- २८ आश्विन २०८३, बुधबार / Oct 14, 2026
एजेन्सी, कार्तिक १८ । फिलिपिन्सको पूर्वी र मध्य भागमा आएको शक्तिशाली आँधी ‘कलमेगी’ का कारण सोमवारदेखि दशौँ हजार नागरिकलाई सुरक्षित स्थानतर्फ सारिएको छ।
प्रशान्त महासागरबाट तीव्र गतिमा अघि बढिरहेको यस आँधीले तटीय क्षेत्रका जनजीवनमा ठुलो असर पुर्याएको अन्तर्राष्ट्रिय समाचार संस्था एपीले जनाएको छ। तटीय क्षेत्रमा माछा मार्ने कार्य रोकिएको छ भने अधिकारीहरूले ठूलो वर्षा र झन्डै तीन मिटर (१० फिट) उचाइका घातक ज्वारभाटा आउन सक्ने चेतावनी दिएका छन्।
फिलिपिन्स मौसम विभागका अनुसार, स्थानीय रूपमा ‘टिनो’ भनिने ‘कलमेगी’ सोमवार बिहान पूर्वी समर प्रान्तको गुइआन शहरबाट करिब दुई सय ३५ किलोमिटर पूर्वमा थियो।
यस आँधीले एक सय २० किलोमिटर प्रतिघण्टा स्थायी र एक सय ५० किलोमिटर प्रतिघण्टासम्मका तीव्र हावा बहाइरहेको जनाइएको छ। पश्चिमतर्फ सर्दै गर्दा यसले सेबू लगायतका केन्द्रीय टापु प्रान्तहरूमा प्रभाव पार्ने अनुमान गरिएको छ।
