- १४ असार २०८३, आईतवार / Jun 28, 2026
काठमाण्डौं । आज राष्ट्रिय प्रजातन्त्र दिवस, विभिन्न कार्यक्रम गरी मनाइँदै छ । २००७ सालको फागुन ७ गते जहानियाँ राणा शासन फालेर जनताले प्रजातन्त्र स्थापना गरेको दिनको सम्झनामा यो दिवस मनाउन थालिएको हो ।
फागुन ७ गतेकै जगमा टेकेर २०४६ साल चैत २६ गते प्रजातन्त्र पुनःस्थापना भएको थियो । यसैको जगमा २०६३ साल वैशाख ११ गते लोकतन्त्र प्राप्त भएको थियो । यसै पृष्ठभूमिमा २०६५ सालको जेठ १५ गते पहिलो संविधानसभाले नेपाललाई सङ्घीय लोकतान्त्रिक गणतन्त्रमा स्थापित गरेको हो ।
दोस्रो संविधानसभाले २०७२ साल असोज ३ गते संविधान घोषणा गरी कार्यान्वयन भएको छ । परिवर्तनको जग फागुन ७ गते प्रजातन्त्र दिवस भएकाले यसलाई विशेषरुपमा मनाउने गरिएको छ ।
दिवसको अवसरमा राष्ट्रपति विद्यादेवी भण्डारी, उपराष्ट्रपति नन्दबहादुर पुन, प्रधानमन्त्री शेरबहादुर देउवा, सभामुख अग्निप्रसाद सापकोटालगायतले शुभकामना व्यक्त गरेका छन् ।
राष्ट्रपति भण्डारीले समृद्धिका माध्यमबाट लोकतान्त्रिक गणतन्त्रलाई नागरिकको जीवनसँग जोड्नुपर्नेमा जोड दिएका छन् । लोकतान्त्रिक प्रणालीले मात्र नागरिकलाई एकताको मालामा गाँसेर बलियो राष्ट्र निर्माण गर्ने बताएका छन् ।
प्रजातन्त्र दिवसले देशको भौगोलिक अखण्डता, राष्ट्रिय स्वाधीनता र नेपाली नागरिकको स्वतन्त्रतालाई अझै सुदृढ गर्दै विकास र समृद्धिको मार्गमा अगाडि बढ्न प्रेरणा दिने विश्वास व्यक्त गरेका छन् ।
यस्तै प्रधानमन्त्री शेरबहादुर देउवाले २००७ सालको राजनीतिक जगमा प्राप्त सफलतामा टेकेर देशमा सङ्घीय, लोकतान्त्रिक गणतन्त्रात्मक र समावेशी शासन प्रणाली स्थापना हुन सकेको उल्लेख गरेका छन् ।
यस्तै सभामुख अग्निप्रसाद सापकोटाले लोकतन्त्रप्रतिको साँचो प्रतिबद्धता र यसको रक्षाको दायित्व सबैको भएको बताए । ७२औँ प्रजातन्त्र दिवसका अवसरमा विभिन्न दलका शीर्ष नेताहरुले पनि शुभकामना व्यक्त गरेका छन् ।
प्रजातन्त्र दिवसका अवसरमा राष्ट्रपति विद्यादेवी भण्डारीले ५ सय १ जना कैदीको भुक्तान हुन बाँकी कैद माफी मिनाहा गरेकी छन् ।
