- २ आश्विन २०८३, शुक्रबार / Sep 18, 2026
काठमाडौं । सरकारबाट पर्याप्त बजेट नआउँदा सोचेअनुरुप अनुसन्धानका काम गर्न नसकिएको विश्वविद्यालय अनुदान आयोगका अनुसन्धान निर्देशक प्राडा लालप्रसाद अम्गाईँले बताएका छन् । एक दशमलव पाँच प्रतिशत मात्र अनुसन्धानका लागि बजेट विनियोजन हुने गरेको उनको भनाइ छ ।
उनले भने, ‘अनुसन्धानमा बजेट थप गरेर सबै निकायको समन्वयमा युवाहरूलाई विदेश जानबाट रोक्ने गरी यही काम दिनुपर्छ।’ १२ वटा विश्वविद्यालय र सातवटा स्वास्थ्य विज्ञान प्रतिष्ठानलाई विभिन्न शीर्षकमा अनुदान दिँदै आएको छ ।
आयोगको वार्षिक बजेट २२ अर्ब हाराहारी छ । यो वर्ष अनुसन्धानमा ३२ करोड र छात्रवृत्तिमा २२ करोड विनियोजन गरिएको छ ।प्राध्यापकहरूलाई अनुसन्धान र विद्यार्थीलाई छात्रवृत्तिमा समेट्ने गरिन्छ ।
देशभरका विश्वविद्यालयमा एक सय ६२ वटा आङ्गिक क्याम्पस छन् भने सम्बन्धनप्राप्त एक हजार तीन सय ५४ वटा छन् । तीमध्ये आङ्गिकमा १० हजार नौ सय १६ र सम्बन्धन पाएकाहरूमा १० हजार आठ सय ३४ प्राध्यापक रहेका छन् । पाँच लाख ८४ हजार हाराहारी विद्यार्थी विश्वविद्यालयमा अध्ययनरत छन् ।
