिन नेतन्याहूसहित ३५ जनाविरुद्ध गम्भीर फौजदारी मुद्दा दर्ता गरेको छ। प्यालेस्टिनको गाजा क्षेत्रतर्फ गइरहेको राहत मिसनमाथि भएको आक्रमणलाई लिएर दर्ता गरिएको यस मुद्दामा अभियुक्तहरूका लागि हजारौँ वर्षसम्मको जेल सजाय माग गरिएको छ।

इस्तानबुलस्थित मुख्य सरकारी वकिलको कार्यालयले दायर गरेको आरोपपत्रमा इजरायली नेतृत्वमाथि मानवताविरुद्धको अपराध तथा अन्तर्राष्ट्रिय कानुन उल्लंघन गरेको गम्भीर आरोप लगाइएको छ। आरोपपत्रअनुसार सबै ३५ अभियुक्तका लागि जन्मकैदका साथै एक हजार १०२ वर्षदेखि चार हजार ५९६ वर्षसम्म थप जेल सजाय माग गरिएको छ।

अभियुक्तहरूमाथि मानवताविरुद्धको अपराध, नरसंहार, गैरकानुनी हिरासत, यातना तथा लुटपाटजस्ता गम्भीर अभियोग लगाइएको छ।यो मुद्दा गत वर्ष सेप्टेम्बरमा भएको एक घटनासँग सम्बन्धित रहेको बताइएको छ। ‘सुमुद फ्लोटिला’ नामक राहत मिसन खाद्यान्न, औषधि तथा अन्य अत्यावश्यक सामग्री लिएर गाजा क्षेत्रतर्फ गइरहेको थियो। उक्त फ्लोटिला अन्तर्राष्ट्रिय समुद्री क्षेत्रमा रहेका बेला इजरायली नौसेनाले त्यसलाई रोकेको आरोप टर्कीले लगाएको छ।

इजरायली सैनिकहरूले जहाजमा चढेर त्यहाँ रहेका अधिकारकर्मीहरूलाई नियन्त्रणमा लिएको तथा जहाजलाई गन्तव्यतर्फ अघि बढ्न नदिएको आरोपसमेत लगाइएको छ। टर्की सरकारका अनुसार उक्त कारबाही पूर्ण रूपमा अन्तर्राष्ट्रिय कानुनविरुद्ध भएको दाबी गरिएको छ। अन्तर्राष्ट्रिय जलक्षेत्रमा मानवीय सहायता सामग्री बोकेका जहाजमाथि सैन्य हस्तक्षेप गर्नु गम्भीर अपराध भएको टर्कीको भनाइ छ।

यस मुद्दाले पहिले नै तनावपूर्ण अवस्थामा रहेको इजरायल र टर्कीबीचको कूटनीतिक सम्बन्धलाई थप जटिल बनाउने निश्चित देखिएको विश्लेषण गरिएको छ।

एजेन्सी, २३ साउन । इजरायलको सुरक्षा क्याबिनेटले गाजा कब्जा गर्ने प्रधानमन्त्री बेन्जामिन नेतन्याहूको प्रस्ताव स्वीकृत गरेको छ। एक्जिओसको रिपोर्टअनुसार, यस निर्णयअनुसार हमासलाई सिध्याउने गरी गाजामा सैन्य कारबाहीको तयारी गर्न इजरायली सेनालाई आदेश दिइएको छ।

अल जजीराका अनुसार, यो कदम नेतन्याहूको लामो योजनाअन्तर्गत रहेको हो, जसलाई अमेरिकी राष्ट्रपति डोनाल्ड ट्रम्पले पनि समर्थन गरेको बताइएको छ। सन् २०२३ सेप्टेम्बरदेखि जारी आक्रमणमा गाजामा झण्डै ६२ हजार मानिस मारिएका छन् र अहिले चरम भोकमरीको अवस्था छ।

गाजा कब्जा गर्ने गरी सुरु हुन लागेको सम्भावित आक्रमणका कारण मानवीय संकट अझै बढ्ने भन्दै विभिन्न मुलुकले चिन्ता व्यक्त गरेका छन्।

एजेन्सी, ३० जेठ । इजरायलले गरेको आक्रमणमा इरानको रेभोल्युसनरी गार्डका प्रमुख हुसैन सलामीको मृत्यु भएको इरानी अधिकारीहरूले पुष्टि गरेका छन्। केही दिनयता जारी तनावपछि इजरायलले इरानमाथि आक्रमण सुरु गरेको हो। इजरायली रक्षामन्त्री इजरायल काट्जले उक्त आक्रमणको पुष्टि गरेका छन्।

इरानमाथि आक्रमण भएपछि इजरायलले देशमा सम्भावित प्रतिकारात्मक कारबाहीको जोखिमका कारण संकटकाल घोषणा गरेको छ। रक्षामन्त्री काट्जका अनुसार शैक्षिक तथा सार्वजनिक कार्यक्रमहरूमा प्रतिबन्ध लगाइएको छ।

इरायलका प्रधानमन्त्री बेन्जामिन नेतन्याहूले भिडियो सन्देश मार्फत इरानको राजधानी तेहरानबाट करिब २२5 किलोमिटर टाढा पर्ने नातांंज सहरस्थित मुख्य परमाणु केन्द्रमा आक्रमण गरिएको बताए। इरानले सन् २०२१ मा सो केन्द्रमा भएको साइबर आक्रमणमा इजरायलको संलग्नता आरोप लगाएको थियो।

यसैबीच, अमेरिकाले इजरायली आक्रमणमा आफ्नो कुनै संलग्नता नरहेको स्पष्ट पारेको छ। अमेरिकी विदेशमन्त्री मार्को रुबियोले एक विज्ञप्ति जारी गर्दै इजरायलले आत्मरक्षाका लागि आक्रमण गरेको बताए।