मुख्य बुँदा

गुठी सञ्चालक समितिको निर्णय किसानविरोधी भएको आरोप।

आवास योजनामा परेको गुठी जग्गामा मोही किसानको हक सुरक्षित गर्न माग।

भक्तपुर नगर प्रमुख सुनिल प्रजापतिले आन्दोलनको आवश्यकता औँल्याए।

गुठी संस्थानको पत्राचार नियमविपरीत भएको दाबी।

किसान अधिकार र पुर्जा फिर्ताका लागि संघर्ष जारी राख्ने प्रतिबद्धता।

भक्तपुर, १८ जेठ । नेपाल क्रान्तिकारी किसान सङ्घ केन्द्रीय समितिको आयोजनामा गुठी सञ्चालक समितिको निर्णय र गुठी संस्थानको पत्राचारले मोही किसानको अधिकारमाथि आघात पुगेको विषयमा सरोकारवालासँग अन्तरक्रिया कार्यक्रम सम्पन्न भएको छ।

कार्यक्रमा भक्तपुर नगरपालिकाका प्रमुख सुनिल प्रजापतिले विगतमा किसान आन्दोलन र संघर्षकै बलमा मोही किसानहरूले जग्गामा आधा स्वामित्वको अधिकार प्राप्त गरेको स्मरण गराउँदै उक्त अधिकार जोगाउन पुनः संगठित संघर्ष आवश्यक रहेको बताउनुभयो।

उहाँले आवास योजना कार्यान्वयन गर्दा निश्चित प्रतिशत जग्गा कटान हुनु स्वाभाविक भए पनि गुठी जग्गामा मोही किसानको हक बेदखल हुने गरी गुठी संस्थानले गरेको निर्णय र पत्राचार नियमविपरीत तथा किसानविरोधी भएको बताउनुभयो।

प्रजापतिले देको मिवा इटापाके आवास योजनामा परेका गुठी जग्गाका मोही किसानलाई पुर्जा फिर्ता नदिएको विषयमा पटक–पटक सम्बन्धित निकायमा ध्यानाकर्षण गराइएको उल्लेख गर्दै किसानको हक सुनिश्चित नभएसम्म आन्दोलन जारी राख्नुपर्ने धारणा व्यक्त गर्नुभयो। उहाँले यस अभियानमा भक्तपुर नगरपालिकाको साथ र सहयोग रहने पनि बताउनुभयो।

कार्यक्रममा वाग्मती प्रदेशसभा सदस्य गीता काफ्ले ले प्रदेश सरकारले किसानका समस्या समाधानमा पर्याप्त चासो नदिएको आरोप लगाउँदै गुठी जग्गाका मोही किसानको हक संरक्षणका विषयमा प्रदेशसभामा उठाइएका आवाजको सुनुवाइ नभएको बताउनुभयो।

भक्तपुर नगरपालिका वडा नं. २ का वडाध्यक्ष हरिप्रसाद बासुकलाले देको मिवा इटापाके आवास योजना नगरवासीको व्यवस्थित बसोबासका लागि सञ्चालन गरिएको जानकारी दिनुभयो।

त्यस्तै, नेपाल क्रान्तिकारी किसान सङ्घका केन्द्रीय सचिव तथा भक्तपुर नगरपालिका वडा नं. ६ का वडाध्यक्ष हरिराम सुवालले गुठी जग्गाका मोही किसानको अधिकार सुरक्षित गर्न थप सशक्त आन्दोलन आवश्यक रहेको बताउनुभयो।

कार्यक्रममा विभिन्न मोही किसान तथा सरोकारवालाले गुठी जग्गामा किसानको हक सुनिश्चित गर्न सम्बन्धित निकायसँग माग गरेका थिए।

भक्तपुर, १५ जेठ । भक्तपुरको कला, संस्कृति र सम्पदा संरक्षण गर्दै नयाँ पुस्तामा हस्तान्तरण गर्ने उद्देश्यले भक्तपुर नगरपालिकाको आयोजनामा जेठ १५ र १६ गते नासमना टोलमा भक्तपुर नगरव्यापी दाफा प्रदर्शनीको भव्य उद्घाटन गरिएको छ।

प्रदर्शनीको उद्घाटन भक्तपुर नगरपालिकाका प्रमुख सुनिल प्रजापतिले गर्नुभयो। उद्घाटन समारोहमा बोल्दै नगर प्रमुख प्रजापतिले संस्कृति संरक्षणको सन्देश देशभर फैलाउन यस्ता गतिविधि महत्वपूर्ण हुने बताउनुभयो।

