- ३० श्रावण २०८३, शनिबार / Aug 15, 2026
काठमाडौँ, २५ भाद्र । त्रिभुवन अन्तर्राष्ट्रिय विमानस्थल बुधबार मध्यान्ह १२ बजेसम्म उडान नहुने भएको छ। जेनजी प्रदर्शनका कारण मंगलबार दिउँसो २ः३० बजेदेखि बुधबार राति १ बजेसम्म विमानस्थल बन्द गरिएको थियो। तर, परिस्थितिजन्य कारणले आन्तरिक उडान अझै सञ्चालन हुन नसक्ने भएको हो।
आन्तरिक उडानको प्रमुख प्रदायक बुद्ध एयरले बुधबार जारी गरेको सूचनामा मध्यान्ह १२ बजेसम्म उडान हुन नसक्ने जानकारी दिएको छ। कम्पनीले यात्रुमा पर्न गएको असुविधाका लागि क्षमा माग्दै टिकट लिएर यात्रा गर्न नपाएका यात्रुको रकम फिर्ता हुने जनाएको छ।
वायुसेवा सञ्चालक सङ्घले जस्तोसुकै कठिन परिस्थिति भए पनि आम जनतालाई सेवा दिन तत्पर रहेको जनाएको छ। सङ्घका अध्यक्ष मनोज कार्कीले विज्ञप्ति जारी गर्दै प्रदर्शनका क्रममा भएको दुःखद् घटनाप्रति गहिरो संवेदना व्यक्त गर्दै दिवङ्गतप्रति श्रद्धाञ्जली अर्पण र घाइतेको शीघ्र स्वास्थ्य लाभको कामना गरेका छन्।
यसैबीच, सङ्घले छुट्टै विज्ञप्ति निकाल्दै हाल सञ्चालनमा रहेका हेलिकप्टरहरूले कुनै पनि राजनीतिज्ञ वा मन्त्रीलाई सेवा नदिएको स्पष्ट पारेको छ।
