- ११ भाद्र २०८३, बिहीबार / Aug 27, 2026
काठमाडौं । तनहुँको आँबुखैरेनी खण्डमा ७ किलोमिटर सडक कालोपत्रे हुने भएको छ । मुग्लिन पोखरा सडक विस्तार योजना अन्तर्गत आँबुखैरेनीतर्फबाट ७ किलोमिटर सडक कालोपत्रे गर्ने तयारी गरेको हो । आँबुखैरेनीदेखि जामुनेसम्मको सडकखण्डमा अहिले सडक विस्तार, पुल र कल्भर्ट निर्माणको काम भइरहेको छ ।
पूर्वीखण्डको ठेक्का चाइना कम्युनिकेशन कन्स्ट्रक्सनले पाएको छ । सडक चौडा पार्ने क्रममा निस्किएका निर्माण सामग्रीमा स्थानीय तहबाट रोयल्टी माग भएको र निर्माण सामग्री ढुवानी गर्दा प्रत्येक स्थानीय तहलाई ढुवानी शुल्क तिर्नुपर्ने अवस्था रहँदा आयोजनाको काममा केही समय ढिलाइ भएको थियो।
२०२६ सालम मा रेखाङ्कन भएको सडकमा सवारीको चाप बढ्दै गएपछि एसियाली विकास बैंक (एडीबी) को ऋण सहयोगमा सडक चार लेनको बनाउन लागिएको हो । पूर्वीखण्डको ठेक्का ६ अर्ब २१ करोड ३१ लाख १३ हजार रूपैयाँ रहेको योजनाले जनाएको छ ।
चालू आर्थिक वर्षभित्रै ७ किलोमिटर सडकखण्ड कालोपत्रे सम्पन्न गर्ने योजनाले जनाएको छ । विद्युत् पोल स्थानान्तरण नहुँदा काममा समस्या आए पनि विद्युत् पोल हटाउँदै कामलाई अगाडि बढाइएको छ ।