उहाँले सम्पदा संरक्षणलाई लक्ष्य बनाउँदै नगरपालिकाले निरन्तर सांस्कृतिक कार्यक्रम गर्दै आएको उल्लेख गर्नुभयो। दाफा भजन परम्परागत संस्कृति र पहिचानको महत्वपूर्ण अंश भएको उहाँको भनाइ थियो।

नगर प्रमुख प्रजापतिले प्रगतिशील भजन प्रतियोगिता सञ्चालन गर्नु नगरपालिकाको पृथक र महत्वपूर्ण प्रयास भएको उल्लेख गर्दै दाफा तथा भजनलाई लिपिबद्ध गर्ने काम भइरहेको जानकारी दिनुभयो। साथै नयाँ पुस्तालाई सांस्कृतिक गतिविधिमा सहभागी गराउँदै पुस्तान्तरण गर्ने अभियानलाई अघि बढाइएको पनि उहाँले बताउनुभयो।

“दाफा भजन उत्पत्तिका लागि सयौं वर्ष लागेको छ, त्यसैले यसलाई जोगाउने हाम्रो निरन्तर प्रयास हो,” उहाँले भन्नुभयो।उहाँले दाफा भजन केवल सांगीतिक परम्परा मात्र नभई नेपाली समाजको सांस्कृतिक पहिचान र ऐतिहासिक सम्पदा भएको उल्लेख गर्दै यसको संरक्षणमा सबै पक्ष एकजुट हुनुपर्नेमा जोड दिनुभयो।

कार्यक्रममा वडा नं. ९ का वडाध्यक्ष रविन्द्र ज्याख्व, वडा नं. ३ का वडाध्यक्ष राजकृष्ण गोर, तथा अन्य जनप्रतिनिधिहरूको उपस्थिति रहेको थियो। त्यस्तै दत्तात्रयमा भएको सांस्कृतिक र्याली उद्घाटन कार्यक्रममा वडा नं. १० का वडाध्यक्ष लक्ष्मीप्रसाद ह्यौंमिखा र वडा नं. ८ का सदस्य रामसुन्दर बासीले पनि सम्बोधन गर्नुभयो।

सांस्कृतिक र्याली दत्तात्रयबाट सुरु भई इनाचो, गोल्मढी, सुकुलढोका, साकोठा, टौमढी, बोलाछे हुँदै नासमना पुगेर उद्घाटन कार्यक्रममा परिणत भएको थियो।

नगरपालिकाले भक्तपुरको मूर्त तथा अमूर्त कला–संस्कृति संरक्षण, संवर्द्धन र पुस्तान्तरणका लागि हरेक वर्ष यस्ता सांस्कृतिक प्रदर्शनी तथा प्रतियोगिता आयोजना गर्दै आएको छ।

मुख्य बुँदा 

 भक्तपुरमा बिस्का जात्राको तयारी तीव्र

टौमढीमा भैरवनाथको रथ निर्माण अन्तिम चरणमा

करिब ३० फिट अग्लो तीनतले रथ तयार हुँदै

नयाँ वर्षअघि रथ तानेर जात्रा सुरु हुने परम्परा

हजारौँ युवाले डोरी तानेर रथ सञ्चालन गर्ने चलन

भक्तपुर, १८ चैत । भक्तपुरको ऐतिहासिक तथा सांस्कृतिक पर्व बिस्का जात्राको तयारी तीव्र रूपमा अघि बढिरहेको छ। भक्तपुर नगरपालिका–५ टौमढीस्थित पाँचतले मन्दिरअगाडि भैरवनाथको रथ निर्माण कार्य भइरहेको छ।

आठ रात नौ दिनसम्म चल्ने बिस्का जात्रा सुरु हुन केही दिन मात्रै बाँकी रहँदा रथ निर्माण तीव्र रूपमा अघि बढाइएकाे छ । परम्पराअनुसार नयाँ वर्ष आगमनको चार दिनअघि पाँचतले मन्दिरअगाडि प्यागोडा शैलीमा काठबाट बनाइएको करिब ३० फिट अग्लो तीनतले भैरवनाथको रथ तान्दै जात्रा प्रारम्भ गरिन्छ।

रथ तान्ने क्रममा दुवैतर्फबाट मोटामोटा डोरी प्रयोग गरिन्छ। एकातिर ६ वटा र अर्कोतिर ४ वटा डोरी राखेर हजारौँ युवाहरूले रथ तान्ने प्रचलन रहिआएको छ।

