- ९ श्रावण २०८३, शनिबार / Jul 25, 2026
काठमाडौं । एसीसी प्रिमियर कप क्रिकेटको उपाधि जित्दै नेपाल एसिया कपमा छनोट भएको छ। त्रिवि मैदानमा मंगलबार भएको फाइनलमा संयुक्त अरब इमिरेट्स (यूएई) लाई सात विकेटले पराजित गर्दै नेपाल एसिया कपका लागि छनोट भएको हो ।
यूएईले दिएको १ सय १८ रनको मध्यम लक्ष्य नेपालले ३०.३ ओभरमा तीन विकेट गुमाएर पूरा गरेको थियो । उपाधि दिलाउन गुलशन झाले अर्धशतकीय पालि खेलेका थिए । लामो समय क्रिजमा टिकेका उनले ८४ बलमा ६ छक्का र तीन चौकाको सहयोगमा ६७ रन बनाएका थिए ।
गुलशनले भीम सार्कीसँग मिलेर चौथो विकेटका लागि ९२ रनको महत्वपूर्ण साझेदारी गरेका थिए । भीमले ७२ बलमा अविजित ३६ रन बनाए। निकै खराब सुरुवात गरेको नेपालले २२ रनमा महत्वपूर्ण तीन विकेट गुमाएको थियो । दुवै ओपनरसँगै कप्तान रोहितकुमार पौडेल पनि सस्तैमा आउट भएका थिए ।
ओपनर कुशल भुर्तेल दोस्रो ओभरमै रोहन मुस्तफाको एलबीडब्लू धरापमा पारेका थिए । अर्का ओपनर आसिफ शेख पनि व्यक्तिगत आठ रनमा आयान अफजल खानको एलबीडब्लू सिकार भएका थिए । यस्तै नौ बल खेलेर एक रन मात्रै बनाउन सकेका कप्तान रोहितकुमार पौडेललाई रोहन मुस्तफाले बोल्ड गरेका थिए । यूएईका रोहन मुस्तफाले दुई तथा आयान अफजल खानले एक विकेट लिएका थिए।
