विद्यार्थीको भौतिक उपस्थितिमा कक्षा सञ्चालन

भक्तपुर । नगरप्रमुख सुनिल प्रजापतिको अध्यक्षतामा बसेको सामुदायिक माविका प्रधानाध्यापकहरुको बैठकले विद्यार्थीको भौतिक उपस्थितिमा कक्षा सञ्चालनबारे छलफल गरेको छ ।

नपाभित्रका सामुदायिक तथा निजी विद्यालयमा अनलाइन कक्षालाई निरन्तरता दिंदै स्वास्थ्य सुरक्षा मापदण्ड अपनाएर मात्र सुरक्षित रुपमा विद्यालय सञ्चालन गर्न जोड दिएको थियो । भक्तपुरका विद्यार्थीको शैक्षिक स्तर माथि उकास्न र शैक्षिक सत्रलाई खेर जान नदिन भौतिक उपस्थितिमा चरणबद्ध रुपमा कक्षा सञ्चालन गर्ने निर्णय गरेको तर विद्यार्थीमा स्वास्थ्य समस्या आएमा तत्काल विद्यालय बन्द गर्नुपर्ने अवस्था पनि आउनसक्नेतर्फ सचेत गरिएको छ ।

कोरोनाको जोखिम अहिले पनि यथावत रहेको भन्दै भक्तपुर नपाले परीक्षणको रुपमा ८, ९ र १० का कक्षाहरू सञ्चालन गर्न लागेको नगरप्रमुख प्रजापतिले बताए । बैठकमा नगरभित्रका १३ वटा मा.वि.मध्ये १२ मा.वि. का प्रधानाध्यापकहरुले नगरपालिकाको निर्देशनअनुसार सुरक्षाको मापदण्ड पूर्ण पालना गरी कक्षा सञ्चालन गर्न तयार रहेको बताए ।

अधिकांश प्रअहरुले अनलाइन कक्षालाई पनि निरन्तरता दिने र विद्यार्थीहरुको भौतिक उपस्थितिलाई पनि सँगसँगै लाने विचार व्यक्त गरे । नगरपालिकाले विद्यार्थीहरुको लागि वितरण गरेको वर्कसिट निकै प्रभावकारी रहेको भन्दै कक्षा सञ्चालनको क्रममा कुनै विद्यार्थी बिरामी भए वा कोरोना संक्रमित भएमा उनीहरुलाई विद्यालयमा नआउन जानकारी गराइने बताए।