यस जात्रालाई भक्तपुरको पहिचानका रूपमा लिइन्छ, जसमा स्थानीयवासीको उत्साह र सहभागिता उल्लेखनीय रहने गर्दछ। याे जात्रालाइ विश्वपहिचान बाेकेकाे जात्राकाे रूपमा हेरिन्छ । 

काठमाण्डौ, १८ चैत्र । भक्तपुरको मध्यपुरथिमि नगरपालिका–५ राधेराधेमा रहेको यातायात व्यवस्था कार्यालयमा सेवाग्राहीलाई सास्ती दिने दुई जना विचौलियालाई प्रहरीले पक्राउ गरेको छ।

प्रहरी वृत्त थिमिबाट खटिएको टोलीले लिखित तथा प्रयोगात्मक परीक्षा पास गराइदिन्छु भन्दै सेवाग्राहीसँग रकम असुल्दै हिँड्ने उनीहरूलाई पक्राउ गरेको जिल्ला प्रहरी परिसर भक्तपुरका प्रहरी नायब उपरीक्षक प्रकाश जवेगुले जानकारी दिनुभयो।

पक्राउ पर्नेमा सिन्धुपाल्चोक जुगल गाउँपालिका–६ घर भई हाल राधेराधे बस्ने २९ वर्षीया यमकुमारी श्रेष्ठ र चितवन कालिका नगरपालिका–६ घर भई हाल राधेराधे बस्ने ३० वर्षीय सुनील थापा रहेका छन्।

उनीहरूले सेवाग्राहीलाई अनावश्यक दुःख, हैरानी तथा सार्वजनिक सेवा प्रवाहमा अवरोध सिर्जना गरेको आरोप छ । यसअघि  काठमाण्डौको सानो भर्‍याङस्थित यातायात व्यवस्था कार्यालयबाट ७ जना विचौलिया पक्राउ परेका थिए।

त्यस्तै ललितपुरको एकान्तकुना यातायात कार्यालयबाट १५ जनालाई पनि विचौलियाको आरोपमा नियन्त्रणमा लिइएको थियो। प्रहरीले सार्वजनिक सेवा क्षेत्रमा हुने यस्ता अवैध गतिविधिविरुद्ध कारबाहीलाई निरन्तरता दिने जनाएको छ।

मुख्य बुँदा 

भक्तपुरमा बिस्का जात्रा व्यवस्थापनका लागि सरोकारवालासँग समन्वय बैठक सम्पन्न

जात्रा चैत २७ देखि वैशाख ५ गतेसम्म ८ रात ९ दिन सञ्चालन हुने

शान्ति सुरक्षाका लागि सुरक्षा निकायलाई जिम्मेवारी

सिसी क्यामेरा अपग्रेड र ड्रोनमार्फत निगरानी गर्ने तयारी

एम्बुलेन्स, दमकल र स्वास्थ्य सेवा तयारी अवस्थामा राखिने

भीड व्यवस्थापनका लागि स्वयम्सेवक परिचालन गरिने

खानेपानी, विद्युत र यातायात व्यवस्थापनका लागि सम्बन्धित निकायलाई जिम्मेवारी

जात्रा सुरु हुनु अघि शुभकामना र्‍याली आयोजना गरिने

भक्तपुर, ११ चैत । नजिकिँदै गरेको भक्तपुरको ऐतिहासिक तथा सांस्कृतिक पर्व बिस्का जात्रालाई सभ्य, भव्य र शान्तिपूर्ण रूपमा सञ्चालन गर्न सरोकारवालाहरूसँगको समन्वय बैठक सम्पन्न भएको छ।

भक्तपुर नगरपालिकाका प्रमुख सुनिल प्रजापतिको अध्यक्षतामा बुधबार नगरपालिकाको सभाकक्षमा बसेको बैठकले २०८२ चैत २७ गतेदेखि २०८३ वैशाख ५ गतेसम्म सञ्चालन हुने ८ रात ९ दिनको बिस्का जात्रालाई व्यवस्थित बनाउन आवश्यक तयारी तीव्र पार्ने निर्णय गरेको हो।

