- १० कार्तिक २०८३, मंगलवार / Oct 27, 2026
पोखरा । गण्डकी प्रदेश सभाको सातौँ हिउँदे अधिवेशन मंगलबार (चैत २७, २०८१) मा समाप्त भएको छ। सरकारको सिफारिसमा प्रदेश प्रमुख डिल्लीराज भट्टले यो अधिवेशन अन्त्य गरेका हुन्।
हिउँदे अधिवेशनमा १० नयाँ विधेयक संसदमा ‘टेबुल’ गरिएको छ भने ६ विधेयक पारित भएका छन्। यो अधिवेशनबाट संसदको संशोधित नियमावली पनि पारित भएको छ। संसद सचिव हरिराज पोखरेलका अनुसार अधिवेशनमा १६ बैठक बसेका थिए।
पारित भएका विधेयकमा साझेदारी फर्मको नियमन र व्यवस्थापन गर्ने विधेयक, सार्वजनिक सडक निर्माण, विस्तार तथा मर्मतसम्भार गर्ने विधेयक, सामयिक कर असुल गर्ने विधेयक, प्रदेश निजामती सेवा ऐन संशोधन विधेयक, र जीवनाशक विषादी व्यवस्थापन विधेयक समावेश छन्।
यसैगरी, सरकारले औद्योगिक व्यवसाय ऐन २०७५ संशोधन विधेयक, विद्युत विकास विधेयक, मगर र गुरुङ भाषालाई सरकारी कामकाजको भाषाको रूपमा प्रयोग गर्ने विधेयक, दलित अधिकार तथा सशक्तीकरण विधेयक, अपाङ्गता भएका व्यक्तिको अधिकार विधेयक, खानी तथा खनिज विधेयक संसदमा पेस गरेको छ।
थप रूपमा, भवन निर्माण तथा बस्ती विकास विधेयक, खाद्य अधिकार तथा खाद्य गुणस्तर विधेयक, जनस्वास्थ्य सेवा विधेयक र घरेलु मदिराको उत्पादनलाई नियमन र ब्राण्डिङ गर्न बनेको विधेयक पनि टेबुल गरिएको छ। यी विधेयक सामान्य छलफलपछि सम्बन्धित समितिमा दफावार छलफलका लागि पठाइएको संसद सचिवालयले जनाएको छ।
