- २१ कार्तिक २०८३, शनिबार / Nov 7, 2026
भक्तपुर । बाग्लुङ्गबाट जिल्ला प्रशासन कार्यालय भक्तपुरमा सरुवा भई आएकी प्रमुख जिल्ला अधिकारी रोशनी कुमारी श्रेष्ठले शान्ति सुरक्षा पहिलो प्राथमिकता रहेको बताएकी छन् । सोमबार जिल्ला प्रशासन कार्यालयमा पत्रकारसंँगको अन्तरक्रियामा प्रजिअ श्रेष्ठले शान्ति सुरक्षाको विश्वासनीयतासँगै सुशासन कायम गर्न आफू सधै लागि पर्ने बताइन् ।
सोही क्रममा भक्तपुरमा चोरीका घटना बढेको र चोरलाई समातेर पनि प्रहरीले छोड्ने काम गरेको पत्रकारहरुले गुनासो गरेका थिए । उनकै कार्यकक्षमा भएको परिचयात्मक कार्यक्रममा टेलिभिजन, रेडियो, अनलाइन, छापामाध्यममा कार्यरत पत्रकारहरुको सहभागिता रहेको थियो ।
नेपाल पत्रकार महासंघ भक्तपुरका पदाधिकारीहरुले श्रेष्ठलाई खादा लगाएर स्वागत गरेका थिए । विभिन्न जात्रा, पर्वहरुमा हुने झगडा, शिक्षा, स्वास्थ्य, सडक, विद्युत, लगायतका कार्यहरुमा प्रशासनले तदारुक्ताका साथ समस्या समाधान गर्न पत्रकारले सुझाव दिएका थिए । सरकारको नीति, नियमको आधारमा रही प्राप्त सुझावहरुलाई पत्रकारसँग मिलेर भक्तपुरको शान्तिसुरक्षा कायम गर्ने कार्यमा लाग्ने श्रेष्ठले बताएकी थिइन् ।
