आईएफआर पूर्ण यान्त्रिक प्रणाली भएकाले सुरक्षित र सहज हुने

काठमाडौं । मित्रराष्ट्र चीनको एक्जिम बैंकको २२ अर्ब रुपैयाँ सहुलियतपूर्ण ऋण र अनुदान सहयोगमा विमानस्थल निर्माण गरिएको पोखरा अन्तर्राष्ट्रिय विमानस्थलमा आइएफआर प्रणाली लागू हुने भएको छ । नेपाल नागरिक उड्डयन प्राधिकरण (क्यान) ले पोखरा अन्तर्राष्ट्रिय विमानस्थलमा फागुन ११ गते देखि इन्स्ट्रमेन्ट फ्लाइट रुल्स (आई.एफ.आर) प्रणाली लागू हुने भएको हो ।

विसं २०३२ मा विमानस्थलका लागि भनेर पहिलोपटक तीन हजार १०० रोपनी जमिन अधिग्रहण गरिएको थियो। जमिन अधिग्रहणको चार दशक पछि निर्माण प्रक्रिया पुरा भएर उडान समेत सुरु भइसकेको छ । आईएफआर पूर्ण यान्त्रिक प्रणाली भएकाले भिजुअल फ्लाइट रुल्स (भीएफआर) को तुलनामा निकै सुरक्षित र सहज हुने प्राधिकरणले जनाएको छ । हिमालय एअरको न्यारोबडी विमान एयरबस ३२० ले पोखरामा परीक्षण उडान गरिसकेको छ ।

गत जनवरी–१ देखि सञ्चालनमा आएको उक्त विमानस्थलमा हाल बुद्ध, यती, श्री, सौर्य, गुणलगायत वायुसेवाले आन्तरिक उडान गरिरहेका छन । पोखरामा आईएफआर प्रणाली लागु हुने भएसँगै पोखराबाट नियमित अन्तर्राष्ट्रिय उडानका लागि वायुसेवा कम्पनीहरूले चासो देखाएका छन् ।

अन्तर्राष्ट्रिय उडानका लागि कोरियन एयर, विज एयर, हिमालय एअरलाइन्स र नेपाल वायुसेवा निगम लगायतले चासो देखाएको क्यानले जनाएको छ । २२ अर्ब रुपैयाँ सहुलियतपूर्ण ऋण र अनुदान सहयोग रकममध्ये २५ प्रतिशत रकमको ब्याज नलाग्ने र बाँकीको वार्षिक दुई प्रतिशतले ब्याज रकम भुक्तानी गनुपर्ने पोखरा अन्तर्राष्ट्रिय विमानस्थल प्राधिकरणले जनाएको छ।