- १६ श्रावण २०८३, शनिबार / Aug 1, 2026
बुटवल । भैरहवाको युनिभर्सल कलेज अफ मेडिकल साइन्स एण्ड टिचिङ हस्पिटलमा ड्रेस कोडको विवादले विद्यार्थी आन्दोलित भएका छन् । विद्यार्थीलाई पोशाक अनिवार्य गर्ने प्रिन्सिपल प्रा.डा.लक्ष्मी पाठकको निर्णयप्रति असहमति जनाउंदै विद्यार्थीहरु आन्दोलित भएका हुन् ।
जसका कारण विद्यार्थीहरुले आफूलाई पाँच दिनदेखि बन्धक बनाएर राखेको शौचालय जान र खाना खानसमेत नदिएको पाठकको आरोप छ । रातभर चर्को स्वरमा स्पिकर बजाएर सुत्नसमेत नदिएको जस्ता अमानवीय व्यवहार विद्यार्थीले गरेको प्रिन्सिपल पाठकको गुनासो छ ।
डा. पाठकले आफूलाई ट्रयाप गरेर राखेको गुनासो छ । पकेटमा लुकाएर ल्याइदिएको खानेकुरा मात्र खान पाएको भन्दै आफ्नो स्वास्थ्यमा तलमाथि भए विद्यार्थीहरु नै जिम्मेवार हुनुपर्ने तर्क उनको छ ।
विद्यार्थीहरुलाई दुई पटक वार्तामा आउन लिखित अनुरोध गर्दा पनि नआएको र अराजकताको पराकाष्ठा देखाएको डा. पाठकले बताएकी छन् । विद्यार्थीहरुले माफी नमागेसम्म माग सम्बोधन गर्न नसकिने उनको अडान कायमै छ भने यता विद्यार्थीले आन्दोलन जारी राखेका छन् ।
