- २८ श्रावण २०८३, बिहीबार / Aug 13, 2026
काठमाडौं, ६ साउन । बागमती प्रदेश सरकारमा सहभागी नेकपा (एमाले) का ६ जना मन्त्रीले सामूहिक रूपमा राजीनामा दिएका छन्। मन्त्रीहरूले बुधबार मुख्यमन्त्री इन्द्रबहादुर बानियाँसमक्ष संयुक्त रूपमा राजीनामा बुझाएका हुन्।
एमाले बागमती प्रदेश संसदीय दलका नेता जगन्नाथ थपलियाले मुख्यमन्त्री बानियाँलाई सम्बोधन गर्दै पठाएको पत्रमा पार्टीको तर्फबाट सरकारमा सहभागी सबै मन्त्रीले बुधबारकै मितिदेखि लागू हुने गरी सामूहिक राजीनामा दिएको उल्लेख गरिएको छ।
बागमती प्रदेश सरकारमा एमालेका तर्फबाट मधुसूदन पौडेल, डा. दिनेशचन्द्र देवकोटा, जयराम थापा, भरतबहादुर केसी, किरण थापा र बिन्दु श्रेष्ठ मन्त्री रहेका थिए।
यसअघि नेपाली कांग्रेस र एमालेको संयुक्त नेतृत्वमा बागमती प्रदेश सरकार सञ्चालन हुँदै आएको थियो। तर एमालेले सरकारलाई दिएको समर्थन फिर्ता लिएपछि मुख्यमन्त्री इन्द्रबहादुर बानियाँ अल्पमतमा परेका छन्।
एमालेको निर्णयसँगै बागमती प्रदेशको राजनीतिक समीकरण फेरिएको छ भने अब सरकारको आगामी कदम र विश्वासको मतबारे चासो बढेको छ।
