- १६ जेष्ठ २०८३, शनिबार / May 30, 2026
मुख्य बुँदा
भिमफेदी कारागारबाट २६० कैदीबन्दी भाग्ने प्रयास
सेनाले २०० राउन्डभन्दा बढी हवाई फायर र अश्रुग्यास प्रहार
एक कैदीको खुट्टामा गोली लागी अस्पताल पठाइयो
बिहान २:३० बजेसम्ममा कैदीलाई पुनः नियन्त्रणमा लिइयो
कार्यालय भवनमा आगजनी, अभिलेख र सामग्री नष्ट
हेटौँडा, २५ भाद्र । मकवानपुरको भिमफेदी कारागारबाट गएराति २६० कैदीबन्दी भागेका छन्। मध्यरातमा पर्खाल तोड्दै भाग्न खोजेपछि कारागारमा ठूलो तनाव सिर्जना भएको थियो।
जेलर सुवास पौडेलका अनुसार, घटना गएराति करिब १२:२५ बजे ‘क’ ब्लकमा भएका कैदीबन्दीहरूले सिलाइकटाइ मेसिन रहेको कोठाको गेटको बार ह्याक्सो ब्लेडले काटेर सुरु भएको हो। घटनाबारे थाहा पाएलगत्तै नेपाली सेना र सशस्त्र प्रहरीको संयुक्त टोली परिचालन गरिएको थियो।
स्थितिलाई नियन्त्रणमा लिन सेनाले २०० राउन्डभन्दा बढी हवाई फायर र ७ राउन्ड अश्रुग्यास प्रयोग गरेको थियो। सो क्रममा कैदी जंगबहादुर नारायणजंगको खुट्टामा गोली लाग्दा उनलाई बिहान ४ बजे उपचारका लागि हेटौँडा अस्पताल पठाइएको छ।
भाग्न प्रयास गरेका कैदीलाई बिहान २:३० बजेसम्म सुरक्षाकर्मीहरूले नियन्त्रणमा लिएर सम्बन्धित ब्लकमा फिर्ता पठाइएको जेल प्रशासनले जनाएको छ।
झडपका क्रममा कैदीहरूले प्रशासनको कार्यालय भवन र आवासमा आगजनी तथा तोडफोड गरेका छन्। आगजनीबाट महत्त्वपूर्ण अभिलेख, कम्प्युटर, फर्निचरलगायत सामग्री जलेर नष्ट भएका छन्। साथै, प्रशासनको बा १ झ ३६३४ नम्बरको जिपमा समेत तोडफोड भएको छ।
