- १४ जेष्ठ २०८३, बिहीबार / May 28, 2026
काठमाडौं । प्रिमियर लिग फुटबलमा राति भएको खेलमा चेल्सी साउथह्याम्पटनसँग २–१ ले पराजित भएको छ ।
साउथह्याम्पटनको मैदानमा चेल्सीले पहिले अग्रता लिए पनि त्यसलाई जोगाउन नसक्दा सिजनको पहिलो हार बेहोर्नु पर्यो । २३ औं मिनेटमा रहिम स्टर्लिङले गोल गर्दै चेल्सीलाई अग्रता दिलाएका थिए ।
तर, अग्रता लामो समय टिकेन । २८औं मिनेटमा रोमिओ लाभियाले साउथह्याम्पटनका लागि बराबरी गोल फर्काए । एडम आम्स्ट्रङले पहिलो हाफको इन्जुरी समयमा गोल गर्दै साउथह्याम्पटनलाई २–१ को अग्रता दिलाए ।
त्यही अग्रता कायम राख्दै साउथह्याम्पटनले खेल जित्न सफल भयो । पाँच खेलबाट ७ अंक जोड्दै साउथह्याम्पटन सातौं स्थानमा उक्लेको छ । समान अंक रहे पनि चेल्सी आठौं स्थानमा झरेको छ ।