बैठकमा नगर प्रमुख प्रजापतिले बिस्का जात्रा विश्वभर चिनिने भक्तपुरको मौलिक सांस्कृतिक धरोहर भएकाले यसलाई सुरक्षित, व्यवस्थित र आकर्षक बनाउन सबै सरोकारवालाहरूले आ–आफ्नो भूमिका प्रभावकारी रूपमा निर्वाह गर्नुपर्नेमा जोड दिनुभयो। जिल्ला प्रशासन कार्यालय भक्तपुरका प्रमुख जिल्ला अधिकारी उमेश कुमार ढकालले बिस्का जात्रा सबैको साझा पर्व भएकाले यसको सफल व्यवस्थापनका लागि सबै निकायबीच समन्वय र सहकार्य अपरिहार्य रहेको बताउनुभयो।

गुठी संस्थान भक्तपुरका प्रमुख आनन्द कर्माचार्यले जात्राको तयारी तीव्र रूपमा अघि बढिरहेको जानकारी दिँदै रथ निर्माण कार्य जारी रहेको उल्लेख गर्नुभयो। यसैगरी जिल्ला प्रहरी परिसर भक्तपुरका प्रहरी उपरीक्षक सूर्यबहादुर खड्काले जात्राको सुरक्षा व्यवस्थालाई थप सुदृढ बनाउन सिसी क्यामेरा अपग्रेड गरिने र ड्रोनमार्फत निगरानी गर्ने योजना रहेको बताउनुभयो। साथै, जात्राको प्रत्यक्ष प्रसारण गर्न सके भीड व्यवस्थापनमा सहज हुने उहाँको भनाइ थियो।

बैठकले जात्रालाई व्यवस्थित बनाउन विभिन्न निर्णयहरू गरेको छ। जसअनुसार—

जात्रा क्षेत्रको सरसफाइ, व्यवस्थापन र प्रचारप्रसारको जिम्मा भक्तपुर नगरपालिकालाई दिइएको छ।

शान्ति सुरक्षाको जिम्मेवारी जिल्ला प्रशासन कार्यालय, प्रहरी र अन्य सुरक्षा निकायलाई दिइएको छ।

पूजाआजा र जात्राको समयमै सञ्चालनका लागि गुठी संस्थानलाई जिम्मेवारी तोकिएको छ।

जात्रा व्यवस्थापनमा भैल नायो, वडा कार्यालय र जात्रा समितिको भूमिका सुनिश्चित गरिएको छ।

केबल, तार तथा फाइबर व्यवस्थापनका लागि सम्बन्धित समितिलाई जिम्मा दिइएको छ।

एम्बुलेन्स, दमकल तथा आकस्मिक स्वास्थ्य सेवा तयारी अवस्थामा राखिने निर्णय गरिएको छ।

भीड हुने मुख्य दिनहरू (चैत ३०, वैशाख १ र ४) मा स्वयम्सेवक परिचालन गरिनेछ।

यातायात व्यवस्थापनका लागि ट्राफिक प्रहरी परिचालन गरिनेछ।

खानेपानी र विद्युत आपूर्ति नियमित राख्न सम्बन्धित निकायलाई निर्देशन दिइएको छ।

त्यसैगरी, नयाँ वर्षको अवसर पारेर चैत २७ गते बिहान ७ बजे शुभकामना र्‍याली आयोजना गर्ने निर्णय पनि गरिएको छ। बैठकमा विभिन्न सुरक्षा निकाय, नेपाल रेडक्रस, अस्पताल, टेलिकम, विद्युत प्राधिकरण, खानेपानी संस्था, उद्योग वाणिज्य संघ, स्काउट तथा जात्रासँग सम्बन्धित सरोकारवालाहरूको सहभागिता रहेको थियो।

भक्तपुरको पहिचान बोकेको बिस्का जात्रा प्रत्येक वर्ष धूमधामका साथ मनाइने गरिन्छ, जसले आन्तरिक तथा बाह्य पर्यटकलाई समेत आकर्षित गर्दै आएको छ।

भक्तपुर, १९ फाल्गुन । चुनाव नजिकिँदै गर्दा भक्तपुरबाट इन्सास राइफल र गोलीसहित एकजना पक्राउ परेका छन् ।

सशस्त्र प्रहरी बल इन्टेलिजेन्ट ब्यूरोको टोलीले सूर्यविनायक नगरपालिका–८ सिपाडोलस्थित गणेश बस्तीबाट ३१ वर्षीय आयन सेढाईंलाई पक्राउ गरेको हो ।

