- ५ असार २०८३, शुक्रबार / Jun 19, 2026
काठमाडौँ, ७ जेठ । हाल नेपालमा पश्चिमी वायु, स्थानीय वायु तथा मौसमी प्रणालीको संयुक्त प्रभाव रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ। यसको प्रभावले देशका विभिन्न भू–भागमा मौसम परिवर्तनशील बनेको छ। पहाडी र हिमाली क्षेत्रमा साधारणतया बादल लागेको छ भने तराईका धेरै भू–भागमा मौसम मुख्यतया सफा रहेको छ।
महाशाखाका अनुसार बुधबार पश्चिमी वायु र स्थानीय वायुको प्रभावले केही जिल्लामा भारी वर्षा समेत भएको थियो। आज दिउँसो कोशी, बागमती र गण्डकी प्रदेशका हिमाली तथा पहाडी भू–भागमा सामान्यतया बादल लाग्नेछ। यस्तै, मधेस प्रदेशसहित बागमती र गण्डकीका तराई भू–भाग तथा अन्य प्रदेशका पहाडी र हिमाली क्षेत्रमा आंशिक बदली रहने अनुमान गरिएको छ। तराईका केही भागमा भने मौसम मुख्यतया सफा रहनेछ।
कोशी, बागमती र गण्डकी प्रदेशका हिमाली तथा पहाडी भू–भागका थोरै स्थानहरूमा, साथै मधेस, लुम्बिनी र कर्णाली प्रदेशका केही पहाडी–हिमाली क्षेत्रहरूमा मध्यम वर्षा वा हिमपातको सम्भावना रहेको महाशाखाले जनाएको छ। साथै बागमती र गण्डकी प्रदेशका तराईका एक–दुई स्थानमा पनि वर्षा हुने सम्भावना छ।
सुदूरपश्चिम र लुम्बिनी प्रदेशका पहाडी तथा तराई भू–भागमा तातो दिन रहने सम्भावना समेत रहेको विभागले जनाएको छ। यसैगरी, आज राति कोशी, बागमती र गण्डकी प्रदेशका पहाडी तथा हिमाली भू–भागमा सामान्यतया बादल लाग्नेछ। मधेससहित बागमती र गण्डकीका तराई तथा अन्य प्रदेशका पहाडी क्षेत्रमा आंशिक बदली रहनेछ भने तराईका धेरै स्थानमा मौसम मुख्यतया सफा रहने अनुमान छ।
रातिको समयमा कोशी, बागमती र गण्डकी प्रदेशका केही स्थानहरूमा तथा मधेस प्रदेशका एक–दुई स्थानमा मेघगर्जन र चट्याङसहित मध्यम वर्षा वा हिमपातको सम्भावना रहेको महाशाखाले जनाएको छ।
