- १२ भाद्र २०८३, शुक्रबार / Aug 28, 2026
काठमाडौं । सोमबार मध्यराति १२ बजेदेखि पेट्रोल, डिजेल र मट्टीतेलको मूल्य बढेको छ । नेपाल आयल निगमले साविकको खुद्रा बिक्री मूल्यमा प्रतिलिटर ३ रुपैयाँ मूल्य बढाइएको हो । नेपाल आयल निगमले नेपाल सरकारको ऋण र इन्डियन आयल कर्पोरेसन लिमिटेडलाई फेब्रुअरी २०२२ मा तिर्नुपर्ने बक्यौता १६ अर्ब ३० करोड रुपैयाँ रहेपछि मूल्य बढेको जनाएको छ ।
१६ माघमा प्राप्त नयाँ खरिद मूल्य सूचीबमोजिम पेट्रोलमा प्रतिलिटर ८.१ रुपैयाँ, डिजेलमा ७.९८ रुपैयाँ, मट्टीतेलमा ४.६१ रुपैयाँ र हवाई इन्धनमा ७.८ रुपैयाँ मूल्य बढेर आएकाले मूल्यवृद्धि गर्नुपरेको निगमले जनाएको छ ।
इन्डियन आयल कर्पोरेसन लिमिटेडको बक्यौता एवं सरकारद्वारा उपलब्ध गराइएको ऋणको व्यवस्थापन गर्न निगमलाई अझै चुनौती नै रहेको अवस्था भएकाले निगमले मूल्य समायोजन गरेको निगमले विज्ञप्तिमा उल्लेख गरेको छ ।
पेट्रोल प्रतिलिटर १ सय ७८ रुपैयाँ पुगेको छ भने डिजेल÷मट्टीतेलको मूल्य प्रतिलिटर १ सय ७५ पुगेको छ । हवाई इन्धन र खाना पकाउने ग्यासको खुद्रा बिक्री मूल्य भने हाललाई यथावत् नै राखिएको आयल निगमले जनाएको छ । यसरी सरकारले पेट्रोलिय पदार्थको मूल्य बढाउदा आम सर्वसाधारण मर्कामा परेका छन् ।
