- ३१ असार २०८३, बुधबार / Jul 15, 2026
काठमाडौं । सङ्घीय संसद्को दुवै सदनको संयुक्त बैठकलाई राष्ट्रपति विद्यादेवी भण्डारीले गरेको सम्बोधनको प्रति प्रधानमन्त्री शेरबहादुर देउवाले टेबुल गरेका छन् । प्रतिनिधिसभाको आजको बैठकमा देउवाले टेबुल गरेका हुन् । बैठकले राष्ट्रपतिबाट सङ्घीय संसद्को दुवै सदनको संयुक्त बैठकलाई आज गरेको सम्बोधनको लागि धन्यवाद ज्ञापन गरे ।
‘सम्माननीय राष्ट्रपतिबाट सङ्घीय संसद्को दुवै सदनको संयुक्त बैठकलाई सम्वत् २०७९ साल जेठ १० गते मङ्गलबारका दिन गरेको सम्बोधनको लागि प्रतिनिधि सभाको यो बैठक सम्माननीय राष्ट्रपति महोदयमा धन्यवाद ज्ञापन गर्दछ ।’ भन्ने प्रस्ताव सभामुख अग्निप्रसाद सापकोटाले प्रस्तुत गरे । उक्त प्रस्ताव बैठकले सर्वसम्मतिले पारित गरेको छ ।
बैठकमा सभामुखले प्रधानमन्त्री तथा मन्त्रिपरिषद्को कार्यालयबाट प्राप्त कार्यभारसम्बन्धी पत्रको व्यहोरा पढेर सुनाए । सो पत्रअनुसार शिक्षा, विज्ञान तथा प्रविधिमन्त्री देवेन्द्र पौडेल संयुक्त अधिराज्यको लण्डनमा आयोजना हुने कार्यक्रममा सहभागी हुन यही जेठ ७ गते प्रस्थान गरेकाले उनको अनुपस्थितिमा अर्थमन्त्री जनार्दन शर्माले सो मन्त्रालयको कार्यभार सम्हाल्ने गरी प्रधानमन्त्रीले तोकेका छन् ।
सङ्घीय संसद्को संयुक्त बैठकमा आज प्रस्तुत सरकारको नीति तथा कार्यक्रममाथिको छलफलका लागि सभामुखले जेठ १२ र १३ गतेका लागि दिन तोकेका छन् । प्रतिनिधिसभाको अर्को बैठक भने जेठ १२ गते बिहान ११ बजे बस्नेछ ।
