- १ भाद्र २०८३, सोमबार / Aug 17, 2026
काठमाडौं । आज जावलाखेलमा रहेको सदर चिडियाखाना बिहान ५ बजेदेखि नै खुलेको छ । रातो मच्छिन्द्रनाथको भोटो देखाउने जात्राको दिन भएकाले आजको लागि प्रवेश शुल्क ७५ रुपैयाँ मात्रै रहेको सदर चिडियाखानाले जनाएको छ ।
अरू बेला चिडियाखाना प्रवेशको लागि दुई सय रुपैयाँ टिकट लाग्छ । विद्यार्थीका लागि एक सय ३५, ज्येष्ठ नागरिकको लागि ९० रुपैयाँ, १२ वर्षसम्मका बालबालिकाका लागि ७५ रुपैयाँ तथा सार्क देशका विदेशी नागरिकका लागि पाँच सय रुपैयाँ र सार्कबाहेकका देशका नागरिकका लागि एक हजार रुपैयाँ शुल्क तोकिएको छ ।
आज सबैका लागि ७५ रुपैयाँ मात्रै प्रवेश शुल्क तोकिएको चिडियाखानाका सूचना अधिकृत गणेश कोइरालाले जानकारी दिए। रातो मच्छिन्द्रनाथको दर्शन गर्न आउनेमध्ये धेरैजना चिडियाखाना प्रवेश गर्ने भएकाले टिकटमा छुट दिइएको उनको भनाइ छ। दर्शकको सुविधाका लागि आज बिहान ५ बजेदेखि नै चिडियाखाना खुला गरिएको हो । अरू दिन बिहान १० बजेपछि मात्रै चिडियाखाना खुल्ने गर्छ ।
