देशैभर आँखा पाक्ने सङक्रमण बढ्याे, साबुनपानीले हात धुन आग्रह गर्दै शैक्षिक संस्था तीन दिन बन्द

काठमाण्डौ । कास्कीको पोखरा महानगरपालिकाले तीन दिनका लागि शैक्षिक संस्था बन्द गरेको छ । महानगरभित्रका सामुदायिक, संस्थागत, मन्टेश्वरी सम्पूर्ण शैक्षिक संस्था वर्षेरहिउँदे र स्थानीय बिदाबाट कट्टी हुने गरी आँखा पाक्ने रोगको सङ्क्रमणलाई रोक्न बुधबारदेखि २६ गतेसम्म बिदा दिने निर्णय गरेको हो ।

देशैभर आँखा पाक्ने सङक्रमण देखिए पछि पोखरासहित अरु कतिपय पालिकाले विद्यालय बन्द गरेका छन् । हरेक वर्षायाममा आँखा पाक्ने समस्या देखिने गरे पनि यस पटक प्रकोपकै रूपमा फैलिरहेको छ । विद्यार्थीलाई सुरक्षित रुपमा घरमा बस्न र अभिभावकलाई पनि सङ्क्रमणबाट बच्न सूचना मूलक सन्देश सम्प्रेषण गर्न महानगरले अनुरोध गरेको छ ।

सङ्क्रमित व्यक्ति वा घरबाहिर गएर फर्केका स्वस्थ व्यक्तिले पनि नियमित साबुनपानीले हात धुन पनि स्वास्थ्य तथा जनसङ्ख्या मन्त्रालयले आग्रह गरेको छ । आँखा पाक्ने समस्या हुँदा आँखा रातो हुने, आँखाको डिल सुन्निएर हेर्न समस्या हुने, आँखाबाट पानी बगिरहने, आँखा चिलाउने, पोल्ने र बिझाउने, आँखामा पहेँलो चिप्रा आउने, बिहान उठ्दा ढकनी एक आपसमा टाँसिएर आँखा खोल्न गाह्रो हुनेजस्ता लक्षण देखिन्छन् ।