- २१ कार्तिक २०८३, शनिबार / Nov 7, 2026
काठमाडौं । माछापुच्छ्रे गाउँपालिकामा पर्ने मर्दी हिमाल आधार शिविर (बेसक्याम्प)मा मानव अवशेष भेटिएको छ । माछापुच्छ्रे गाउँपालिका वडा नम्बर–९ का वडा अध्यक्ष हरिबहादुर क्षेत्रीले स्थानीय पर्यटन व्यवसायीले मानव कङ्काल भेटिएको जानकारी दिएको बताए । उनका अनुसार मानिसको हाड, टाउजर र आइफोन मोबाइल पनि फेला परेको छ ।
भेंडा र चौंरी चराउँदै गएकाले शुक्रवार मानिसको दुई वटा हाड भेटिएका हुन् । बर्खा लागेपछि माछापुच्छ्रे गाउँपालिकाको हिमाली क्षेत्रका मानिस भेंडाबाख्रा र चौंरी चराउँदै लेकतिर जाने गर्छन् । भेटिएको मानिसको हाड, टाउजर र आइफोन स्विडिस नागरिक मिचल लिउ ब्लोम्बर्गको हुन सक्ने अनुमान रहेको जिल्ला प्रहरी कार्यालय कास्कीले जनाएको छ ।
मर्दी हिमालको बेसक्याम्पसम्म एकल पदयात्रामा गएका स्विडिस नागरिक मिचल गत साल पुस १४ गते बेपात्ता भएका थिए । त्यो बेला प्रहरी, स्थानीय र स्विडिस् दूतावासकोसमेत सहयोगमा खोजी गर्दा पनि उनको पत्ता लागेको थिएन । पदमार्गको लो क्याम्प माछापुच्छ्रे गाउँपालिकाले राखेको सूचना केन्द्रमा नाम दर्ता गराएर शनिबार ४ हजार ५ सय उचाइको बेसक्याम्प गएका मिचल नफर्केपछि होटलले हराएको जानकारी गराएको थियो । मर्दीको हाइ बेसक्याम्पको होटल म्याजिक माउन्टेनमा उनी बसेका थिए । उनको पासपोर्ट होटलमै भेटिएको थियो । रासस
