- ६ आश्विन २०८३, मंगलवार / Sep 22, 2026
काठमाडौं । राष्ट्रिय सभाको सिट बाँडफाँटमा भएको मोटामोटी सहमतिलाई अन्तिम रुप दिन गठबन्धनको बैठक अहिले बसिरहेको छ । गएराति भएको बैठकमा सहमति नजिक पुगेका गठबन्धन दलका नेताहरु त्यसलाई अन्तिम रुप दिन अहिले जुटेका हुन् ।
नेपाली कांग्रेस, नेकपा माओवादी केन्द्र, एकीकृत समाजवादी र जनता समाजवादीका शीर्ष नेताहरू सहभागी भएका छन् । बैठकमा सहभागी नेताहरुका अनुसार निर्वाचन हुने १९ सिटमध्ये नेपाली कांग्रेसले १०, माओवादी केन्द्र ६, नेकपा (एकीकृत समाजवादी) दुई र जनता समाजवादी पार्टी (जसपा) एक सिट लिने गरी सहमति भएको बुझिएको छ ।
तर, बैठकमा एकीकृत समाजवादीले भने आफूलाई कम सिट भएको भन्दै असहमति जनाएको छ । राष्ट्रिय सभा निर्वाचनमा दलहरुको दाबी रिक्त सिट संख्या भन्दा बढी भएपछि सत्ता गठबन्धनमा भागवण्डा मिलाउन सकस भैरहेको छ ।
निर्वाचनमा प्रमुख प्रतिपक्षी दल नेकपा एमालेलाई सिट नदिने सहमति भएको छ । एमालेले राष्ट्रिय सभामा आफुलाई समेत सिट दिन बार्गेनिङ्ग गरिरहेको छ । गठबन्धन दलले भाग नदिने भएपछि एमालेले १९ सिटमा एक्लै उम्मेदवार उठाउने तयारी गरेको छ ।
