- १९ श्रावण २०८३, मंगलवार / Aug 4, 2026
काठमाडौं, १७ जेठ । ठगी तथा आपराधिक लाभसम्बन्धी मुद्दामा फरार रहेकी टिकटकर तुलसा अधिकारी (तुलसी अधिकारी) लाई थाइल्यान्डबाट पक्राउ गरी नेपाल ल्याइएको छ।
नेपाल प्रहरीका प्रवक्ता अविनारायण काफ्ले का अनुसार इन्टरपोलमार्फत रेड नोटिस जारी भएपछि थाइल्यान्डमा पक्राउ परेकी अधिकारीलाई नेपाल ल्याएर हाल ललितपुर प्रहरीको हिरासतमा राखिएको छ। अधिकारीविरुद्ध ६ करोड ५२ लाख २९ हजार ७५ रुपैयाँ ठगी गरेको आरोपमा मुद्दा दायर भएको छ।
जिल्ला सरकारी वकिल कार्यालय ललितपुरले चार महिनाअघि उनीविरुद्ध ललितपुर जिल्ला अदालतमा मुद्दा दर्ता गरेको थियो। प्रहरीका अनुसार ‘हनी ट्र्याप’ अर्थात् आपराधिक लाभ र ठगीसम्बन्धी घटनामा परिवर्तित नाम शंकर चिमोरियाले दिएको जाहेरीका आधारमा अनुसन्धान अघि बढाइएको थियो।
सोही घटनासँग सम्बन्धित ठगी, आपराधिक लाभ तथा सम्पत्ति शुद्धीकरण कसुरमा अधिकारीविरुद्ध मुद्दा दायर गरिएको जनाइएको छ।प्रहरीले अदालतमा विचाराधीन रहेको मुद्दाको थप अनुसन्धान तथा कानुनी प्रक्रिया अघि बढाइने जनाएको छ।
