- ९ बैशाख २०८३, बुधबार / Apr 22, 2026
असार २०७७ काठमाडौँ । कोरोना पुष्टि भएका ५४ जनामध्ये चार जना भक्तपुर क्यान्सर अस्पतालका कर्मचारी रहेको खुलेपछि सजकता अपनाइएको छ । ल्याबमा कार्यरत तीन जना र एक जना कार्यालय सहयोगीलाई कोरोना पुष्टि भएको हो । बिरामी र बिरामीका कुरुवामा कोरोना देखिए पछि अस्पतालका ७० जना चिकित्सक, स्वास्थ्यकर्मी र कर्मचारीको पीसीआर परीक्षण गरिएको थियो ।
परिक्षण गरिएका मध्य चार जनामा संक्रमण पोजेटिभ देखिएको अस्पतालले जनाएको छ । सङ्क्रमितमध्ये भक्तपुर नपा वडा नं २ इटाछेँका २४ वर्षीय पुरुष, भक्तपुर नपा वडा नं ९ देगइनाका ३३ वर्षीया महिला, भक्तपुर नपा वडा नं २ बर्केमा डेरा लिई बसेका २१ वर्षीया महिला, भक्तपुुर नपा वडा नं २ ब्यासीका २७ वर्षीय पुरुष रहेको पुष्टी भएको छ ।
अस्पतालका ६ जना चिकित्सक र ४ जना ल्याबका कर्मचारी एकान्तवासमा बसेका छन् । अस्पतालका कर्मचारीलाई दुई समूहमा विभाजित गरी सबै सेवा सुचारु गर्न सकिने अस्पतालले बताएको छ । त्यस्तै सूर्यविनायक नगरपालिकाका दुई जना र चाँगुनारायण नपाका चार जनाको परीक्षण पनि पोजेटिभ देखिएको छ । उपत्यकामा सङ्क्रमितको सङ्ख्या हालसम्मकै सबभन्दा ठुलो भएको स्वास्थ्य मन्त्रालयले जनाएको छ ।
