- २९ असार २०८३, सोमबार / Jul 13, 2026
काठमाडौं, २६ जेठ । देशको मौसमी पूर्वानुमान अनुसार कोशी प्रदेशसहित देशका अधिकांश पहाडी भू–भागहरूमा आंशिकदेखि सामान्य बदली रहनेछ। बाँकी भू–भागमा भने मुख्यतः सफा देखिई आंशिक बदलीको अवस्था रहने मौसमविद्हरूले जनाएका छन्।
जल तथा मौसम विज्ञान विभागअन्तर्गत मौसम पूर्वानुमान महाशाखाका अनुसार, कोशी प्रदेशका थोरै स्थानहरू तथा अन्य प्रदेशका पहाडी भू–भागका एक–दुई स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ।
त्यस्तै, देशका उच्च पहाडी तथा हिमाली भू–भागहरूका एक–दुई स्थानमा हल्का वर्षा वा हिमपातको पनि सम्भावना रहेको जनाइएको छ। आज रातिको लागि पनि मौसम बदली रहने पूर्वानुमान गरिएको छ।
कोशी, गण्डकी, कर्णाली र सुदूरपश्चिम प्रदेशका पहाडी भू–भागका एक–दुई स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना रहेको महाशाखाले जानकारी दिएको छ।
यस्ता मौसमीय परिस्थितिमा पहाडी तथा हिमाली क्षेत्रका यात्रुहरू, कृषकहरू तथा स्थानीय बासिन्दाहरूलाई आवश्यक सतर्कता अपनाउन विभागले आग्रह गरेको छ।
