राष्ट्रपतिले राजीनामा दिनुपर्छ

काठमाडौँ । नागरिकता विधेयक फिर्ता गरेको विरोधमा नेपाली कांग्रेसको भातृ संगठन नेपाल तरुण दलले राष्ट्रपति विद्यादेवी भण्डारीको राजीनामा माग गरेको छ ।

तरुण दलका अध्यक्ष विद्वान गुरुङले विज्ञप्ति निकाली राष्ट्रपतिको राजीनामा माग गरेका हुन् । राजीनामा नदिए महाअभियोग लगाएर भए पनि राष्ट्रपति भण्डारीलाई पदच्युत गर्नु पर्ने माग तरुण दलले गरेको हो ।

नागरिकता विधेयक फिर्ता गरेर राष्ट्रपतिले जनतामाथि खेलवाड गरेको विज्ञप्तिमा उल्लेख गरिएको छ । ‘राष्ट्रपति जस्तो गरिमामय पदमा बसेर राजनीतिक प्रतिशोध राखी नागरिताविहीन नागरिकहरूलाई संविधानले दिएको सार्वभौम अधिकारसमेत कुण्ठित हुनेगरी उक्त विधेयक फिर्ता हुनुले नागरिकता प्राप्त गर्ने आशामा बसेका नेपाली नागरिकहरू फेरि अन्धकारको भुमरीमा धकेलिएका छन् ।

राष्ट्रपतिले पदको मर्यादामा बसेर नभई सीमित राजनीतिक दलको चौघेरामा बसेर काम गरेको आरोप तरुण दलले लगएको छ । राष्ट्रपति भण्डारीले नागरिकता विधेयक फिर्ता गरेकी थिइन् । त्यसको केही दल तथा समूहले स्वागत गरेका छन् भने सत्तारुढ दलले विरोध गरेका छन् ।