उपरथी शाहीको घरमा छापा

काठमाडौं । नेपाली सेनाका उपरथी प्रेम शाहीको घरमा सैनिक प्रहरीले छापा मारेको छ । बुढानीलकण्ठ नगरपालिका–२, भंगालस्थित शाहीको घरमा बिहीबार दिउँसो छापा मारेको हो ।

अहिले पनि शाहीको घरमा टोली रहेको सैनिक उच्च स्रोतले बताएको छ । आफ्नो पदावधि एक वर्ष बाँकी रहेको दाबी गर्दै नेपाली सेनाको जंगीअड्डा र रक्षा मन्त्रालयविरुद्ध ७ पुसमा सर्वोच्च अदालतमा शाहीले रिट दायर गरेका थिए ।

अदालतले आदेश दिएसँगै हाजिर हुन उनी जंगीअड्डा जाने तयारीमा थिए । तर, सैनिक प्रहरी गणले उनलाई नियन्त्रणमा लिएर हिरासतमा राखेको छ ।

शाहीको घरमा छापा मारेकोबारे आफूलाई थाहा नभएको सैनिक प्रवक्ता कृष्णप्रसाद भण्डारीले बताए ।