जिल्ला प्रहरी परिसर भक्तपुरका प्रहरी नायब उपरीक्षक प्रकाश जबेगका अनुसार गोरखाको पालुङटार नगरपालिका–९ घर भई हाल सूर्यविनायक नगरपालिका–८ भुम्डोलमा बस्दै आएका सेढाईंको साथबाट सेल्फ लोडेड राइफल (इन्सास) एक थान र चार राउन्ड गोली बरामद गरिएको छ । 

सादा पोसाकमा खटिएको प्रहरी टोलीले उनको साथबाट रबरको गोली एक राउन्ड, सटगनमा प्रयोग हुने एक राउन्ड गोली, एक खुकुरी र एक बञ्चरोसमेत बरामद गरेको जनाएको छ ।

घटनाबारे थप अनुसन्धान भइरहेको प्रहरीले जनाएको छ ।

भक्तपुर, १५ माघ । भक्तपुरको कमलविनायक बसपार्क नजिक तीन सवारीसाधन एकआपसमा ठोक्किँदा स्कुटर चालकको मृत्यु भएको छ भने मोटरसाइकल चालक घाइते भएका छन् ।

जिल्ला प्रहरी कार्यालय भक्तपुरका प्रमुख एवं प्रहरी उपरीक्षक सूर्यबहादुर खड्काका अनुसार कमलविनायकबाट च्यामासिंहतर्फ जाँदै गरेको बा ५५ प १७४५ नम्बरको मोटरसाइकल अनियन्त्रित भई सडकमा लड्दा सोही दिशाबाट आउँदै गरेको बागमती प्रदेश ०२–०२० प ११६८ नम्बरको स्कुटरसँग ठोक्किएको थियो । त्यसपछि पछाडिबाट आइरहेको प्रदेश ३–०१–००३ क ६२९१ नम्बरको टिपरले स्कुटरलाई ठक्कर दिएको हो ।

दुर्घटनामा गम्भीर घाइते भएका स्कुटर चालक भक्तपुर नगरपालिका–८ निवासी २६ वर्षीय बिमल वनमालाको भक्तपुर अस्पतालमा उपचारका क्रममा आज मृत्यु भएको प्रहरीले जनाएको छ । त्यसैगरी दुर्घटनामा घाइते भएका मोटरसाइकल चालक भक्तपुर नगरपालिका–७ इनाचोकका २४ वर्षीय राजेश वनमालाको ललितपुरस्थित बीएन्डबी अस्पतालमा उपचार भइरहेको छ ।

दुर्घटनापछि फरार रहेका टिपर चालक सिन्धुपाल्चोकका २५ वर्षीय राजकुमार माझीलाई प्रहरीले नियन्त्रणमा लिई थप अनुसन्धान सुरु गरेको छ । दुर्घटनामा संलग्न तीनवटै सवारीसाधनलाई प्रहरी वृत्त जगातीमा राखिएको प्रहरीले जानकारी दिएको छ ।

 

 

काठमाण्डौ, १० माघ । काठमाण्डौ उपत्यकामा वायु प्रदूषण बढेको छ। काठमाण्डौस्थित अमेरिकी दूतावासको प्रदूषण मापन केन्द्रको तथ्याङ्कलाई आधार मानेर स्वीस वायु प्रदूषण मापन एप ‘आईक्यु एअर’ ले सार्वजनिक गरेको विवरणअनुसार काठमाण्डौको वायु गुणस्तर सूचक (एक्यूआई) २ सय नाघेको छ।

यस्तै वातावरण विभागको प्रदूषण मापन प्रणालीअनुसार दिउँसो भक्तपुर, रत्नपार्क, खुमलटार, भैँसेपाटीलगायतका स्थानमा रहेका मापन केन्द्रहरूले एक्यूआई १ सय ५० भन्दा माथि देखाएका छन्।

एक्यूआई १ सय ५० भन्दा माथि पुग्नुलाई सबै समूहका मानिसका लागि अस्वस्थ हावा मानिन्छ। सामान्यतया पश्चिम वायु सक्रिय भएपछि प्रदूषण कम हुने गर्छ। तर पश्चिम नेपालमा वर्षा र हिमपात भइरहेका बेला काठमाण्डौ उपत्यकामा भने वायु प्रदूषण बढेको हो।

पश्चिम वायुले बादलभन्दा अघि प्रदूषण ल्याएका कारण वायु प्रदूषण बढेको जलवायु विज्ञ ङमिन्द्र दाहालले बताउनुभयो। उहाँका अनुसार वर्षा भएको क्षेत्रमा प्रदूषण हटेको छ भने बादल मात्र पुगेका ठाउँमा प्रदूषण हावामै अड्किएर बसेको छ।