नेपाल बार एसोसिएसनको अध्यक्षमा विजय प्रसाद मिश्रको जित पक्का

काठमाडौँ, २६ चैत । नेपाल बार एसोसिएसनको अध्यक्ष पदमा प्रा. डा. विजय प्रसाद मिश्र निर्वाचित हुने निश्चित भएको छ। गन्न बाँकी मतभन्दा मतान्तर धेरै भएपछि मिश्रको जित पक्का भएको हो । अध्यक्ष पदमा कांग्रेस–एमाले गठबन्धनबाट मिश्र र माओवादी–रास्वपा लगायत दलको गठबन्धनबाट रमन श्रेष्ठ प्रतिस्पर्धामा थिए ।

निर्वाचन समिति स्रोतका अनुसार अब गन्न बाँकी पुनरावेदन अदालत पाटनको करिब १,५५८ र ललितपुर जिल्लाको ५६० गरी जम्मा २,११८ मत छन्। तर, मिश्र श्रेष्ठभन्दा २,२८७ मतले अगाडि छन्। त्यसैले मिश्रको जित सुनिश्चित भएको निर्वाचन समिति स्रोतले जनाएको छ। नेपालका कानुन व्यवसायीहरूको छाता संगठन नेपाल बार एसोसिएसनको नयाँ नेतृत्व चयनका लागि चैत २०, २०८१ मा देशभर मतदान भएको थियो। मतगणना बार एसोसिएसनको भवनभित्रै भइरहेको छ।