- २८ जेष्ठ २०८३, बिहीबार / Jun 11, 2026
महोत्तरी । सम्सी नाकामा भारतीय सीमा सुरक्षा बल (एसएसबी)ले ज्यादति गरेको घटना बाहिर आएको छ । एसएसबीका जवानले नेपाली युवालाई कुटपिट गरेको भन्दै स्थानीय विरोध प्रदर्शनमा उत्रिएका छन् । सम्सी गाउँपालिका–७ का सन्तोकुमार साहलाई एसएसबीले कुटपिट गरेपछि स्थानीयले विरोध प्रदर्शन गरेका हुन् ।
सीमा क्षेत्रमा एसएसबीले नेपाली नागरिकताको प्रमाणपत्र खोजेको विषयमा विवाद भएको र बुधबार दिउसो साहलाई कुटपिट गरेको स्थानीयको भनाइ छ । नेपाल तर्फको बाटो विग्रिएकाले दशगजा क्षेत्रका नेपालीहरु भारतीय सडक हुँदै आउ–जाउ गर्नुपर्ने बाध्यता छ । सीमा क्षेत्रमा एसएसबीले पटक–पटक दुःख दिने गरेको गुनासो स्थानीयको छ ।
एसएसबीका जवानले नेपालीमाथि र्व्यवहार र कुटपिट गर्ने गरेको यो घटना नौलो होइन भन्छन् । सीमा क्षेत्रका नेपालीहरुले सम्सी नाकामा साँझ विरोध प्रदर्शन गरेका हुन् । यो विषयमा दुवै पक्ष बसेर छलफल गर्ने बताएपछि स्थानीयले प्रदर्शन रोकेको सशस्त्र प्रहरी गण सम्सीका इन्सपेक्टर जयराम बस्नेतले बताए ।
पटक–पटक भारतीय एसएसबीका जवानबाट कुटपिट र दुर्व्यवहारको घटना हुने गरेको स्थानीयको गुनासो रहेकाले यस विषयमा अब हुने दुई देशको सुरक्षा बैठकमा समेत छलफल गरिने इन्सपेक्टर बस्नेतले बताए ।
