- १४ जेष्ठ २०८३, बिहीबार / May 28, 2026
काठमाडौं । नेत्रहिन युवा सङ्घ नेपाल, काठमाडौँ उपत्यका शाखाको आयोजनामा अपाङ्गता भएका युवाहरूका लागि दुई दिने नमुना मतदाता शिक्षा तथा राजनीतिक सहभागिता विषयक जिल्लास्तरीय प्रशिक्षक प्रशिक्षण कार्यक्रम काठमाडौँमा सम्पन्न भएको छ।
आगामी मङ्सिर ४ गतेको प्रतिनिधि तथा प्रादेशिक सभाको निर्वाचनलाई लक्षित गर्दै अपाङ्गता भएका व्यक्तीहरूमा मतदाता शिक्षा दिने उद्देश्यले कार्यक्रम आयोजना गरिएको हो। कार्यक्रममा दृष्टिसम्बन्धी, शारिरीक, स्वरबोलाई सम्बन्धी अपाङ्गता, हेमोफेलिया, बहिरालगायत विभिन्न खालका अपाङ्गता भएका २५ जना युवाहरूको सहभागिता रहेको थियो।
दुई दिनसम्म सञ्चालन भएको उक्त प्रशिक्षण कार्यक्रममा सहभागिहरूलाई निर्वाचन प्रक्रिय, निर्वाचन आचारसङ्हिता, मतदाता शिक्षा प्रक्रिया, सामाजिक सञ्जालको प्रयोग, मिथ्या सूचना र दूस्प्रचारलगायतका विषयमा प्रशिक्षण दिइएको थियो भने दोस्रो दिन नमुना मतदान कार्यक्रमसमेत गरिएको थियो।
कार्यक्रमको सहजिकरण अपाङ्गता भएका युवाहरू रोशनी अधिकारी (दृष्टिविहिन) र रबिता देउला (बहिरा) ले नै गरेका थिए। समापन कार्यक्रममा बोल्दै नेत्रहिन युवा सङ्घनेपालका केन्द्रीय कोषाध्यक्ष श्री सुनिलमान सिङले अपाङ्गता भएका युवाहरू स्वयम् जागरुक नभएसम्म राजनीतिक अधिकार र प्रतिनिधित्व प्राप्त नहुने भएकोले सबैलाई एकजुट भएर अगाडि बढ्नुपर्ने उल्लेख बताए ।
नेत्रहिन युवा सङ्घ नेपाल, काठमाडौँ शाखाका उपाध्यक्ष श्री शङ्कर उपाध्याय न्यौपानेले प्रशिक्षण कार्यक्रमबाट सिकेका कुराहरूलाई अनुशरण गर्दै घरघरमा गएर मतदाता शिक्षा कार्यक्रम गर्न र आगामी निर्वाचनमा अपाङ्गता भएका व्यक्तीहरूको मताधिकार उपयोग गराउनको लागि सबैलाई प्रोत्साहित गर्न अनुरोध समेत गरेका थिए ।
